ჟურნალიOK! Decor Book-ის მოწვეულ რედაქტორს − მაიკო ჯიმშელეიშვილს წარმოგიდგენთ. როგორც თავად ამბობს, აქამდე ჟურნალზე მუშაობის გამოცდილება არ ჰქონია, თუმცა მინდა გითხრათ, რომ ჩვენს მკითხველს ძალიან მრავალფეროვანი ნომერი წარუდგინა, სადაც არაერთ საინტერესო თემას წააწყდებით. მანამდე კი აუცილებლად გაეცანით ინტერვიუს.
თქვენ ხართ OK! Decor Book-ის მოწვეული რედაქტორი. გქონიათ თუ არა აქამდე მსგავსი გამოცდილება?
ჟურნალზე მუშაობა, მით უფრო რედაქტორის ამპლუაში, საკმაოდ სერიოზული გამოწვევა აღმოჩნდა ჩემთვის, რადგან მსგავსი გამოცდილება აქამდე არასოდეს მქონია. ჩემგან სრულიად განსხვავებული სფეროა და თავდაპირველად ცოტას ვღელავდი, თუმცა ძალიან საინტერესოდ წარიმართა მუშაობის პროცესი. ვეცადეთ მკითხველისთვის შეგვეთავაზებინა ისეთი თემები, რაც მათ დააინტერესებდა და სასიამოვნო ასოციაციებს გაუჩენდა.
რას წაიკითხავს მკითხველი OK! Decor Book-ში?
შევარჩიე რამდენიმე თემა, რომლებიც პირადად ჩემთვის ძალიან საინტერესოა და ვფიქრობ, მკითხველისთვისაც ასე იქნება. გამოვარჩევდი Fornasetti-ს, რომელიც წლებია მიყვარს და არ მბეზრდება. ეს ბრენდი გვთავაზობს ისეთ ავეჯსა თუ დეკორატიულ ნივთებს, რომლებიც ნებისმიერ ინტერიერში იქნება მინიმალისტური ან კლასიკური, იდეალურად ჯდება და ბრენდისთვის დამახასიათებელ განწყობას ქმნის.
ვისაუბრეთ ზაჰა ჰადიდზე, რომელიც ჩემთვის ერთ-ერთი ბრწყინვალე ქალი არქიტექტორია, მისთვის დამახასიათებელი გამოკვეთილი ფორმებით. გამორიცხულია შეხედო და ვერ იცნო მისი ხელწერა. გარდა ამისა, წაიკითხავთ ფრენკ ლოიდ რაიტის შესახებ, რომელიც ასევე ძალიან მომწონს. ვფიქრობ, მისი ეპოქისთვის ძალიან გამორჩეული იყო და დღემდე მეტად აქტუალურია რაიტის ფორმები და შტრიხები.
მკითხველს გავუზიარეთ რამდენიმე ფილმი და წიგნი, რომლებმაც ჩემზე განსაკუთრებული შთაბეჭდილება მოახდინა. ასევე ვისაუბრეთ რჩევებსა და შეცდომებზე, რომლებიც აუცილებლად უნდა გავითვალისწინოთ სახლის მოწყობისას. ბევრი რომ არ გავაგრძელოთ, კიდევ არაერთი თემა განვიხილეთ და გავშალეთ, რომლებიც ვფიქრობ საინტერესო წასაკითხი იქნება მკითხველისთვის.
აქაც გაგვიზიარეთ რამდენიმე რჩევა, რომლებიც სახლის მოწყობისას უნდა გავითვალისწინოთ.
ჩემთვის ინტერიერი ირეკლავს ადამიანის ხასიათს, ამიტომ ცოტა ნაკლებად ვაქცევ ყურადღებას ტრენდს. შესაძლოა უმნიშვნელო დეტალები დავიხმარო, მაგრამ ვიყენებ ნივთებს, რომლებიც ლამაზია, გადმოსცემს განწყობას და ქმნის განსხვავებულ ატმოსფეროს.
ამ ეტაპზე რით ხართ დაკავებული?
