თბილისში, “რუსთაველის თეატრში” რუსეთის თეატრალური ხელოვნების ინსტიტუტის სტუდენტებმა „Победа 81”-ის ფარგლებში საზეიმო წარმოდგენა გამართეს, რომლის ფარგლებშიც „კატიუშა” და სხვა მელოდიები შეასრულეს.
“14 მაისს შოთა რუსთაველის სახელობის საქართველოს სახელმწიფო აკადემიური თეატრის სცენაზე დიდი წარმატებით გაიმართა კონცერტი, რომელიც დიდი გამარჯვების 81-ე წლისთავს მიეძღვნა. რუსეთის თეატრალური ხელოვნების ინსტიტუტის (ГИТИС) დამამთავრებელი კურსის სტუდენტებმა წარმოადგინეს ნათელი მუსიკალური და ქორეოგრაფიული კომპოზიციები ომის წლების სიმღერებზე. ლეგენდარულმა მელოდიებმა, როგორიცაა “კატიუშა”, “ბნელი ღამე” და “ლურჯი ცხვირსახოცი” მაყურებლის გულებში ყველაზე ცოცხალი გამოხმაურება ჰპოვა.
მუსიკალური ნომრების გარდა, მსახიობები ღრმა განცდით კითხულობდნენ იმ დიდი ეპოქის პოეტებისა და მწერლების, კონსტანტინ სიმონოვის, ალექსანდრ ტვარდოვსკის, ასევე რობერტ როჟდესტვენსკისა და ვლადიმირ ვისოცკის, უკვდავ სტრიქონებს. საღამოს სტუმრები, დიპლომატიური კორპუსის, საქმიანი და სამეცნიერო წრეების, საზოგადოებრივი და კულტურული ორგანიზაციების წარმომადგენლები, ასევე რუსი თანამემამულეები, თითოეულ გამოსვლას აპლოდისმენტებით აცილებდნენ. ჩვენი საერთო ისტორიის გმირული ფურცლების, დიდი სამამულო ომის შესახებ წმინდა პოეტური მოგონებები სამუდამოდ დარჩება რუსეთისა და საქართველოს ხალხების გულებში” – წერია გავრცელებულ ინფორმაციაში.
ჩატარებული ღონისძიების შესახებ ინფორმაცია საქართველოში შვეიცარიის საელჩოში რუსეთის ინტერესების სექციამ გაავრცელა:
“დიდი სამამულო ომის შესახებ წმინდა პოეტური მოგონებები სამუდამოდ დარჩება რუსეთისა და საქართველოს ხალხების გულებში”
რუსთაველის თეატრის დირექტორმა, გია თევზაძემ ,,tv პირველთან” ინტერვიუ განაცხადა, რომ სცენის დათმობის სანაცვლოდ, თეატრის ადმინისტრაციამ ფული აიღო:
“ჩვენ იჯარით მივეცით დარბაზი, მაქსიმალური თანხა ავიღეთ, იქ ისეთი არაფერი არ იყო, სტუდენტები იყვნენ ГИТИС-ის. ჩვენ არავინ დაგვიკარგავს ამ ომში? (მეორე მსოფლიო ომში)… ჩვენ ყველაზე მეტი დავკარგეთ ამ ომში. რა საკვირველია, კიდევ რომ დასჭირდეთ, თეატრის დარბაზს კიდევ მივაქირავებთ ფულის გამო”
როგორც რუსთაველის თეატრის ადმინისტრაციამ ჩვენთან საუბარში განმარტა დარბაზის დაჯავშნა შესაძლოა მოხდეს როგორც 1 კვირით ისე 3 თვით ადრე, ღირებულება დარბაზების მიხედვით იცვლება და თეატრი წინასწარ უნდა იყოს ინფორმირებული, თუ რა ტიპის ღონისძიება ჩატარდება:
,,გააჩნია როდის და რომელი დარბაზი უნდა დაიჯავშნოს. შეგვიძლია 1 კვირით ადრე ან 3 თვით ადრეც დაჯავშვნა, გააჩნია როდის, რომელ სეზონზე და ა.შ.
დიდი დარბაზი 29 000 ლარი ღირს, მცირე 10 000 ლარი, ექსპერიმენტული 5 500 ლარი და კიდევ სხვა სივრცეებიც გვაქვს, გააჩნია რა ღონისძიება ტარდება.
რა თქმა უნდა ინფორმირებულები უნდა ვიყოთ რა ტარდება, როგორ ტარდება, რა მიზნით – სპექტაკლია, ღონისძიებაა, კონცერტია – შინაარსიც აწი გვაინტერესებს.”
ამ ინფორმაციის მიხედვით, რუსეთის თეატრალური ხელოვნების ინსტიტუტმა მცირე სცენის დასაქირავებლად 10 000 ლარი გადაიხადეს, თეატრი კი ინფორმირებული იყო, თუ რა ტიპის ღონისძიება იმართებოდა.
