კიევის მოდის კვირეულის ერთ-ერთ ყველაზე ემოციურ ჩვენებაზე პოდიუმზე პროფესიონალ მოდელებთან ერთად უკრაინელი ომის ვეტერანები გამოჩნდნენ – ადამიანები, რომლებმაც ომის შედეგად კიდურები დაკარგეს და ახლა პროთეზებით აგრძელებენ ცხოვრებას. მათ დიზაინერ იგორ სიდლეცკის მიერ შექმნილი სამოსი წარადგინეს.
ერთ-ერთი მათგანი იაროსლავ შარკია – უკრაინელი ვეტერანი და ყოფილი საბრძოლო მედიკოსი, რომელმაც აღმოსავლეთ უკრაინაში ბრძოლების დროს ფეხი დაკარგა.
„ერთი ფეხი დონბასში მაქვს, მეორე კი Fashion Week-ის პოდიუმზე“, – ხუმრობით უთხრა მან AFP-ს.
შარკისთვის ეს ორი სრულიად განსხვავებული სამყაროა. ფრონტის ნაცვლად ახლა მას კამერების წინ უწევს დგომა. თავადაც აღნიშნავს, რომ ეს ამბავი მისთვის ჯერ კიდევ უჩვეულოა, თუმცა ამ განსხვავებული რეალობების ერთმანეთისგან გამიჯვნა ისწავლა.
მთავარი იდეა მხოლოდ ვეტერანების პოდიუმზე გამოყვანა არ ყოფილა. სიდლეცკის კოლექცია სპეციალურად პროთეზების მქონე ადამიანების საჭიროებების გათვალისწინებით შეიქმნა.
ჩვენების კიდევ ერთი მონაწილე 22 წლის მიკოლა კოვალიოვი იყო, რომელმაც ომის დროს ორივე ფეხი დაკარგა. ის უკრაინის არმიაში რუსეთის სრულმასშტაბიანი შეჭრის შემდეგ, ოთხი წლის განმავლობაში მსახურობდა.
იგორ სიდლეცკი ამ მიმართულებით რამდენიმე სეზონია მუშაობს. მისი ბრენდი SIDLETSKIY ადაპტირებულ ტანსაცმელს პროთეზების მქონე ადამიანებისთვის ქმნის. დიზაინერი ამ პროცესში უშუალოდ ვეტერანებთან თანამშრომლობს.
მანამდე, 2026 წლის მარტში, Ukrainian Fashion Week-ის ფარგლებში, სიდლეცკიმ U+System-ის პროთეზირების ცენტრთან თანამშრომლობით ექვსი ადაპტირებული ლუქი წარადგინა. დიზაინერის თქმით, ასეთი სამოსის შექმნა განსაკუთრებით რთულია, რადგან ამპუტაციის თითოეული ტიპი განსხვავებულ საჭიროებებს წარმოშობს. ამიტომ დიზაინერებს ვეტერანებთან მუდმივი კომუნიკაცია და მათი ყოველდღიური გამოცდილების გათვალისწინება სჭირდებათ.
უკრაინის Fashion Week-ის ფარგლებში ამპუტაციის მქონე ვეტერანები JULIYA KROS-ის 2027 წლის გაზაფხული-ზაფხულის კოლექციის ფინალშიც გამოჩნდნენ.
დიზაინერ იულია პერეკრიოსტოვას მიერ შექმნილ კოლექციას RECONSTRUCTION ეწოდება. სწორედ ამ ჩვენების ბოლოს შეუერთდნენ ვეტერანები მოდელებს და ადაპტირებული სამოსი წარადგინეს.
კოლექციის იდეა განსაკუთრებით სიმბოლურია – RECONSTRUCTION არ ნიშნავს ძველ მდგომარეობაში დაბრუნებას. მისი მთავარი გზავნილი ახალი რეალობის მიღება, ახალი შესაძლებლობების პოვნა და წინსვლაა.
ასევე დაგაინტერესებთ:
#OK! დემნა გვასალიას კაბა Gucci-ს მუზეუმში – ფლორენციაში ბრენდის ახალი გამოფენა გაიხსნა
#OK! გალიბ გასანოვმა კოპენჰაგენის მოდის კვირეულზე ქართული თეთრისგან შექმნილი კოსტიუმები წარადგინა
