29 წლის მოდელმა ჰეილი ბიბერმა, რომელიც მომღერალ ჯასტინ ბიბერზეა დაქორწინებული, 2022 წელს კანის მოვლის ბრენდი Rhode დააფუძნა, რომელიც მისი მეორე სახელით Rhode Baldwin-ით არის შთაგონებული.
მინიმალისტური კონცეფციით შექმნილი ბრენდი სულ რამდენიმე წელში გლობალურ სილამაზის ინდუსტრიაში ერთ-ერთ ყველაზე სწრაფად მზარდ ბრენდად იქცა.
ბრენდმა არსებობის პირველსავე წელს 200 მილიონ დოლარზე მეტი ღირებულების პროდუქცია გაყიდა, ხოლო e.l.f-ის მიერ Rhode-ის შეძენის შემდეგ ბრენდი დაახლოებით 70%-იან წლიური გაყიდვების ზრდას ელის.
მინიმალისტური შეფუთვა, ნეიტრალური ფერთა პალიტრა და ხელმისაწვდომი ფასი ბრენდს ახალგაზრდა აუდიტორიასთან განსაკუთრებით აახლოვებს. Rhode ყურადღებას ამახვილებს სიმარტივეზე, ბუნებრიობასა და კანის ჯანმრთელობაზე. სწორედ ეს ვიზუალური იდენტობა გახდა ერთ-ერთი მთავარი ფაქტორი, რამაც ბრენდს სწრაფად მოუტანა ცნობადობა. Rhode-ის რამდენიმე პროდუქტი ნამდვილ ბესტსელერად და სოციალური მედიის ფავორიტად იქცა მაგალითად: Peptide Lip Treatment, Pocket Blush, Glazing Milk და Rhode Lip Case.
სოციალური მედიის სტრატეგიულმა გამოყენებამ, ლიმიტირებულმა პროდუქციის რაოდენობამ და ჰეილი ბიბერის პერსონალურმა ჩართულობამ ბრენდის ზრდა კიდევ უფრო დააჩქარა.
ჰეილი ბიბერს ყოველთვის ჰქონდა სურვილი, რომ მისი პროდუქცია მეტი მომხმარებლისათვის ყოფილიყო ხელმისაწვდომი, შესაბამისად 2025 წლის მაისში, Rhode 1 მილიარდ დოლარად ამერიკულმა კოსმეტიკურმა კომპანიამ e.l.f. Beauty-მ შეიძინა. გარიგება სილამაზის ინდუსტრიაში ერთ-ერთ ყველაზე გახმაურებულ მოვლენად შეფასდა.
e.l.f-ის მიერ ბრენდის შეძენის შემდეგ, Rhode-მა მხოლოდ ერთ კვარტალში დაახლოებით 128 მილიონი დოლარის გაყიდვები აჩვენა, რაც მის სწრაფ კომერციულ ზრდასა და მომხმარებელთა მაღალ ინტერესზე მიუთითებს.
Rhode-ის ჩრდილოეთ ამერიკაში საცალო დებიუტი განსაკუთრებულად წარმატებული აღმოჩნდა — ინდუსტრიის შეფასებით, მოვლენა სხვა ბრენდების საშუალო დებიუტზე 2.5-ჯერ მასშტაბური იყო.
ახალი პროგნოზების მიხედვით, Rhode 2026 წელს 260–265 მილიონი დოლარის წმინდა გაყიდვებს მიაღწევს, რაც მნიშვნელოვნად აღემატება თავდაპირველ მოლოდინს — დაახლოებით 200 მილიონ დოლარს. ეს ნიშნავს, რომ ბრენდი დაახლოებით 70%-იან წლიური გაყიდვების ზრდას აჩვენებს.
მარკეტინგის კუთხით Rhode დიდწილად ეყრდნობა ციფრულ პლატფორმებსა და სოციალური მედიის ძალას. ბრენდის კამპანიები ხშირად ეფუძნება რეალურ მომხმარებელთა გამოცდილებას, მოკლე ვიდეოფორმატებსა და ვირუსულ ტრენდებს, რაც განსაკუთრებით ეფექტური აღმოჩნდა TikTok-სა და Instagram-ზე. „Glazed donut skin“-ის კონცეფცია სწორედ სოციალური მედიის საშუალებით იქცა გლობალურ ტრენდად და მნიშვნელოვნად გაზარდა ბრენდის პოპულარობა.
მნიშვნელოვანი როლი აქვს ჰეილი ბიბერის პირად ჩართულობასაც. მოდელი აქტიურად არის ჩართული როგორც პროდუქციის განვითარებაში, ისე მარკეტინგულ კამპანიებში, რაც მომხმარებელს ბრენდთან უფრო ახლო და ავთენტურ კავშირს უქმნის. მისი სოციალური ქსელები Rhode-ისთვის ერთგვარ მარკეტინგულ პლატფორმადაც იქცა, სადაც ახალი პროდუქტები ხშირად პირველ რიგში სწორედ მის აუდიტორიას ეცნობა.
გარდა ამისა, Rhode იყენებს ე.წ. „limited drop“ სტრატეგიას — პროდუქციის შეზღუდული რაოდენობით გამოშვებას, რაც მომხმარებლებში ინტერესსა და მოთხოვნას კიდევ უფრო ზრდის. მსგავსი მიდგომა ქმნის ექსკლუზიურობის განცდას და ხშირად იწვევს პროდუქციის სწრაფად ამოყიდვას, რაც ბრენდის მარკეტინგულ ეფექტსაც ზრდის.
მიუხედავად გაყიდვისა, ჰეილი ბიბერი კვლავ რჩება ბრენდის დამფუძნებლად, კრეატიულ დირექტორად და ინოვაციების ხელმძღვანელად. ის აგრძელებს პროდუქციის განვითარებას და მუშაობს მარკეტინგულ სტრატეგიაზე, რაც Rhode-ის იდენტობის შენარჩუნებას უზრუნველყოფს.
