რუბრიკა OKმენეჯერის! სტუმარია სოფო ახალაია, რომელიც გათბობა-გაგრილების კომპანია „ცელსიუსი“-ს მარკეტინგის სამსახურის ხელმძღვანელი და პარალელურად, რუსთავის საერთაშორისო ავტოდრომის მარკეტინგი და პიარია. როგორც თავად აღნიშნა, მუდმივად ესწრება სხვადასხვა მიმართულების ტრენინგებს, კურსებს და სემინარებს ქართველ და უცხოელ ტრენერებთან ან ინსტიტუტებთან, რათა შეიძინოს რაც შეიძლება მეტი ცოდნა და გამოცდილება.
სოფო, უპირველესად გაგვეცანით.
მე ვარ სოფო ახალაია მარკეტერი. მყავს მეუღლე და ორი შვილი. ვარ ენერგიული, ძალიან მიყვარს ადამიანებთან ურთიერთობა, მოგზაურობა და მუსიკა. ვფლობ, ფრანგულ, ინგლისურ და რუსულ ენებს.
გვიამბეთ თქვენი გამოცდილებისა და კარიერული გზის შესახებ.
დავამთავრე თბილისის 151-ე საშუალო სკოლა. შემდეგ ჩავაბარე და დავამთავრე სამედიცინო სასწავლებელი. 90-იან წლებში რადგან უნივერსიტეტების დიდი არჩევანი არ იყო, საქართველოს ტექნიკური უნივერსიტეტის – სამთო ინჯინერიის პროფესია შევიძინე. 2006 წელს დავამთავრე „სეუ“ ეკონომიკის ფაკულტეტი – საბანკო საქმის და აუდიტის მიმართულებით.
ჩემმა ტექნიკურმა პროფესიებმა მიბიძგა, რომ ამ მიმართულებით დამეწყო მუშაობა. 8 წელი ვიმუშავე „თეგეტა მოტორსში“ ბუღალტერიის მიმართულებით. თუმცა, მივხვდი, რომ ფიზიკურად აქტიური სამსახური მჭირდებოდა, ცხოვრების არცერთ ეტაპზე არ შემიწყვეტავს სწავლა. მუდმივად ვესწრები სხვადასხვა მიმართულების ტრენინგებს, კურსებს და სემინარებს ქართველ და უცხოელ ტრენერებთან ან ინსტიტუტებთან, ამ ყველაფრის ფონზე გამიჩნდა ამბიცია, რომ შემეცვალა სამუშაო სფერო, სადაც მეტი კომუნიკაცია მექნებოდა ადამიანებთან და მეპოვნა შესაფერისი საქმიანობა.
- 2015-2017 წლამდე ვიყავი ინფინიტი ჰოლდინგში – საცალო გაყიდვების სამსახურის ხელმძღვანელი;
- 2017 წლიდან დღემდე – რუსთავის საერთაშორისო ავტოდრომის მარკეტინგი და პიარი;
- 2018-2020 წლებში გათბობა-გაგრილების კომპანია „საგას“ მარკეტინგის სამსახურის უფროსი;
- 2020 წლის ბოლოდან – დღემდე – გათბობა-გაგრილების კომპანია „ცელსიუსი“-ს მარკეტინგის სამსახურის ხელმძღვანელი.
ამ ეტაპზე რა წარმოადგენს თქვენს ძირითად საქმიანობას?
ამჟამად ვარ გათბობა-გაგრილების კომპანია „ცელსიუსი“-ს მარკეტინგის სამსახურის ხელმძღვანელი, პარალელურად, რუსთავის საერთაშორისო ავტოდრომის მარკეტინგი და პიარი.
ჩემი ძირითადი საქმიანობა უკავშირდება სწორედ “ცელსიუსს”, რომელიც ახლახანს გახდა ორი წლის. კომპანიამ პირველი ნაბიჯები ჩემთან ერთად დაიწყო და დღემდე გრძელდება. მარკეტინგის გუნდში მყავს კვალიფიციური და გამოცდილი თანამშრომლები, რომლებიც მუდვიმად სიახლეების ძებნაზე, სწავლაზე და განვითარებაზე არიან ორიენტირებულნი. ეს ყველაფერი დიდ მოტივაციას მაძლევს შემართებით მივუდგე საქმეს, რომელიც ძალიან მიყვარს და კომპანია ერთად გავხადოთ წარმატებული.
რაც შეეხება რუსთავის საერთაშორისო ავტოდრომს, აქ მცირე დროს ვატარებ. თუმცა, უნდა ვაღიარო, რომ ძალიან განსხვავებული და საინტერესო სფეროა. თუ გიყვარს ავტომობილი, კარგად მართავ და გაქვს ადრენალინის დიდი რაოდენობა, მაშინ უნდა მოხვიდე ავტოდრომზე და თავად შეიგრძნო ეს ყველაფერი. ამის სიტყვებით გადმოცემა „უწყლო აუზში ცურვის” ტოლფასია.
გვიამბეთ “ცელსიუსის” საქმიანობის შესახებ. რას სთავაზობს საზოგადოებას?
კომპანია „ცელსიუსი“ არის გათბობა-გაგრილების კომპანია, რომელიც არის იტალიური ბრენდ „არისტონის“ ოფიციალური წარმომადგენელი საქართველოში. პანდემიის პერიოდში დავიწყეთ საქმიანობა, როცა კომპანიები იხურებოდა, შევქმენით გუნდი, რომელშიც 100-მდე ადამიანია დასაქმებული. 2 წლის განმავლობაში, გავხსენით 7 ფილიალი და გავშალეთ ჩვენი პროდუქცია საქართველოს სხვადასხვა რეგიონში. მიუხედავად მოკლე პერიოდისა, შევიძინეთ ბევრი პატრნიორი კომპანია სხვადასხვა სფეროში, ასევე სამშენებლო და სავაჭრო ქსელების მიმართულებით. ამ ეტაპზე წარმოვადგენთ უკვე სხვადასხვა ევროპული კომპანიების (გათბობა-გაგრილების მიმართულებით) ბრენდებს ჩვენს ქსელში და ვემსახურებით მთელს საქართველოს ხარისხიანი პროდუქციით და საუკეთესო საგარანტიო პირობებით.
ჩვენთვის ძალიან მნიშვნელოვანია სოციალური პასუხისმგებლობა და გარემო, სადაც ვცხოვრობთ და სხვა აქტივობებთან ერთად ჩვენს ქსელში წარმოდგენილია ენერგოეფექტური პროდუქცია, რაც მინიმალურ ზიანს აყენებს გარემოს.
და ბოლოს… სად ხედავთ საკუთარ თავს 10 წლის შემდეგ?
არ შემიძლია დღევანდელი სიტუაცია არ შევიმჩნიოთ, ის რაც პანდემიამ და ომმა მოიტანა, კიდევ ერთხელ მიგვანიშნებს, რომ წინასწარ ბევრ რამეს ვერ დაგეგმავ.
ვისურვებდი, რომ 5-10 წლის შემდეგ ვმუშაობდე საერთაშორისო კომპანიაში ჩემივე სპეციალობით, რომელიც იმ დროისთვის მოწინავე იქნება და ენერგიას არ დავიშურებ საუკეთესო გამხდარიყოს.
P.S. სხვა პირად გეგმებს ჩემთვის შევინახავ.
