წლის ყველაზე ჯადოსნური დღე − ახალი წელი გვიახლოვდება. „პალიტრა L“ გირჩევთ 12 გამორჩეულ წიგნს, რომელთა ჩუქება შეგიძლიათ როგორც საკუთარ თავისთვის, ასევე მეგობრებისთვის, საყვარელი ადამიანისთვის, შვილისთვის, მშობლისთვის… წიგნს შეუძლია გამოგზაუროს ყველგან, სადაც მოისურვებ. წიგნი ფარანია, რომელიც ცხოვრების გზას გინათებს. იპოვეთ თქვენი წიგნი, იპოვეთ თქვენი გზა, იპოვეთ თქვენი შუქი. გააგრძელეთ კითხვა, იპოვეთ ახალი წიგნები − ახალი წელი ახალი შანსია!
I ჯგუფი − მხატვრული ლიტერატურა
ანი ერნო − „წლები“
2022 წელს ანი ერნო გახდა ლიტერატურის დარგში ნობელის პრემიის ლაურეატი. თავის უმთავრეს ნაწარმოებში, 2008 წელს გამოქვეყნებულ მემუარულ რომანში „წლები“, არა მხოლოდ ერთი ქალის, არამედ მთელი თაობის ცხოვრების ანონიმური ისტორიაა. ეს წიგნი იმიტომ უნდა წაიკითხო, რომ იქ საკუთარ ამბავსაც მიაგნო.
კოლინ ჰუვერი − „ყველაფერი მთავრდება ჩვენით“.
ეს არის წიგნი, რომლის 4 მილიონი ეგზემპლარია გაყიდული. „როგორ იქცევა ქალი, როცა მასზე საყვარელი ადამიანი ძალადობს? ეს წიგნი ერთ ოჯახზეა, რომელიც სიყვარულის, მძაფრი ვნებებისა და შიშის უზარმაზარ ტალღებში გადარჩენას ცდილობს.
მარიამ გურგენიშვილის „მარგალიტები“
„გახდი ბესტსელერის ავტორი 2020“-ის ჟიურის რჩეული და ლიტერატურული პრემია „საბა 2022“-ის ფინალისტია, ნომინაციაში „საუკეთესო დებიუტი“. რომანი 1990იანი წლების დასაწყისის თბილისს სრულიად ახლებურად დაგანახვებთ. ეს არის სიცილითა და ცრემლებით სავსე ამბავი გოგონებზე, რომლებიც ცდილობენ ცხოვრება გააგრძელონ და გადარჩნენ.
ანუკი შატაკიშვილის „წუთით კოსმოსში“ „გახდი ბესტსელერის ავტორი 2022“-ის გამარჯვებულია.
მთვარეზე გაფრენა ნაწარმოების მთავარი გმირების − ლალუნასა და ჰალეის ბავშვობისდროინდელი სურვილია, მაგრამ კოსმოსისკენ მიმავალი გზა დიდი საიდუმლოებებით, ხიფათებითა და დაბრკოლებებითაა სავსე. როგორ გაუმკლავდება შეყვარებული წყვილი ამ დაბრკოლებებს?
II ჯგუფი − საბავშვო
მარიამ წიკლაურის „ჩემი აფრიკელი ბებია“ „გახდი საბავშვო ბესტსელერის ავტორი 2022“-ის გამარჯვებულია. როცა ყველას ბებია ჩვეულებრივად იბადება, შენი კი მზიდან ჩამოვარდება და პირდაპირ შუა აფრიკაში, ნიანგების ტბაში მოადენს ტყაპანს, კი უნდა მიხვდე, რომ შენს თავს რაღაც უჩვეულო ხდება.
ვასო გულეურის „თოვლის გუნდა მეგობარს დაეძებს“ საინტერესო თავგადასავალში გიწვევს. ვინ არ ისურვებდა თოვლის გუნდასთან მეგობრობას? მაგრამ ზოგჯერ ყველაფერი ისე არ ხდება, როგორც თუნდაც თოვლის გუნდას უნდა.
საოცარი საშობაო ამბები − ეს არის შესანიშნავი წიგნი, საუცხოო ილუსტრაციებითა და შთამბეჭდავი პერსონაჟებით, რომლებიც ბავშვებს საშობაო ზღაპრების ჯადოსნურ სამყაროში ამოგზაურებენ.
„ვინი პუჰის საშობაო საგანძური“. აქ დათუნია პუჰისა და მისი მეგობრების თავგადასავლები გელით.
III ჯგუფი − ლურჯი ოკეანე
გერი ჩეპმენის „სიყვარულის 5 ენა“.
შეგვიძლია ვისწავლოთ სიყვარული? გერი ჩეპმენის საერთაშორისო ბესტსელერმა მილიონობით წყვილს დაუბრუნა ან გაუმძაფრა სიყვარულის განცდა.
ჯეიმს ქლიერის „ატომური ჩვევები“
შეგიცვლით ფიქრებს პროგრესსა და წარმატებაზე და მოგცემთ ინსტრუმენტებსა და სტრატეგიებს, რომლებიც გჭირდებათ თქვენი ჩვევების გარდაქმნისთვის.
რამაზ გიგაურის „ბედნიერების ხელოვნება“ დაგვეხმარება პოზიტიური აზროვნების გამომუშავებაში, ასევე, სტრესული სიტუაციების დროს ემოციების მართვასა და შინაგანი რესურსების ეფექტიანად გამოყენებაში.
ჰექტორ გარსია, ფრანსესკ მირალესი − „იკიგაი“.
იკიგაი ხანგრძლივი და ბედნიერი ცხოვრების იაპონური საიდუმლოა. ყველას სურს ბედნიერად და ხანგრძლივად ცხოვრება, მაგრამ როგორ მივაღწიოთ ამას? ამ შეკითხვაზე პასუხი მოცემულ წიგნში გელით.
