იმისათვის, რომ კაფე ან ბარი თქვენი საყვარელი ადგილი გახდეს, მხოლოდ კარგი მენიუ არ კმარა. მნიშვნელოვანია ეს ადგილი იყოს კომფორტული და მშვიდი, ხოლო გარემო მოგეწონოს. სწორედ კაფე „გარემოს“ შესახებ გიამბობთ დღეს, რომელიც ი.აბაშიძის 2 ნომერში მდებარეობს. მისი მთავარი იდეაა მომხმარებელმა თავი იგრძნოს ისე, როგორც საკუთარ სახლში. გარდა ამისა, გაზაფხულის დადგომასთან ერთად უფრო იზრდება მოთხოვნა ღია კაფეებზე, „გარემოს“ ერთ-ერთი უპირატესობა კი სწორედ მისი ეზოა. უფრო დეტალურად კაფეს შესახებ მისი დამფუძნებლები − თათია ასანიძე, ალექსანდრე ტატუნაშვილი და თაკო გვათუა გიამბობენ.
მოგვიყევით კაფე „გარემოს“ შექმნის ისტორია.
(ალექსანდრე): გადავწყვიტეთ შინაური და მყუდრო კაფე-ბარის შექმნა. გვინდოდა ისეთი გარემო ყოფილიყო, სადაც ყველა კომფორტულად იგრძნობდა თავს და მართლაც, იმდენად მყუდრო და შინაური გარემო შევქმენით, რომ სახელის იდეაც ამ კონცეფციიდან წამოვიდა და კაფეს „გარემო“ დავარქვით. ინტერიერის დაგეგმვისას ჩვენი მიზანი იყო, ვინტაჟისა და თანამედროვე სტილის შერწყმა, რაც გვინდოდა აქ მოსულ სტუმრებს ეგრძნოთ.
„გარემოს“ უპირატესობები…
(თათია): ჩვენი კაფეს მთავარი უპირატესობა ღია სივრცეა, რომლის ეზო ერთ-ერთი საუკეთესო ადგილია მათთვის, ვისაც უყვარს მწვანე და გრილ ადგილას გემრიელად მირთმევა და დასვენება. „გარემო“ კიდევ ერთხელ გაგრძნობინებთ თავს საკუთარ სახლში. კაფე მდებარეობს ისეთ ლოკაციაზე, სადაც ტურისტების მოძრაობა ძალიან ხშირია. ჩვენ ხშირად ვეპატიჟებით სტუმრებს სხვადასხვა ღონისძიებაზე, მათ შორის ცოცხალი მუსიკის საღამოებზე პარასკევობით და შაბათობით. ჩვენი „გარემო“ ძალიან მეგობრული და გემრიელია, შესაბამისად, ეს ყველაფერი, მომხმარებელს კომფორტისა და სიამოვნების შეგრძნებას მიანიჭებს.
გვესაუბრეთ მენიუზე.
(თაკო): „გარემოს“ მენიუ განსხვავებული და გემრიელია. როგორც საჭმელი, ასევე სასმელი ჩვენთან ახალი და ხარისხიანი პროდუქციით მზადდება. მაგალითად, მე მყავს 5 შვილი და თამამად შემიძლია ვთქვა, რომ ისინი ჩვენი მუდმივი მომხმარებლები არიან. რაც შეეხება ფავორიტი კერძის გამოყოფას, რთულია, თუმცა ერთ-ერთი ყველაზე მოთხოვნადი ბურგერი და ხამანწკის სალათაა. მიზნად გვაქვს დასახული, ჩვენმა მენიუმ გააღვიძოს თქვენი გემოს რეცეპტორები და აუცილებლად გაგიჩნდეთ ჩვენთან დაბრუნების სურვილი. ძალიან მნიშვნელოვანია, ჩვენთან მოსული ადამიანი გახდეს „გარემოს“ ერთგული მომხმარებელი.
(ალექსანდრე): ჩვენი მომხმარებლები მეტწილად ტურისტები არიან, მაგრამ, რა თქმა უნდა, ადგილობრივ მოსახლეობაშიც დიდი მოწონებით ვსარგებლობთ. ჩვენი გუნდი მოტივირებულია თითოეულმა სტუმარმა თავი კომფორტულად და მშვიდად იგრძნოს.
ტექსტი: სოფიო მალანია
ფოტო: ალექსეი სეროვი
