მომხმარებელი აუცილებლად გამოგიცხადებს ნდობას, თუ ის იგრძნობს, რომ მისთვის გულწრფელი მასპინძელი ხარ, – გვითხრა რესტორან „შეფპოინტის“ მენეჯერმა, ნინო ქათამაძემ. მისი აზრით, მათი მყუდრო სივრცე სწორედ ის ადგილია, სადაც ადამიანებს დაუვიწყარი შთაბეჭდილებების მიღება შეუძლიათ.
რესტორანი „შეფპოინტი“ პოპულარობით სარგებლობს მომხმარებელში. როგორ შეძელით მცირე დროში თავის დამკვიდრება?
პირველ რიგში, ჩემთვის, როგორც ამ რესტორნის მენეჯერისა და ჩემი გუნდისთვის, სასიამოვნო მოსასმენია, რომ საზოგადოებაში პოპულარობით ვსარგებლობთ, მიუხედავად იმისა, რომ სულ რაღაც ორ წელზე მეტია ვართ ბაზარზე. მადლიერება მინდა გამოვხატო ყველა ერთგული მომხმარებლის მიმართ. მინდა აღვნიშნო, საქმე, რომელსაც გულით მიუდგები, არ არსებობს, რომ არ გამოვიდეს. უნდა გიყვარდეს ის, რასაც აკეთებ. ქართველებს „მარიფათობა“ გენში გვაქვს, რომელიც ამ სფეროში, ვფიქრობ, პირველია.
ჩვენ, ლამაზ ინტერიერთან ერთად, გვაქვს საკმაოდ მრავალფეროვანი და გემრიელი კერძები. მომხმარებელს ვთავაზობთ ქართულ და ევროპულ სამზარეულოს.
რაც შეეხება კონკურენციას, მთავარია იყო ბეჯითი, მიზანმიმართული, იშრომო სწორად და შედეგი აუცილებლად იქნება.
რატომ უნდა გავაკეთოთ არჩევანი „შეფპოინტზე“, რა ხდის მას გამორჩეულს სხვა სივრცეებისგან?
ვფიქრობ, ყველა რესურსი გაგვაჩნია იმისთვის, რომ ჩვენთან მობრძანებულ სტუმარს მაქსიმალური კომფორტი შევუქმნათ.
ამ პატარა და მყუდრო სივრცეში გვაქვს საბავშვო კუთხეც. მშობლებს, რომლებსაც სურთ გარემოს შეცვლა, გემრიელად სადილობა, „შეფპოინტი“ აძლევს ამის საშუალებას. ასევე გვაქვს ცოცხალი მუსიკა, საბანკეტო სივრცე, სადაც უამრავი ლამაზი საღამო ჩატარებულა.
განსაკუთრებით რომელი კერძის დაგემოვნებას ურჩევთ თქვენთან მოსულ სტუმრებს?
ხშირად ვთანამშრომლობთ ტურისტულ კომპანიებთან და ვმასპინძლობთ ევროპიდან ჩამოსულ სტუმრებსაც, გვაქვს კარგი ღვინის და ბარის სასმელების არჩევანი, რომლებსაც ჩვენი მოქალექეები სიამოვნებით მიირთმევენ.
კერძებში, რაც არ უნდა კულინარიული აღზევება გვქონდეს, ქართველებისთვის მაინც პრიორიტეტად ხინკალი და აჭარული ხაჭაპური რჩება.
როგორია სირთულეების დაძლევის თქვენეული ფორმულა?
სირთულე ახლავს ყველა საქმეს. როცა კვებას და კვების ობიექტს ეხება საქმე, აქ განსაკუთრებული სიფრთხილე და ხარისხის მუდმივი კონტროლია საჭირო. ისეთი სფეროა, შეცდომას არავინ გაპატიებს. ამავდროულად, ყოველთვის ვინტერესდები ჩემი მომხმარებლის შეფასებებით. არ შეიძლება მუდმივად კმაყოფილი იყოს სტუმარი, მას აუცილებლად ექნება რაღაც შენიშვნა. ამიტომ მაქსიმალურად ვცდილობ ამ შენიშვნებზე ვიყო ორიენტირებული, რათა უფრო დავიხვეწოთ.
კონკურენცია, ვფიქრობ, კარგი სტიმულია, მუდმივად განვითარებისკენ გიბიძგებს…
მოგვიყევით „შეფპოინტის“ სამომავლო გეგმებზე, სიახლეებზე, რომელსაც საზოგადოებას შესთავაზებთ…
ეტაპობრივად ვვითარდებით. ორიენტირებული ვართ მომხმარებლის მოთხოვნებზე, შემდეგ ეს ყველაფერი მუშავდება ჩვენი გუნდის მიერ, რათა ჩვენთან მოსულ სტუმრებს გამართული სერვისი შევთავაზოთ. ხშირადაა მოთხოვნა, გავხდეთ ქსელური, რასაც სამომავლოდ არ გამოვრიცხავ. მინდა „შეფპოინტში“ მოსულმა თითოეულმა ადამიანმა თავი კომფორტულად იგრძნოს, ჩვენი გუნდი ყველაფერს აკეთებს ამისთვის და ვფიქრობ, ამ მცირე დროში სწორედ ამიტომაც მოვიპოვეთ ადამიანების ნდობა.
