სუფთა კანი, ოდნავ არეული თმა, მსუბუქი თვალის მაკიაჟი, წითელი ტუჩები და განსაკუთრებული თავდაჯერებულობა – სწორედ ეს არის ის იმიჯი, რომელსაც ბოლო წლებში „French Girl Beauty“-ს სახელით ვიცნობთ.
ფრანგული სილამაზის ესთეტიკა გაცილებით მეტია, ვიდრე მაკიაჟის რამდენიმე კონკრეტული ტექნიკა. ის ერთგვარი ფილოსოფიაა, რომლის მთავარი იდეა არა საკუთარი გარეგნობის შეცვლა, არამედ მისი გამოკვეთაა. მძიმე მაკიაჟის ნაცვლად — ბუნებრივი, ჯანსაღი და ცოცხალი კანი; მკვეთრი კონტურის ნაცვლად — რბილად გამოკვეთილი, ბუნებრივი ნაკვთები.
თუმცა აქვე ჩნდება ყველაზე საინტერესო კითხვა: ნამდვილად ასე გამოიყურებიან ფრანგი ქალები, თუ „French Girl Beauty“ თანამედროვე კულტურის მიერ შექმნილი მითია?
ამ ტერმინს ერთი კონკრეტული ავტორი ან შექმნის თარიღი არ აქვს. ის წლების განმავლობაში ჩამოყალიბებული კულტურული სახეა, რომლის ფესვებიც მე-20 საუკუნის შუა პერიოდის ფრანგულ კინოსა და მოდაში უნდა ვეძებოთ.
განსაკუთრებით მნიშვნელოვანი აღმოჩნდა 1950-60-იანი წლების ფრანგული „ახალი ტალღა”. ამ პერიოდის მსახიობებმა ეკრანზე ქალის სრულიად განსხვავებული იმიჯი შექმნეს – ნაკლებად ფორმალური, უფრო თავისუფალი და დამოუკიდებელი. სწორედ მაშინ გაჩნდა ის ესთეტიკა, რომელსაც დღეს „French Girl Beauty“-ის ვუწოდებთ.
ამ კულტურულ იმიჯს სხვადასხვა ეპოქაში ისეთი ქალები ქმნიდნენ, როგორებიც იყვნენ ბრიჯიტ ბარდო, ფრანსუაზ არდი, კატრინ დენევი და ჯეინ ბირკინი. მათ ერთმანეთისგან სრულიად განსხვავებული გარეგნობა ჰქონდათ, თუმცა საერთო ერთი იყო – ისინი არ ცდილობდნენ სრულყოფილი, ზედმეტად დამუშავებული სილამაზის დემონსტრირებას.
როგორ იქცა ესთეტიკა გლობალურ ტრენდად?
თუ ფრანგული სილამაზის კულტურული ფესვები გასული საუკუნის კინოშია, მისი თანამედროვე სახელწოდება და გლობალური პოპულარობა უკვე მოდის ჟურნალებს, ბლოგებსა და სოციალურ მედიას უკავშირდება.
2010-იანი წლების შუა პერიოდში „French girl“ უკვე აქტიურად გამოიყენებოდა საერთაშორისო beauty-მედიაში. მაგალითად, Vogue 2014 წელს ფრანგი ვიზაჟისტის, Violette-ის, დახმარებით მკითხველს სწორედ „French girl beauty“-ს წესებს უხსნიდა.
ეს ახალი ტრენდი არ არის, თუმცა ბოლო წლებში მისი პოპულარობა კვლავ გაიზარდა. ამის ერთ-ერთი მიზეზი beauty ინდუსტრიაში მინიმალიზმის დაბრუნებაა.
ამასთან, ფრანგული სილამაზის მიმართ საერთაშორისო ინტერესი მხოლოდ მაკიაჟით არ შემოიფარგლება. განსაკუთრებული პოპულარობა მოიპოვა ე.წ. French pharmacy-მ — ფრანგული აფთიაქების დერმოკოსმეტიკამ.
„არასრულყოფილება“ აქ უპირატესობაა
French Girl Beauty-ის ყველაზე მნიშვნელოვანი დეტალი შესაძლოა სწორედ ეს იყოს – ყველაფერი იდეალურად არ უნდა გამოიყურებოდეს.
ოდნავ ჩამოშლილი თმა, ტუჩზე დარჩენილი პომადა, გადღაბნილი ლაინერი ან კანის ბუნებრივი ტექსტურა ამ ესთეტიკაში ხარვეზად არ ითვლება.
პირიქით, სწორედ ასეთი დეტალი ქმნის ადვილად შესამჩნევ შარმს.
როგორ მივაღწიოთ French Girl Beauty-ის ეფექტს?
კარგი ამბავი ის არის, რომ ამისთვის ათობით პროდუქტის ყიდვა აუცილებელი არ არის.
შეარჩიეთ თქვენი კანის ტიპისთვის შესაფერისი ნაზი გამწმენდი და დამატენიანებელი. დილით კი აუცილებლად გამოიყენეთ მზისგან დამცავი საშუალება. თუ კანის კონკრეტული პრობლემა გაქვთ, უმჯობესია რუტინა დერმატოლოგთან შეათანხმოთ.
ტონალური კრემი გამოიყენეთ მსუბუქად, ან მხოლოდ პრობლემურ ადგილებზე. მიზანი არ არის კანის სრულად დაფარვა – პირიქით, უნდა შენარჩუნდეს მისი ბუნებრივი იერი.
არ არის აუცილებელი ყოველდღე რთული ვარცხნილობით იაროთ. გამოიყენეთ მსუბუქი სპრეი ან თმის ზეთი და ეცადეთ, ბუნებრივი ფორმა შეინარჩუნოთ.
ასევე დაგაინტერესებთ:
