ბევრი ვიფიქრე და ვინერიულე, როგორ ჩამეწერა ინტერვიუ 16 წლის მოზარდთან. ყველაზე საინტერესო, რაც სალომესგან მენიშნა იყო ის, რომ მოსმენას ითხოვდა… ალბათ, მოსმენას საუბარიც მოსდევს და მერე დიალოგიც, რასაკვირველია… ჰოდა, მგონია, თუკი ჯანსაღი მსჯელობა იქნება მომავალ თაობასთან, ჩვენი ქვეყანა ყველა სირთულეს გადალახავს. უბრალოდ, სწორი აქცენტები სჭირდებათ მოზარდებს – ისტორია არის წარსული, რომელიც ქმნის მომავალს და ამის გარეშე საქართველო ვერ იარსებებს. ეს ყველამ უნდა გაიაზროს და ამაზე ბევრი უნდა ვისაუბროთ ახალ თაობასთან. ბევრმა მათგანმა, Z-ის თაობიდან, საერთოდ არ იცის, რა მოიტანა წარსულმა გამოცდილებამ და რა ჯოჯოხეთი გაიარა ჩემმა თაობამ ზუსტად იმ ასაკში, რამდენი წლისაც ახლა სალომეა, იმ თავისუფლებისა და სიმშვიდის სანაცვლოდ, როცა ჯანსაღი პროტესტი აღარ ისჯება – დემოკრატიაც ხომ სწორედ ესაა. უახლესი ისტორიის ფეხდაფეხ ბევრი რამის გააზრებაა საჭირო ამ თაობისთვის, იმისთვის, რომ სამართლიანი, ღირსეული საქართველო ააშენონ, რომლის კულტურაც, მსოფლმხედველობაც და მიზანიც ყოველთვის იყო, არის და იქნება ევროპა. ისტორიის ცოდნა, ყველაფერზე თავისი სახელის დარქმევა, დიალოგი და არგუმენტირებული მსჯელობა არის ის გამოსავალი, რაც ჩვენს ქვეყანას სუნთქვის საშუალებას მისცემს… მაშ ასე, მარტის აქციების მთავარი გმირი – საქართველოს ორგზის ჩემპიონი ტაეკვანდოში – სალომე კენჭიაშვილი – დიდი მიზნებითა და ოცნებებით, OK!-ის აპრილის ნომერში.
სალომე, რატომ ტაეკვანდო?
აი, ყველა ბავშვს ხომ აქვს სურვილი, ჩაკეტილ ოთახში შეაღწიოს და ნახოს, იქ რა ხდება. ზუსტად ასეთი იყო ერთი ოთახი ჩემს სკოლაში, სადაც შესვლა სულ მაინტერესებდა. ერთ დღესაც კარი ღია დამხვდა და ასე დაიწყო სპორტის ამ სახეობასთან ჩემი დაახლოება. ვერც კი წარმომედგინა, თუ საქართველოს ორგზის ჩემპიონი გავხდებოდი და ევროპის ჩემპიონატისთვის დავიწყებდი მზადებას. მაგრამ ვირწმუნე, რომ თუკი მოინდომებ, ყველაფერი შესაძლებელი ხდება.
ჯერ მხოლოდ 16 წლის ხარ და პროფესიის არჩევის დროს სად წარმოგიდგენია შენი თავი?
სპორტი ჩემს ცხოვრებაში ყოველთვის იქნება. ძალიან მინდა კულინარიის მიმართულებით განვვითარდე – მაინტერესებს ეს სფერო და კარგადაც ვამზადებ. ალბათ, უფრო პროფესიონალურად შევისწავლი ამ საქმეს მომავალში…
რომ გკითხო, რა არის შენთვის სამშობლო-მეთქი, რას მიპასუხებ?
არასდროს არსად არ და ვერ წავალ. ეს არის ის ადგილი, სადაც გავჩნდი, გავიზარდე და ყველა ემოცია ამ ქვეყანას უკავშირდება.
როგორ საქართველოზე ოცნებობ?
სადაც გაჭირვება არ იქნება… ყველა ბავშვს უნდა ჰქონდეს სრულფასოვანი ცხოვრების უფლება.
რა იქნებოდა სამი რამ, რითაც შენს ქვეყანას უცხოელებს გააცნობდი?
ძალიან ლამაზია საქართველო. აქ ადამიანებმა საოცარი თანადგომა იციან. ალბათ, სტუმარმასპინძლობაა ის, რაც ასე იზიდავს ყველას ჩვენს ქვეყანაში, მეც ამაზე გავამახვილებდი ყურადღებას.
თავისუფლება როგორ გესმის?
ჩვენი თაობისთვის ყველაზე მნიშვნელოვანია, რომ ჩვენი ხმა ესმოდეთ და გვისმენდნენ. თავისუფლება, ალბათ, თანასწორობა და თანადგომაა…
ევროპა – როგორ ფიქრობ, რა არის მთავარი ევროპული ფასეულობა?
ევროპაში ნამყოფი არ ვარ, მაგრამ რასაც შორიდან ვხედავ, არის ადამიანის უფლებებზე ზრუნვა და სახელმწიფოს მიერ ფინანსურად შეჭირვებული ადამიანების გვერდში დგომა.
რა არის ის თვისება, რასაც ყველაზე მეტად აფასებ ადამიანში?
სამართლიანობა.
სად და როგორ წარმოგიდგენია შენი თავი ათი წლის შემდეგ?
რატომღაც, ისევ სპორტში… მაგ დროს უფრო მომზადებული ვიქნები სხვადასხვა ჩემპიონატისთვის.
შენი თაობის დახასიათება ერთი-ორი სიტყვით რომ შეგეძლოს, როგორ დაახასიათებდი?
ლამაზი თაობა…
დაბოლოს, რას ეტყოდი შენს თაობას?
არასდროს თქვათ უარი თქვენს ოცნებებზე. ყველაფრის მიღწევა შეიძლება მონდომებით, შრომითა და მოთმინებით.
ფოტო: მაკა მეგრელიძე
პროექტის ავტორი: ნიკა გომართელი
ვიზაჟი: სოფია საენკო
ჩაცმულობა: Bershka
ტექსტი: მარიამ გაბედავა
ლოკაცია: IQ Studio
