„ყოველთვის იმას იღებ ცხოვრებისგან, რისი მოთხოვნის გამბედაობაც გყოფნის, ამიტომ ნურასოდეს შეგეშინდება მოითხოვო მეტი“ – გვირჩევს ქალი, რომელმაც საკუთარ ტკივილზე გაიმარჯვა და არაფრისგან მედია იმპერია შექმნა.
ქალი, რომელიც ბარაკ ობამამ აშშ-ის ყველაზე საპატიო, საპრეზიდენტო მედლით დააჯილდოვა სოფელში, ბებიასთან გაიზარდა. 9 წლის იყო, როცა მასზე 19 წლის ბიძაშვილმა იძალადა, ხოლო 14 წლის ასაკში დაორსულდა და შვილი დაკარგა. რთული და ტკივილით სავსე ცხოვრების მიუხედავად, ოპრა უინფრი პირველი შავკანიანი ქალი გახდა, რომელმაც მილიარდიანი ქონება საკუთარი შრომით, დამოუკიდებლად შექმნა.
ოპრა უინფრი 1954 წელს, ბაპტისტთა ოჯახში დაიბადა. დედამისი მოახლე იყო, მამა – მაღაროელი. ისინი დაქორწინებულნი არ ყოფილან და არც ბავშვის აღზრდისთვის საკმარისი ფული ჰქონდათ. ასე აღმოჩნდა ახალშობილი მისისიპის შტატის ერთ-ერთ მიყრუებულ სოფელში ბებიასთან, რომელსაც ბავშვის გაზრდა მარტოდმარტო მოუწია.
ბებია ცდილობდა გოგონა სწორად აღეზარდა და მავნე ჩვევებისგან დაეცვა. მისი დამსახურებით ოპრამ წერა – კითხვა ადრეულ ასაკში ისწავლა. 2 წლის და 6 თვის იყო, როცა ეკლესიაში სააღდგომო მიმართვა ზეპირად მოჰყვა.
ოპრამ ბავშვობის ყველაზე ბედნიერი წლები სოფელში, ბებიასთან გაატარა. სირთულეები 6 წლის ასაკში დაიწყო, დედასთან, ქალაქში დაბრუნების შემდეგ. 9 წლის იყო, როცა ბიძაშვილებმა გააუპატიურეს, შემდეგ ნარკოტიკებს მიეჩვია და 13 წლის სახლიდან გაიქცა.
გოგონა სულ რაღაც 14 წლის იყო, როცა დაორსულდა და ბავშვი გააჩინა, თუმცა ახალშობილი მალევე გარდაიცვალა. ამის შემდეგ დედამ ურჩი შვილი ნეშვილში, მამასთან გაგზავნა. ამ დღიდან ოპრასთვის ახალი ცხოვრება დაიწყო. მამა მკაცრი და აკადემიური ადამიანი იყო და ცდილობდა გოგონასთვის საუკეთესო განათლება მიეცა. რთული ცხოვრების მიუხედავად, ოპრა უინფრი სკოლაში ერთ-ერთ საუკეთესო მოსწავლე გახდა. ის ორატორული უნარებითა და გამორჩეული აზროვნებით გამოირჩეოდა, ამიტომ არავის გაკვირვებია, როცა 1971 წელს ტენესის შტატის უნივერსიტეტში ჩააბარა. 18 წლის ოპრამ უინერსიტეტში თეატრალიზებულ სილამაზის კონკურსში გაიმარჯვა, რომელშიც მხოლოდ შავკანიანი გოგონები მონაწილეობდნენ.
19 წლის ასაკში ის ამერიკული ტელეარხის, CBS-ის ახალი ამბების პირველი აფროამერიკელი წამყვანი გახდა. გოგონას კარიერა თავბრუდამხვევი სისწრაფით ვითარდებოდა. 1984 წლის იანვარში ის საცხოვრებლად ჩიკაგოში გადავიდა და დილის თოქ-შოუს A.M. Chicago-ს წამყვანად დაინიშნა. 1986 წელს ქალმა საკუთარი პროგრამა „ოპრა უინფრის შოუ“ შექმნა, რომელმაც არა მხოლოდ სახელი გაუთქვა, არამედ ძალიან მდიდარ და გავლენიან ქალად აქცია.
შოუ, რომელიც 100-ზე მეტ ქვეყანაში გადაიცემოდა, 2011 წლამდე გაგრძელდა, რის შემდეგაც ოპრამ ჩიკაგოში, საკუთარი კინოკომპანიის შექმნა გადაწყვიტა. აღსანიშნავია, რომ მისი კომპანიის თითქმის მთელი პერსონალი ქალებისგან შედგება.
2015 წელს Forbes-მა ოპრა უინფრი მსოფლიოს ერთ-ერთ ყველაზე გავლენიან ქალად დაასახელა, 2017 წელს უკვე შოუბიზნესის ცნობილი ფიგურა გახდა, 2010 და 2013 წლებში გავლენიან ვარსკვლავად აღიარეს. მსგავსი სტატუსებით დააჯილდოვეს ისეთმა მედიაგიგანტებმაც, როგორიცაა CNN და Time.
დონალდ ტრამპი, მაიკლ ჯექსონი, მაიკ ტაისონი და სხვა ცნობილი ადამიანები ოპრას საკუთარ საიდუმლოს ანდობდნენ, მის სიტყვას არჩევნების შედეგების შეცვლაც კი შეეძლო. სწორედ ასე მოხდა 2008 წელს, როცა ამერიკის პრეზიდენტის პირველად არჩევნებში ბარაქ ობამამ ოპრას დახმარებით 1,6 მილიონი ხმა მოიპოვა.
ოპრას დაახლოებით მილიარდი დოლარი აქვს დახარჯული ქველმოქმედებაზე, თუმცა ყველაზე მეტად თავისი მაყურებლის დასაჩუქრება უყვარს – ერთ-ერთი გადაცემის დასრულებისას 300 – მა მაყურებელმა მისგან სრულიად მოულოდნელად საჩუქრად Pontiac-ის ავტომობილი მიიღო.
ოპრა პირად ცხოვრებაზე საჯაროდ არასოდეს საუბრობს. ცნობილია, რომ შვილის გარდაცვალების შემდეგ ის აღარასდროს გამხდარა დედა. თითქმის 30 წელია, თავის რჩეულთან სტედმან გრეჰემთან სამოქალაქო ქორწინებაშია.
