ლევან მორჩაძე – მედიცინის აკადემიური დოქტორი, პროფესორი, ორთოპედ-იმპლანტოლოგი, მრავალწლიანი კლინიკური, აკადემიური და სამეცნიერო გამოცდილებით. იგი წლების განმავლობაში წარმატებით უთავსებს პრაქტიკულ საქმიანობასა და აკადემიურ მოღვაწეობას, დაკავშირებულია აკაკი წერეთლის სახელობის სახელმწიფო უნივერსიტეტთან, არაერთი სამეცნიერო პუბლიკაციის ავტორი და თანაავტორი, საერთაშორისო და ადგილობრივი კონგრესების, ფორუმებისა და პროფესიული შეხვედრების აქტიური მონაწილე და მომხსენებელია. განსაკუთრებულ ყურადღებას უთმობს ახალგაზრდა სპეციალისტების პროფესიულ განვითარებასა და სტომატოლოგიური განათლების ხელშეწყობას. დღეს პროფესორი ლევან მორჩაძე ხელმძღვანელობს ქართულ-ამერიკული სტომატოლოგიური კვლევითი ცენტრის (GAD) ექიმთა გუნდს, სადაც მისი გამოცდილება, პროფესიონალიზმი და ლიდერული ხედვა კლინიკის წარმატებისა და განვითარების მნიშვნელოვანი საფუძველია.
პროფესიონალიზმი, მუდმივი განვითარება და ადამიანური ურთიერთობა მისთვის ერთ მთლიანობად იქცევა. წარმატებული მკურნალობა ნდობით იწყება, თანამედროვე მიდგომით გრძელდება და იმ ღიმილით სრულდება, რომელიც პაციენტს ჯანმრთელობასთან ერთად თავდაჯერებულობასაც უბრუნებს. OK! ქუთაისთან ინტერვიუში ლევან მორჩაძე პროფესიის არჩევის მიზეზებზე, ექიმის პასუხისმგებლობასა და იმ ღირებულებებზე გვესაუბრება, რომელიც მის ყოველდღიურ პრაქტიკას განსაზღვრავს.
რატომ აირჩიეთ სტომატოლოგია და რა იყო ის მთავარი მოტივაცია, რომელმაც ამ პროფესიამდე მოგიყვანათ?
სტომატოლოგია იმიტომ ავირჩიე, რომ ყოველთვის მიზიდავდა მედიცინის ის სფერო, რომელიც აერთიანებს მეცნიერებას, პრაქტიკულ უნარებსა და ადამიანებთან უშუალო ურთიერთობას. ჩემთვის მთავარი მოტივაცია იყო შესაძლებლობა, დავხმარებოდი ადამიანებს ჯანმრთელობის გაუმჯობესებაში, ტკივილის შემცირებასა და თავდაჯერებულობის დაბრუნებაში. განსაკუთრებით მომწონს, რომ სტომატოლოგის მუშაობის შედეგი სწრაფად და თვალსაჩინოდ ჩანს, რაც დიდ პროფესიულ კმაყოფილებას მანიჭებს. ამ პროფესიაში ასევე მნიშვნელოვანია მუდმივი განვითარება და ახალი ტექნოლოგიების ათვისება, რაც მას კიდევ უფრო საინტერესოს ხდის.
ლევან, რა არის თქვენი საქმიანობის ყველაზე საინტერესო და, ამავდროულად, ყველაზე საპასუხისმგებლო ნაწილი?
ჩემი საქმიანობის ყველაზე საინტერესო ნაწილი არის ის, რომ ყოველდღიურად განსხვავებულ პაციენტებთან და კლინიკურ შემთხვევებთან მიწევს მუშაობა. თითოეულ პაციენტს ინდივიდუალური მიდგომა სჭირდება, რაც პროფესიულ საქმიანობას მრავალფეროვანსა და საინტერესო პროცესად აქცევს.
