5 წელი შესრულდება მალე, რაც ჟურნალ OK!-ის მთავარი რედაქტორი გახლავართ. დღეს კი ჩემი ბოლო სვეტი უნდა დავწერო და დავემშვიდობო ერთგულ მკითხველს. მიუხედავად იმისა, რომ ძალიან მიყვარხართ და ყოველთვის ვგრძნობ თქვენს სიყვარულსა და თანადგომას, ამ ნაბიჯის გადადგმა მაინც მომიწია, რადგან როგორც ყველაფერი დანარჩენი მთავრდება, ეს ეტაპიც დასრულდა − ძალიან ლამაზი, საყვარელი დღეები, სავსე ერთმანეთზე საინტერესო ადამიანებით, შეკრებებით, ახალი გამოცდილებით, ურთიერთობებით… ჟურნალ OK!-ისთან მაკავშირებს ძალიან ბევრი ემოცია, საუკეთესო შთაბეჭდილებები და მოგონებები. დიდი მადლობელი ვარ ყოველივე ამის. მადლობელი ვარ თქვენი − ჩვენი ძვირფასი მკითხველის. მადლობელი ვარ ჟურნალის არაჩვეულებრივი გუნდის − მათი მხარდაჭერა და სიყვარული დიდხანს გამყვება.
სანამ დაგემშვიდობებით, ჩემში წლების განმავლობაში დაგროვილი რამდენიმე წინადადება მინდა დაგიტოვოთ, როგორც აქ, ამ ფურცლებზე ნათქვამი ბოლო სიტყვები.
- რაც უნდა განიზრახოთ, თუკი საკუთარ გულს დაუჯერებთ და სულს მოუსმენთ, ყველაფერი გამოგივათ.
2. არ არსებობს პრობლემა, რომლის მოგვარება შეუძლებელია.
- თუ გადაიღლებით, მოიწყენთ და გადაწყვეტთ, რომ ცხოვრება ცუდად მოგექცათ, გაიხსენეთ ადამიანები, რომლებმაც ცხოვრება თავიდან დაიწყეს, რომლებიც ხელახლა დაიბადნენ. ნებისმიერ ასეთ სიტუაციაში გაიხსენეთ ნიკა წულუკიძე, რომელიც 26 მაისს დაუბრუნდა ეთერს…
- აუცილებლად შეიმუშავეთ სისტემა, რომელიც გადაგარჩენთ ზედმეტობისგან − ზედმეტი წონისგან, ზედმეტი სტრესისგან, მატერიალიზმისგან, ნებისმიერი დამოკიდებულებისგან. სისტემას იმიტომ ვწერ, რომ ვიცი − თუ არა ვიქნებით სისტემურები, გაგვიჭირდება დიდი მიზნების მიღწევა.
- ერთადერთი დამოკიდებულება, რაც ამართლებს − სიყვარულია. გაეცით ბევრი სიყვარული და იმავეს მიიღებთ, ეს აუცილებლად მოხდება − დღეს თუ არა, ხვალ მაინც.
- გამოხატეთ მადლიერება. ყოველი დღისთვის იყავით მადლიერი. მადლიერება ბედნიერებაა, რადგან არაფერი ხდება შემთხვევით, რასაც ცხოვრება გვაძლევს − ყველაფერს აქვს თავის მიზეზი და ყველაფერს აქვს დრო. კარგ წუთებში თუ მადლიერი არ ხარ, ყველაფერი აზრს კარგავს. მადლიერება გვეხმარება შევირგოთ ჩვენი ბედნიერება, დავაფასოთ ცხოვრება.
- ივარჯიშეთ, მიიღეთ ბევრი წყალი, გაიღვიძეთ ადრე და ხანდახან უყურეთ, რა ლამაზად ამოდის მზე; წაიკითხეთ კარგი წიგნები, უყურეთ კარგ ფილმებს, შეძლებისდაგვარად მოინახულეთ საინტერესო და ლამაზი ადგილები. თუ ვინმე გასაჭირშია, ნუ შეაქცევთ ზურგს. გაიგეთ მიზეზი და დაეხმარეთ, რითაც შეძლებთ.
- სწორი კვებაც მნიშვნელოვანია. კარგი საჭმელი მეტ ენერგიას გვაძლევს, სიცოცხლეს გვიხანგრძლივებს და გვაახალგაზრდავებს. შემთხვევითი არაა, ამდენს რომ საუბრობენ სწორ კვებაზე.
- ნუ მოძებნით ადამიანებში ცუდს. ეძებეთ მათში კარგი და ამ კარგის გამო შეიყვარეთ. გაუგეთ სხვებს − ნუ იქნებით მორალისტები.
- ცვლილება პერიოდულად აუცილებელია. როდესაც რაღაც იცვლება, ეს ყოველთვის ხდება უკეთესობისთვის და უკეთესობისკენ. წლებთან ერთად იმატებს სიბრძნეც. თუ ოდესმე ვერ მიხვდით რატომ ვერ მიიღეთ დღეს, რაც გინდოდათ, მიანდვეთ ეს ამოცანა წლებს. წლების მერე პასუხი მოვა და თქვენ ის გაგაოცებთ.
- მოთმინება ერთ-ერთი მთავარი „ოქროს საბადოა“, რომელსაც გამოვიმუშავებთ. ხანდახან მოთმინებას იმაზე მეტი შეუძლია, ვიდრე ეს ოდესმე შეიძლება წარმოვიდგინოთ. ამიტომ თუ ძალიან გვეჩქარება რაიმეს გაგება და ეს ჩვენამდე ვერ მოდის, სჯობს ყურადღება სხვა საქმეზე გადავიტანოთ…
- დედას, მამას, ქმარს, შვილს, ცოლს − ყოველდღე უთხარით, რომ გიყვართ. ეს ბოლო, ვფიქრობ, ძალიან მნიშვნელოვანი პუნქტია.
სიყვარულით,
ნინო ჯიბლაძე
ჟურნალ OK!-ის მთავარი რედაქტორი