პროფესიით მხატვარი-გრაფიკოსი გახლავართ და აქტიურად ვხატავ დროის ნებისმიერ პერიოდში. ძირითადად დაკავებული ვარ Ambience-ით. უკვე მეორე წელია დავიწყე შოკოლადის წარმოებაც, რაც საინტერესო სიახლეა ჩემს ცხოვრებაში.
გვიამბეთ Ambience-ის შესახებ.
Ambience-ის იდეა მოგზაურობის დროს დამებადა. ამ დროს ყველა შთაბეჭდილებების ქვეშ ვართ და ხშირად ახალი იდეებითაც ვუბრუნდებით სამშობლოს. ბევრი სხვადასხვა ინტერიერის ნახვამ და დათვალიერებამ გამიჩინა სურვილი, გამეხსნა მსგავსი ტიპის შოურუმი. ეს იყო 2007 წელს, მაშინ, ფაქტობრივად, არ არსებობდა ბაზარზე მეორე ასეთი მაღაზია და გადავწყვიტე ქართველი მომხმარებლებისთვისაც მიმეცა საშუალება საკუთარ ქვეყანაში ჰქონოდათ განსხვავებული ნივთების შეძენის შესაძლებლობა.
პროდუქტი ეკუთვნის სხვადასხვა ქვეყნის ბრენდებს, მათ შორის იტალიას, ბელგიას, საფრანგეთს, გერმანიას, ჰოლანდიას, ესპანეთს… ნივთებს ვარჩევ ჩემი გემოვნებით, თუმცა არის შემთხვევები, როდესაც ვითვალისწინებ ტრენდსაც.
გვესაუბრეთ Ambience-ის შოკოლადზე უფრო ვრცლად. როგორ დაგებადათ იდეა?
უზომოდ მიყვარს ექსპერიმენტები, თუმცა იდეა ძალიან სპონტანურად დაიბადა. ერთი თვით ადრე ვინმეს რომ ეთქვა, ალბათ, არც დავიჯერებდი, რომ ამ საქმიანობას მოვკიდებდი ხელს. გავიარე კურსები, ავიღე სერტიფიკატი და მუდმივად ვცდილობ გავიღრმაო ცოდნა ამ სფეროში.
რა არის ყველაზე მნიშვნელოვანი თქვენს პირად სივრცეში იმისათვის, რომ თავი კომფორტულად იგრძნოთ?
ძალიან ინდივიდუალურია ეს განსაზღვრება და ძირითადად ცხოვრების წესიდან გამომდინარეობს. ჩემს შემთხვევაში აუცილებელია სიმყუდროვე, სადა კედლები, რომელიც დატვირთულია დეკორაციებით. მირჩევნია ფერები შევიტანო ავეჯში, ფარდებში, ნივთებში, და არა კედლებში, რადგან როდესაც გბეზრდება ესა თუ ის დეკორი, უფრო მარტივია შეცვალო, თუნდაც ნივთი, და ჩაანაცვლო სხვა დეკორაციებით.
როგორ ახერხებთ პირად ცხოვრებასა და კარიერას შორის ბალანსის დაცვას?
არ არის მარტივი ბალანსის დაცვა, რადგან ხშირად გიწევს თუნდაც არჩევანის წინაშე დადგომა და გადაწყვეტილებების მიღება. მაგრამ მიმაჩნია, რომ რასაც სიყვარულით აკეთებ, საბოლოო ჯამში ყველაფერი გამოდის.
თქვენს შემთხვევაში რა იყო მთავარი თვისება, რომელიც მიზნის განხორციელებაში დაგეხმარათ?
უპირველესად შრომა, მონდომება, დისციპლინა და ახლის შექმნისკენ სწრაფვა. მთავარია ადამიანი ნებისმიერ საქმეში გადმოსცემდეს ინდივიდუალიზმს.
დაახასიათეთ საკუთარი თავი სამი სიტყვით…
მიზანდასახული, შემოქმედებითი და ემოციური.
ტექსტი: ციაკო ღამბაშიძე
ფოტო: ალექსეი სეროვი
