იტალიური მოდის სახლი Prada ახალ პროექტში ყურადღებას ტრადიციულ ინდურ ხელობას უთმობს. ბრენდმა წარმოადგინა ლიმიტირებული სანდლების კოლექცია, რომელიც შთაგონებულია ინდური კულტურის ერთ-ერთი ყველაზე ცნობილი ხელნაკეთი ფეხსაცმლით – Kolhapuri Chappals-ით.
კოლექცია სრულად ინდოეთში, მაჰარაშტრასა და კარნატაკას რეგიონების ოსტატების მიერ დამზადდა. Prada-მ ტრადიციული ტექნიკა საკუთარ თანამედროვე დიზაინთან და პრემიუმ მასალებთან გააერთიანა, რითაც შექმნა დიალოგი ისტორიულ მემკვიდრეობასა და თანამედროვე ლუქს მოდას შორის.
ლიმიტირებული კოლექცია მოიცავს სანდლებს, რომლებიც ეფუძნება Kolhapuri Chappals-ის კლასიკურ ფორმებს – ხელით დამუშავებულ ტყავს, T-strap სილუეტს და ტრადიციულ კონსტრუქციას. გამოყენებულია მაღალი ხარისხის ტყავი და თანამედროვე ტექნოლოგიები, ტრადიციული დიზაინი გადაკეთდა თანამედროვე ფორმებად და რაც მთავარია, კოლექცია აერთიანებს ისტორიულ ხელობასა და თანამედროვე მოდის ესთეტიკას.
ბრენდის განცხადებით, მიზანი მხოლოდ ახალი პროდუქტის შექმნა არ ყოფილა – პროექტი კულტურული თანამშრომლობის იდეაზეა აგებული.
პროექტის მნიშვნელოვანი ნაწილი გახდა საგანმანათლებლო პროგრამა, რომელიც სრულად Prada Group-ის მიერ ფინანსდება. პროგრამა განხორციელდება ლიმიტირებული სანდლების გაყიდვიდან მიღებული შემოსავლების მხარდაჭერითაც.
სამწლიანი ინიციატივა მოიცავს:
- 180 ხელოსანს, ასაკით 18-დან 45 წლამდე;
- ექვსთვიან სასწავლო მოდულებს;
- დიზაინის, ტექნიკური და ციფრული უნარების განვითარებას;
- ბაზრის თანამედროვე მოთხოვნებთან ადაპტაციის სწავლას.
პროგრამა შეიქმნა სახელმწიფო ორგანიზაციებთან – LIDCOM და LIDKAR – ასევე წამყვან სასწავლო დაწესებულებებთან თანამშრომლობით, მათ შორის National Institute of Fashion Technology (NIFT)-თან და Karnataka Institute of Leather & Fashion Technology (KILT)-თან.
საუკეთესო მონაწილეებს შესაძლებლობა ექნებათ სწავლა Prada Group Academy-ში, იტალიაში გააგრძელონ.
Kolhapuri Chappals ინდური ხელნაკეთი ფეხსაცმელია, რომლის ისტორია XIII საუკუნემდე მიდის. თაობიდან თაობამდე გადაცემული ტექნიკით შექმნილი სანდლები საუკუნეების განმავლობაში ყოველდღიური ცხოვრების ნაწილად რჩებოდა – მეფეებიდან ვაჭრებამდე და ადგილობრივი საზოგადოებების კულტურულ სიმბოლოდ ჩამოყალიბდა.
დღესაც მათი ფორმები ძველ სკულპტურებსა და ფერწერულ ნამუშევრებში ჩანს.
თანამედროვე ვერსიებში ტრადიციული მოდელი განვითარდა:
- გაჩნდა ახალი ფერები,
- მსუბუქი მასალები,
- თანამედროვე ძირები,
- ახალი ვიზუალები ქალებისთვის – ქუსლიანი ან დახურული მოდელები.
2019 წელს Kolhapuri Chappals-მა Geographical Indication (GI) სტატუსი მიიღო, რაც მის წარმოშობასა და ხელობის ავთენტურობას იცავს.
ბრენდის თქმით, თითოეული სანდალი წარმოადგენს ხიდს წარსულსა და მომავალს შორის – ისტორიას, ინოვაციასა და ადამიანურ ხელობას შორის არსებულ კავშირს.
