14 იანვრიდან ტურისტებისთვის, რომლებიც ევროკავშირის, ისლანდიის, ლიხტენშტაინისა და ნორვეგიის ფარგლებს გარეთ ცხოვრობენ, ლუვრში შესასვლელი ბილეთის ფასი 45%-ით, 32 ევრომდე გაიზარდა. ამ გადაწყვეტილების მიზანი, რომელსაც ბევრმა დისკრიმინაციული უწოდა, მუზეუმის შენობის რეკონსტრუქციაა, რომელიც 700-დან 800 მილიონ ევრომდე დაჯდება.
ევროპელებისა და არაევროპელებისთვის განსხვავებული ტარიფების დაწესება ევროპაში ერთ-ერთი ყველაზე გაბედული ნაბიჯია. მსგავსი პრაქტიკა ბევრ განვითარებად ქვეყანაში არსებობს, თუმცა ევროპაში აქამდე თითქმის არ გამოიყენებოდა.
ლუვრის ადმინისტრაციაში განაცხადეს, რომ ბილეთის ფასის 22-დან 32 ევრომდე გაზრდა „დიფერენცირებული ფასწარმოქმნის“ ეროვნული პოლიტიკის ნაწილია, რომელიც გასული წლის დასაწყისში გამოცხადდა. ამ პოლიტიკის თანახმად, არაევროპელი მოგზაურებისთვის ბილეთის ფასები ვერსალში, ოპერა გარნიეში, Sainte Chapelle კაპელასა და ლუარის ხეობაში მდებარე შამბორის ციხესიმაგრეშიც გაიზრდება.
საფრანგეთის მთავრობამ ფასების უეცარ ცვლილებაზე ისაუბრა და განაცხადა, რომ ეს მუზეუმს ყოველწლიურად დამატებით, 20-30 მილიონ ევროს მოუტანს, რაც რემონტს და ლუვრის დანაკარგებს მოხმარდება.
ტურისტების გამოხმაურება
ფრანგების გადაწყვეტილებაზე AFP-ის მიერ გამოკითხული ტურისტების რეაქცია არაერთგვაროვანი აღმოჩნდა. 60 წლის ავსტრალიელმა, კევინ ფლინმა, რომელიც პარიზში მეუღლესთან ერთად ჩავიდა, განაცხადა, რომ არაევროპელებისთვის 32 ევროიანი ტარიფი სრულიად მისაღებია, თუმცა სხვებს, მაგალითად, სამხრეთკორეელ ჩოოჰან ტაკს, ეს გადაწყვეტილება უსამართლობად მიაჩნია.
„ჩვენ ყველანი ადამიანები ვართ. ეს ძალიან დიდი სხვაობაა“ – განაცხადა მან.
„ინდოეთში ღირსშესანიშნაობების მონახულებისთვის ადგილობრივები უცხოელებზე ნაკლებს იხდიან და ეს ნორმალურია, რადგან მათ ნაკლები შემოსავალი აქვთ, მაგრამ პარიზში, რომელიც მდიდარი ქვეყნის დედაქალაქია, ეს უსამართლობა მგონია -აღნიშნა ბრაზილიელმა.
ვინ გადაიხდის მეტს?
ლუვრის ბილეთები გაძვირდება ევროკავშირის არაწევრი ქვეყნების, მათ შორის აშშ-ის, დიდი ბრიტანეთისა და ჩინეთის მოქალაქეებისთვის, რომლებიც ფრანგული მუზეუმების ხშირი სტუმრები არიან.
ინდივიდუალური ტურისტები: 32 ევრო.
ჯგუფური ვიზიტები (გიდით): 28 ევრო პერსონაზე („ვიზიტის ხარისხის შესანარჩუნებლად“ ჯგუფში ადამიანთა მაქსიმალური რაოდენობა 20-მდე შეიზღუდება).
გარკვეული კატეგორიის პირებისთვის, მათ შორის 18 წლამდე ასაკის ვიზიტორებისთვის, შესვლა კვლავ უფასო იქნება.
ლუვრში ფასები ბოლოს 2024 წლის იანვარში, 17-დან 22 ევრომდე გაიზარდა. მაშინ პროფკავშირმა – CGT Culture ფასების ზრდის პოლიტიკა დაგმო და განაცხადა, რომ ეს კულტურას „კომერციულ პროდუქტად“ აქცევს და ეროვნულ მემკვიდრეობაზე წვდომის მხრივ უთანასწორობას წარმოშობს.
ასევე დაგაინტერესებთ
#OK! როგორ გაქრა „მონა ლიზა“ ლუვრიდან? – “საუკუნის ქურდობის” ისტორია
