ლაბუბუ ელფური არსებაა, რომელსაც კურდღლის ყურები და ბასრი კბილები აქვს. როგორი უცნაურიც არ უნდა იყოს, ლაბუბუ ბავშვებზე მეტად უფროსებს მოსწონთ. გოგონები ლაბუბუს გამოსახულებებს ძვირადღირებულ ჩანთებზე ამაგრებენ
ლაბუბუს შემქმნელი ჰონგკონგელი მხატვარი კასინგ ლუნგია, რომელმაც ბავშვობა ნიდერლანდებში გაატარა. ლუნგი ამბობს, რომ ახალი სათამაშოს შექმნა ჩრდილოურმა ფოლკლორმა და ელფების ლეგენდებმა შთააგონა.
ლუნგმა სათამაშო 2015 წელს შექმნა, 2019-ში ლაბუბუთი ჩინური კომპანია Pop Mart დაინტერესდა და ლუნგის პერსონაჟზე ლიცენზია მოიპოვა. ასე დაიწყო Monsters-ის სერიის წარმოება და ლაბუბუ სათამაშოების ინდუსტრიას შეუერთდა.
ამ სათამაშოს მთავარი ხიბლი ისაა, რომ გაუმჭვირვალე ყუთებში იყიდება, რომლის გახსნამდე არავინ იცის, რომელი ფიგურა შეხვდება. ლაბუბუს მოყვარულები ამბობენ, რომ სწორედ ეს უცნაური თამაში იზიდავთ, როდესაც სათამაშოს ყიდვა იღბალის გამოცდად იქცევა. Monsters – ის კოლექციები მცირე რაოდენობით გამოდის. ზოგი გამორჩეული ფიგურა 500 დოლარზე მეტი ღირს, რადგან მყიდველისთვის ის უბრალოდ გასაღების საკიდი ან სათამაშო კი არა, თანამედროვე პოპ-არტის ნიმუშია. ლაბუბუ ერთგვარ სიმბოლოდ იქცა, რომელიც მფლობელის სტატუსს უსვამს ხაზს.
Monsters-ის ბოლო სერიებში გაჩნდა ყუთები წარწერით Secret. ყუთში მოთავსებულია განსაკუთრებული ფიგურა, რომლის შესახებ მწარმოებლის ოფიციალურ ვებ-გვერდზე ინფორმაცია არ იძებნება. ასეთი ლაბუბუს პოვნის შანსი 72-დან ერთია.
მიუხედავად იმისა, რომ Monsters ჯერ 2019-ში შეიქმნა, სათამაშოებმა პოპულარობა 2024 წელს მოიპოვა, როდესაც მომღერალმა, ლისამ Teen Vogue-თან ინტერვიუში თქვა, რომ ლაბუბუები შვილებივით უყვარს. მალევე ჩანთებზე ლაბუბუების საკიდებით რიანა და დუა ლიპა გამოჩნდნენ, რის შემდეგაც აქსესუარი 2024 წლის ტრენდი გახდა.
ამ დღიდან თითქოს მთელი მსოფლიო შეიშალა. დუბაის Valentino-ს მაღაზია ლაბუბუს იშვიათ თოჯინებს VIP კლიენტებს ჩუქნის, ვარსკვლავები ლაბუბუებს საჯაროდ სიყვარულს უხსნიან, მოდის მოყვარული გოგოები ბრენდულ ჩანთაზე ლაბუბუს მიმაგრებაზე ოცნებობენ, კიმ კარდაშიანმა კი ამასობაში თოჯინების საკუთარი კოლექციის შექმნა მოასწრო.
TikTok-ზე ლაბუბუს გარშემო იქმნება სოციუმი, სადაც ადამიანები თოჯინებს ცოცხალ პერსონაჟებად აღიქვამენ. განსაკუთრებული პოპულარობით სარგებლობენ იშვიათი ფიგურების აუქციონები და ახალი კოლექციების მიმოხილვები. Tiktok-ზე #Labubu-ს “ჰაშთაგის” ქვეშ მილიონზე მეტი ვიდეო დევს. 2024 წელს, ლაბუბუმანიის ფონზე, კომპანია Pop Mart-ის მოგება გაორმაგდა. გაყიდვების მოცულობამ 13 მილიარდ იუანს გადააჭარბა (დაახლოებით 1.8 მილიარდი დოლარი), სუფთა მოგება კი 188%-ით გაიზარდა. Pop Mart-ის აქციების ფასმაც რეკორდული ზრდა განიცადა – 34 დოლარიდან 270-მდე.
რა თქმა უნდა, ეს ყველაფერი კომპანიის ხელმძღვანელის, ვანგ ნინგის ქონებაზეც აისახა. Forbes-ის მონაცემებით, მისი ქონება 22.7 მილიარდ დოლარამდე გაიზარდა, რაც მას ჩინეთის მეათე ყველაზე მდიდარ ადამიანად და ყველაზე ახალგაზრდა მილიარდერად აქცევს – ის მხოლოდ 38 წლისაა.
ლაბუბუმანიის ფონზე ბევრ ექსპერტს მიაჩნია, რომ ზრდასრულებში ლაბუბუს პოპულარობა პირდაპირ ეკონომიკურ რეცესიას უკავშირდება. ადამიანებს აღარ აქვთ საშუალება, რომ ბინა იყიდონ ან ძვირადღირებულ კურორტზე დაისვენონ, ამიტომ შედარებით იაფ, მაგრამ ემოციურად ღირებულ ნივთებს ეძებენ.
„ბოლო წლებში ზრდასრულების მხრიდან საბავშვო ნივთებზე მოთხოვნა ძალიან გაიზარდა. მათ აშკარად ნოსტალგიის ძლიერი განცდა და ბავშვობის მხიარული მოგონებებისკენ ლტოლვა აქვთ. ფილმები „ბარბი“ და „მაინკრაფტი“ იმიტომაცაა ასეთი პოპულარული, რომ ბავშვური თამაშები ზრდასრულებშიც ძალიან აქტუალური გახდა“ – ამბობს Harrods-ის სათამაშოების განყოფილების მენეჯერი კეიტ ვუდჰედი.
და ბოლოს, რამდენიმე დღის წინ პეკინში 1.30 მ. სიმაღლის ლაბუბუ რეკორდულ თანხად – 1.08 მილიონ იუნად გაიყიდა, რაც დაახლოებით 150 000 დოლარია. BBC News-ის ინფორმაციით, ამ ტიპის სათამაშოებში ეს ყველაზე ძვირადირებული მოდელია.
ტრენდს ქართველი ცნობილი სახეებიც არ ჩამორჩნენ. მსახიობმა და ტელეწამყვანმა შორენა ბეგაშვილმა სოციალურ ქსელში განათავსა ვიდეო, სადაც მას ჰერმესის ჩანთაზე ლაბუბუები აქვს დამაგრებული.
View this post on Instagram
