#აჩუქეწიგნი – ამ ჰეშთეგს სოციალურ ქსელებში დღეს უკვე მრავლად შეხვდებით. გამოწვევა ჯერ კიდევ 2019 წელს გიორგი კეკელიძის ინიციატივით დაიწყო და მალევე საზოგადოების დიდი ნაწილი მოიცვა. მისი ინსპირაცია კი გენიალური დრამატურგისა და პოეტის, უილიამ შეიქსპირის დაბადების და გარდაცვალების დღე, 23 აპრილი გახდა.
არსებული პანდემიის გამო უამრავმა ადამიანმა გასულ წელს ვერ შეძლო კამპანია #აჩუქეწიგნში ჩართვა, სწორედ ამიტომ გიორგი კეკელიძემ გადაწყვიტა, რომ აპრილის სრული თვე წიგნის ჩუქების თვე უნდა გამხდარიყო. თავად გიორგიმ აღნიშვნა საოკუპაციო ხაზთან მდებარე სოფლიდან „დიციდან“ დაიწყო, სადაც ბებიას და შვილიშვილს „ბიბლუსის“ და „ანაგრამას“ ხელშეწყობით სახლში ბიბლიოთეკა მოუწყო.
გიორგის მიერ წამოწყებულ აქტივობაში დღეს დღეობით უკვე უამრავი ადამიანია ჩართული, მათ შორის კი ქართველი ვარსკვლავები, მწერლები და სატელევიზიო წამყვანებიც კი არიან.
სოციალურ ქსელებში მრავლად შეხვდებით პოსტებსა და ფოტოებს ჰეშთეგით #აჩუქეწიგნი. მეგობრები და ოჯახის წევრები ერთმანეთს წიგნებს ჩუქნიან და ასე ერთგვარი ჯაჭვი წარმოიქმნება. ამ კამპანიას ჟურნალი OK! Magazine-ი და რადიო NRJ-იც შეუერთდა და აქტიურად უჭერს მხარეს.
კამპანიის პოპულარიზაციისთვის მნიშვნელოვანია წიგნების მაღაზიების და კერძო სექტორების აქტიური ჩართულობაც. დამსაქმებლებს ასევე შეუძლიათ თანამშრომლებს აჩუქონ წიგნები და ამ გზით გაზარდონ პროექტის მასშტაბები და ჩაერთონ კამპანიაში. აღსანიშნავია ის ფაქტიც, რომ მაღაზია „ბიბლუსმა“ წიგნები აქტიურ მხარდამჭერ კომპანიებს „გალფსა“ და „გორგიას“ გაუგზავნა. OK! კი როგორც ამ კამპანიის აქტიური მხარდამჭერი მოგიწოდებთ ჩაერთოთ ამ არაჩვეულებრივ გამოწვევაში, აჩუქოთ მეგობრებსა და ნათესავებს წიგნები.
შეგახსენებთ, რომ წიგნი ნებისმიერი ადამიანისთვის არაჩვეულებრივი საჩუქარია. ამ გამოწვევაში დიდი ჩართულობით კი შესაძლოა კამპანიამ ფართო მასშტაბის სახე მიიღოს და დაეხმაროს ისეთ ადამიანებს, რომლებსაც წიგნზე ხელმისაწვდომობა მეტნაკლებად შეზღუდული აქვთ.
