#OK!BusinessCelebrity – რატომ ვერ იქცა ვიქტორია ბექჰემის ბრენდი სტაბილურად მომგებიან ბიზნესად?

ვიქტორია ბექჰემის მოდის იმპერია Victoria Beckham Limited და Victoria Beckham Beauty კომერციული ზრდის შთამბეჭდავ ტემპს ინარჩუნებს — გაყიდვები სტაბილურად იზრდება, ბრენდის გავლენა ფართოვდება და პროდუქციის ასორტიმენტი უფრო მრავალფეროვანი ხდება. თუმცა, მიუხედავად პოზიტიური დინამიკისა, კომპანია კვლავ ფინანსური გამოწვევების წინაშე დგას და განვითარებისთვის დამატებით კაპიტალს საჭიროებს. 2024 წელს კომპანიის შემოსავალმა 26.5%-ით მოიმატა, თუმცა ვარსკვლავს £6.2 მილიონის საბანკო ვალდებულებები აქვს.

51 წლის ვიქტორია ბექჰემმა 2008 წელს მუსიკალური კარიერიდან — ლეგენდარული Spice Girls-ის წევრობიდან — სრულად მოდის ინდუსტრიაში გადასვლა გადაწყვიტა და საკუთარი ბრენდი Victoria Beckham Limited დაარსა. ვარსკვლავმა ყველაფერი მცირე მასშტაბით დაიწყო, ნიუ-იორკის მოდის კვირეულზე მხოლოდ 10 ლუქისგან შემდგარი კოლექცია წარადგინა, რადგან იმ პერიოდში საზოგადოებაში ხშირად ისმოდა კითხვა, რატომ უნდა შეექმნა პოპვარსკვლავს მოდის ბრენდი.

ვიქტორიამ სწორედ ამ დამოკიდებულების შეცვლა დაისახა მიზნად.

„როდესაც 18 წლის წინ ეს მოდის ბიზნესი დავიწყე, ინდუსტრიის შესახებ ბევრი არაფერი ვიცოდი. მეშინოდა. მეშინოდა, რადგან მოდა ჩემი უდიდესი სიყვარული და ოცნება იყო, მაგრამ ვიცოდი, რას ფიქრობდნენ ადამიანები – ‘ის პოპვარსკვლავი იყო. ფეხბურთელზეა დაქორწინებული. ვინ ჰგონია თავი?’“– ახსენა მან Netflix-ის დოკუმენტურ ფილმში.

2024 წელი ბრენდისთვის ზრდის ეტაპი აღმოჩნდა. კომპანიის შემოსავალმა 26.5%-ით მოიმატა და £112.7 მილიონს მიაღწია, რაც ზედიზედ მეოთხე წლიური ზრდაა. შედეგი დიდწილად განაპირობა ონლაინ გაყიდვების გაძლიერებამ, მომხმარებელთა ციფრულ პლატფორმებზე გადანაცვლებამ და ლონდონში მდებარე ფლაგმანური მაღაზიის წარმატებულმა მუშაობამ. განსაკუთრებით გამოკვეთილი აღმოჩნდა სილამაზის მიმართულება — Victoria Beckham Beauty-ის გაყიდვები 24%-ით გაიზარდა, რასაც ახალი პროდუქტების აქტიური გაშვება და ბრენდის მზარდი პოპულარობა დაეხმარა.

მიუხედავად ზრდისა, ფინანსური ანგარიშგება აჩვენებს, რომ მოგებამდე გზა ჯერ კიდევ რთულია. ზარალი 2024 წლისთვის £4.8 მილიონამდე გაიზარდა, მაშინ როცა 2023 წელს ეს მაჩვენებელი £2.9 მილიონს შეადგენდა. ეს ციფრები ხაზს უსვამს მოდის ინდუსტრიაში მაღალი ოპერაციული ხარჯებისა და ბრენდის განვითარების ეტაპზე არსებული ფინანსური წნეხის რეალობას.

ბიზნესის სტაბილურობის უზრუნველსაყოფად, კომპანიამ აქციონერთა დამატებითი მხარდაჭერა მიიღო. მიმდინარე წელს ვიქტორია ბექჰემის მეუღლემ, დევიდ ბექჰემმა, საინვესტიციო ფონდ Neo Investment Partners-თან ერთად კომპანიაში £6.2 მილიონი ჩადო. ეს ინვესტიცია ემატება 2023 წელს განხორციელებულ £6.9 მილიონიან ფინანსურ მხარდაჭერას, რაც ბოლო პერიოდში ჯამურად £13 მილიონზე მეტ კაპიტალს ნიშნავს. კომპანიის აქციონერთა შორის კვლავ რჩება ბრენდის დიდი ხნის პარტნიორი, მუსიკალური ინდუსტრიის გავლენიანი ფიგურა საიმონ ფულერიც.

Companies House-ში წარდგენილი ანგარიშის მიხედვით, კომპანიას კვლავ აქვს „მნიშვნელოვანი ფინანსური გაურკვევლობები“, რომლებიც მისი უწყვეტი საქმიანობის საკითხს გარკვეულ რისკთან აკავშირებს. 2025 წლის მონაცემებით საბანკო ვალი £6.2 მილიონს შეადგენს.

ამ ფონზე, კომპანიის სტრატეგია ორი მიმართულების დაბალანსებას ეფუძნება — ზრდასა და ხარჯების ოპტიმიზაციას. ახალი ინვესტიციები მიზნად ისახავს არა მხოლოდ ბრენდის გაფართოებას, არამედ გრძელვადიანი ფინანსური მდგრადობის შექმნას. მიმდინარეობს ოპერაციების გამარტივება, ეფექტიანობის ზრდა და რესურსების უფრო მიზნობრივი გადანაწილება.

CEO მარი ლებლანის ხელმძღვანელობით კომპანიამ უკვე გაატარა შიდა რესტრუქტურიზაცია: შემცირდა ოპერაციული ხარჯები, გაერთიანდა პროდუქციის ხაზები და გადაიხედა წარმოების სტრატეგია, რათა ბრენდმა სწრაფად უპასუხოს ბაზრის მოთხოვნებს და შეამციროს ზედმეტი დანახარჯები. ეს ნაბიჯები მიუთითებს, რომ Victoria Beckham-ის მოდის სახლი აქტიურად გადადის სტარტაპული ზრდის ეტაპიდან უფრო სტრუქტურირებულ, მომგებიან ბიზნეს მოდელზე.

2008 წელს დაარსების შემდეგ ბრენდი თითქმის ყოველწლიურად წამგებიანია, თუმცა ბოლო წლებში ფინანსური სურათი თანდათან უმჯობესდება. გაყიდვები იზრდება, ხოლო წმინდა ვალდებულებები £29.7 მილიონამდე შემცირდა — რაც წინა წელთან შედარებით თითქმის £10 მილიონით ნაკლებს შეადგენს.

მოდის ბიზნესის ფინანსური სირთულეების მიუხედავად, ვიქტორია და დევიდ ბექჰემები მსოფლიოში ერთ-ერთ ყველაზე წარმატებულ ბიზნეს-წყვილად რჩებიან. მათი საერთო ქონება დაახლოებით £500 მილიონად არის შეფასებული. დევიდ ბექჰემის სხვა კომერციული პროექტები მნიშვნელოვან შემოსავალს გენერირებს — 2022 წლიდან მან £28 მილიონი დივიდენდების სახით მიიღო, ხოლო იმავე წელს საკუთარი ბიზნესის 55%-იანი წილი დაახლოებით £200 მილიონად გაყიდა.