ამავდროულად, ყველაზე საპასუხისმგებლო ნაწილი არის პაციენტის ჯანმრთელობასა და კეთილდღეობაზე ზრუნვა, რადგან ყოველი გადაწყვეტილება, დიაგნოზი და ჩატარებული მკურნალობა პირდაპირ გავლენას ახდენს მის ჯანმრთელობაზე, კომფორტსა და ცხოვრების ხარისხზე.
თანამედროვე სტომატოლოგია სწრაფად ვითარდება. რას ნიშნავს თქვენთვის მუდმივი პროფესიული ზრდა და სიახლეების ათვისება?
თანამედროვე სტომატოლოგია ძალიან სწრაფად ვითარდება და ვფიქრობ, რომ პროფესიული ზრდა ამ სფეროს განუყოფელი ნაწილია. ჩემთვის ეს ნიშნავს უწყვეტ სწავლას, ახალი ტექნოლოგიების, მეთოდებისა და მასალების გაცნობას და მათ პრაქტიკაში სწორად დანერგვას. ამისთვის მნიშვნელოვანია ტრენინგებში, კონფერენციებსა და საგანმანათლებლო პროგრამებში მონაწილეობა, ასევე საერთაშორისო გამოცდილების გაზიარება. მუდმივი განვითარება საშუალებას მაძლევს პაციენტებს შევთავაზო უფრო უსაფრთხო, ეფექტური და თანამედროვე მკურნალობა, რაც, საბოლოოდ, მათი ჯანმრთელობისა და კმაყოფილების გაუმჯობესებას ემსახურება.
პაციენტებთან ურთიერთობისას რა პრინციპია, რომელიც არასდროს გღალატობთ?
პაციენტებთან ურთიერთობისას მთავარი პრინციპი, რომელიც არასდროს მღალატობს, არის პატივისცემა, გულწრფელი კომუნიკაცია და ნდობის შექმნა. ჩემთვის მნიშვნელოვანია, თითოეულ პაციენტს ყურადღებით მოვუსმინო, გასაგებ ენაზე ავუხსნა მკურნალობის პროცესი და გადაწყვეტილებები მასთან ერთად მივიღო. მიმაჩნია, რომ წარმატებული მკურნალობა მხოლოდ პროფესიულ ცოდნაზე არ არის დამოკიდებული, პაციენტმა უნდა იგრძნოს, რომ ის უსაფრთხო, კომფორტულ და მზრუნველ გარემოში იმყოფება.
ექიმის პროფესია დიდ დროსა და ენერგიას მოითხოვს. როგორ ახერხებთ, რომ სამუშაოსა და პირად ცხოვრებას შორის ბალანსი შეინარჩუნოთ?
ექიმის პროფესია მართლაც დიდ პასუხისმგებლობას, დროსა და ენერგიას მოითხოვს, ამიტომ სამუშაოსა და პირად ცხოვრებას შორის ბალანსის შენარჩუნება ძალიან მნიშვნელოვანია. ვცდილობ, სწორად დავგეგმო სამუშაო დღე, გამოვყო დრო ოჯახის წევრებისთვის, დასვენებისა და საკუთარი პროფესიული თუ პიროვნული განვითარებისთვის. მიმაჩნია, რომ დასვენებული და ემოციურად სტაბილური ექიმი პაციენტსაც უფრო ხარისხიან და ყურადღებიან მომსახურებას სთავაზობს. ამიტომ ბალანსის შენარჩუნება არა მხოლოდ პირადი კეთილდღეობისთვის, არამედ პროფესიული ეფექტიანობისთვისაც აუცილებელია.
რა ადგილი უჭირავს ოჯახს თქვენს ცხოვრებაში და რამდენად არის ის თქვენი მთავარი საყრდენი პროფესიულ გზაზე?
