1 მაისისთვის ჩვენი ჟურნალის მთავარი თემა დავუთმეთ საკითხს, რომელიც ძალიან ყურადსაღებად და საგანგაშოდ მივიჩნიეთ OK!-ის რედაქციამ. შეანელე სვლა, იარე ნელა, იყავი ფრთხილად, გაუფრთხილდი საკუთარ თუ სხვის სიცოცხლეს. თითო ტკივილი, ყოველი სტრესი − ხანდახან ისე ხდება, რომ ჩვენი უყურადღებობით, ჩვენი უაზრო საქციელით შესაძლოა დავანგრიოთ სხვისი სიცოცხლე. არა მხოლოდ დავანგრიოთ, არამედ შესაძლოა შევიწიროთ კიდეც სხვისი სიცოცხლე.
პროექტი „შეანელე სვლა“, პატარა დათის გამო უფრო აქტუალური გახდა. დათის, რომელიც აუღელვებლად ელოდებოდა სკოლის ავტობუსს, როცა მას უჩვეულო მანევრის გაკეთების დროს მსუბუქი მანქანა დაეჯახა და უბედურება დატრიალდა… მისი ცხოვრება დღეს რადიკალურად შეიცვალა, ისევე, როგორც მთელი მისი ოჯახის; ისევე, როგორც იმ ადამიანის, რომელმაც ჩაიდინა ეს დანაშაული − დიახ, რაოდენ სავალალოდაც უნდა ჟღერდეს, სწორედ დანაშაულია, როცა შენს გადამეტებულ თვითდაჯერებულობას ან გართობის ასეთ ფორმას, ადამიანის, ბავშვის კიდური ეწირება. რამდენი სიცოცხლე შეუწირავს სწრაფად, უაზროდ მიმართულებადაკარგულ მოძრაობას მანქანით. მძღოლების პასუხისმგებლობის არქონა, მათი მიამიტური მიდგომა − რომ ჰოიდა მართვა ბავშვობიდან იცის, მას რა უნდა დაემართოს, სიცოცხლეში ავარია არ გაუკეთებია − ხშირად გამხდარა სხვა ადამიანის დაღუპვის მიზეზი. ბოლო დროს გატარებულმა უსაფრთხოების გამკაცრებულმა ზომებმა, ცნობიერების ამაღლების კამპანიებმა, თითქოს შეანელა პროცესი, მაგრამ ეს სულაც არ კმარა.
ჩვენი, ყველას ვალია, ვიგრძნოთ ეს პასუხისმგებლობა − ვმართოთ ავტომობილი ისე, რომ ჩვენი უყურადღებობა არ გახდეს სხვისი ცხოვრების შეცვლის მიზეზი. ყველა ჩვენგანი უნდა მოეკიდოს მანქანის მართვას სიფრთხილით! რამდენჯერ ხდება, როდესაც ტელეფონი გვიჭირავს და ისე ვმართავთ ავტომობილს. ზუსტად ასეთი ნიუანსებია საფრთხილო. დავფიქრდეთ, სანამ SMS-ს გავგზავნით, ან YouTube-ზე საყვარელ სიმღერას დავძებნით − საჭესთან ტელეფონში ინტერაქციამ შესაძლოა სხვისი ცხოვრება შეიწიროს, ან ჩვენი სამუდამოდ დაანგრიოს.
ამიტომ მინდა ჩამოვწერო ყველა ის შეგონება თუ ფრაზა, რომელიც შეგვაჩერებს, რომელიც იმოქმედებს, რომელსაც ექნება ჩვენზე გავლენა:
„შეანელე სვლა“
„იარე ნელა“
„არ იურთიერთო ტელეფონთან, თუ სასწრაფოა, გააჩერე და ისე ნახე შეტყობინება“
„თუ არ გრძნობ თავს კარგად, ნუ დაჯდები საჭესთან“
„არასოდეს დაჯდე საჭესთან არაფხიზელ მდგომარეობაში“
„გაუფრთხილდი სხვას, გაუფრთხილდი საკუთარ თავს“…
სიყვარულით,
ნინო ჯიბლაძე
ჟურნალ OK!-ის მთავარი რედაქტორი
