ლუვრის დირექტორმა, ლორანს დე კარმა, მუზეუმის გარშემო არსებული მრავალრიცხოვანი სკანდალებით გამოწვეული კრიტიკის ფონზე, თანამდებობა დატოვა. საფრანგეთის პრეზიდენტმა, ემანუელ მაკრონმა, მისი განცხადება გადადგომის შესახებ უკვე დააკმაყოფილა. ამის შესახებ ინფორმაციას ელისეს სასახლის პრესსამსახური ავრცელებს.
„სახელმწიფოს მეთაურმა მიიღო განცხადება გადადგომის შესახებ და აღნიშნა, რომ ეს პასუხისმგებლობით სავსე ნაბიჯია იმ დროს, როდესაც მსოფლიოს უდიდეს მუზეუმს უსაფრთხოების მსხვილი პროექტების განხორციელებისთვის სტაბილურობა და ახალი, ძლიერი იმპულსი სჭირდება “ – ვკითხულობთ განცხადებაში.
ამასთან, მაკრონმა გამოთქვა სურვილი, რომ 59 წლის დე კარს „დიდი შვიდეულის“ (G7) ქვეყნების მუზეუმებს შორის თანამშრომლობის ორგანიზების მისია მიანდოს.
ლორანს დე კარი ლუვრის დირექტორის პოსტზე 2021 წლის 1 სექტემბერს დაინიშნა და მას შემდეგ ყველა საგამოფენო პროექტს ხელმძღვანელობდა. ის მუზეუმის ისტორიაში პირველი ქალი, რომელმაც დირექტორის თანამდებობა დაიკავა.
აღსანიშნავია, რომ ლორანს დე კარს პოსტის დატოვების სურვილი ადრეც ჰქონდა. მან გადადგომა გასული წლის შემოდგომაზე, მუზეუმის გაძარცვის შემდეგაც სცადა, თუმცა მაშინ კულტურის მინისტრმა, რაშიდა დატიმ მისი მოთხოვნა არ დააკმაყოფილა.
შეგახსენებთ ლუვრის გარშემო არსებული სკანდალების ქრონოლოგიას:
2025 წლის ოქტომბერი
ლუვრი გაძარცვეს. მძარცველები მუზეუმში სამშენებლო ზონიდან შევიდნენ, ნაპოლეონისა და იმპერატრიცა ჟოზეფინას კოლექციიდან ძვირფასეულობა გაიტანეს და სკუტერებით მიიმალნენ. დანაშაულის ჩასადენად მათ მხოლოდ შვიდი წუთი დასჭირდათ, რამაც საფრანგეთის მთავარი მუზეუმის უსაფრთხოების ზომების შესახებ მწვავე დისკუსია გამოიწვია.
გაფიცვები და თაღლითობა
ძარცვის შემდეგ ლუვრი სხვა პრობლემების წინაშეც აღმოჩნდა: თანამშრომლებმა ხელფასების მომატებისა და სამუშაო პირობების გაუმჯობესების მოთხოვნით გაფიცვა დაიწყეს. გარდა ამისა, ყალბი ბილეთების გაყიდვის მსხვილი აფერა გამოვლინდა, რომლით გამოწვეულმა ზარალმა 10 მილიონი ევრო შეადგინა.
სანტექნიკის პრობლემები
სულ ცოტა ხნის წინ მუზეუმს ახალი უბედურება დაატყდა თავს – მილის გასკდომის შედეგად რამდენიმე დარბაზი დაიტბორა, რამაც XV-XVI საუკუნეების ხელოვნების ნიმუშების მნიშვნელოვანი დაზიანება გამოიწვია. წინასწარი შეფასებით, სამი ტილო კრიტიკულ მდგომარეობაშია, თუმცა ფრანგი რესტავრატორები იმედოვნებენ, რომ მათი პირვანდელი სახით აღდგენა შესაძლებელია.
ელისეს სასახლეში უკვე მუზეუმის მომავალი დირექტორის რამდენიმე კანდიდატს განიხილავენ. ფავორიტებს შორის ლუვრის ყოფილ დირექტორს, ჟან–ლუკ მარტინესს ასახელებენ, თუმცა ექსპერტები ფიქრობენ, რომ მაკრონი ახალ კანდიდატურას აირჩევს, რომ მუზეუმის უსაფრთხოების სისტემა ძირეულად შეიცვალოს.
უსაფრთხოების ახალი პროტოკოლი – ლუვრში AI-ზე დაფუძნებული მონიტორინგის სისტემა დაინერგა, რომელიც მუზეუმის ყველა შესასვლელს, მათ შორის სამშენებლო ზონებსაც, საიდანაც მძარცველები შეიპარნენ, რეალურ დროში აკონტროლებს.
როგორც ჩანს, ლუვრში „დიდი წმენდისა“ და განახლების ეტაპი დაიწყო.
ასევე დაგაინტერესებთ
#OK! ლუვრის ნახვა ევროკავშირის არაწევრი ქვეყნების მოქალაქეებისთვის 45%-ით გაძვირდა