მყავს მეუღლე და სამი შვილი, ოჯახს ჩემს ცხოვრებაში განსაკუთრებული ადგილი უჭირავს. სწორედ ოჯახია ჩემი მთავარი საყრდენი, რომელიც მაძლევს ძალას, მოტივაციასა და ემოციურ სტაბილურობას. ექიმის პროფესია დიდ პასუხისმგებლობასა და ენერგიას მოითხოვს, ამიტომ ძალიან მნიშვნელოვანია, რომ სამუშაო დღის შემდეგ გყავდეს ადამიანები, რომლებიც გიგებენ, მხარს გიჭერენ და გაძლიერებენ. ვფიქრობ, პროფესიულ წარმატებასა და პირად კეთილდღეობას შორის ბალანსის შენარჩუნებაში ოჯახის როლი შეუცვლელია. მათი მხარდაჭერა მაძლევს შესაძლებლობას, პაციენტებს მეტი ყურადღებით, ენერგიითა და დადებითი განწყობით მოვემსახურო.
თქვენი აზრით, რა თვისებები უნდა ჰქონდეს კარგ ექიმს, პროფესიონალიზმის გარდა?
პროფესიონალიზმი, რა თქმა უნდა, ძალიან მნიშვნელოვანია, თუმცა კარგი ექიმი მხოლოდ ცოდნით არ განისაზღვრება. ჩემი აზრით, მას აუცილებლად უნდა ჰქონდეს ემპათია, პასუხისმგებლობის მაღალი გრძნობა, მოთმინება, კომუნიკაციის უნარი და პატივისცემა თითოეული პაციენტის მიმართ. ასევე მნიშვნელოვანია გულწრფელობა და ნდობის შექმნის უნარი, რადგან პაციენტისთვის ხშირად სწორედ ეს არის წარმატებული მკურნალობის საფუძველი. კარგი ექიმი მუდმივად უნდა ცდილობდეს განვითარებას და არასოდეს კარგავდეს ადამიანურ დამოკიდებულებას, რადგან მედიცინა, პირველ რიგში, ადამიანებზე ზრუნვაა.
ლევან, როგორ გსურთ, პაციენტებს დაამახსოვრდეთ თქვენთან შეხვედრა?
მსურს, პაციენტებს ჩემთან შეხვედრა, პირველ რიგში, ადამიანური დამოკიდებულებით, ნდობისა და სიმშვიდის განცდით დაამახსოვრდეთ. ჩემთვის მნიშვნელოვანია, რომ კლინიკიდან არა მხოლოდ ხარისხიანი მკურნალობით, არამედ პოზიტიური ემოციებითაც გავიდნენ. იგრძნონ, რომ ყურადღებით მოვუსმინე, გავითვალისწინე მათი საჭიროებები და ვიზრუნე მათ ჯანმრთელობასა და კომფორტზე. მინდა, ჩემთან ვიზიტი მათთვის უსაფრთხო და სასიამოვნო გამოცდილებად იქცეს.
ერთი რჩევის მიცემა რომ შეგეძლოთ როგორც ექიმს და როგორც ადამიანს, რას ეტყოდით ჩვენი ჟურნალის მკითხველს?
როგორც ექიმი, ყველას გირჩევთ, რომ საკუთარ ჯანმრთელობაზე ზრუნვა პრობლემის გაჩენის შემდეგ კი არა, ყოველდღიური ჩვევებით დაიწყეთ. განსაკუთრებით მნიშვნელოვანია პირის ღრუს ჰიგიენა და პროფილაქტიკური ვიზიტები სტომატოლოგთან. როგორც ადამიანი კი გეტყოდით, რომ საკუთარ თავს დრო დაუთმეთ, ვიზიტი დაგეგმეთ და არასდროს გადადოთ.
ჯანმრთელობა, სიმშვიდე და ღიმილი ცხოვრების ერთ-ერთი ყველაზე დიდი ფასეულობაა. იზრუნეთ საკუთარ თავზე, რადგან ჯანსაღი ღიმილი არა მხოლოდ კბილების, არამედ საერთო კეთილდღეობის ანარეკლია.
ტექსტი: მარიამ ირემაძე
ფოტო: ნინი გორდაძე
