დავით ლაბაძე – პოდკასტ „გასტრონომის“ ავტორი
ბატონო დავით, როგორ გაჩნდა პოდკასტის იდეა?
სტუდიაში გადავწყვიტეთ, რამდენიმე პოდკასტი გაგვეკეთებინა იმ მიმართულებებით, რომლებიც სხვადასხვა მიზეზით საინტერესო იყო ჩვენთვის, და სფეროს პროფესიონალებთან ერთად დაგვეწყო ლაპარაკი აქტუალურ და მნიშვნელოვან თემებზე. როგორც ხვდებით, გასტრონომია მე მერგო.
გვესაუბრეთ „გასტრონომის“ მიზნებზე.
მთავარი, რაზეც პოდკასტის სტუმრებისა და თემების მოძიებისას ვფიქრობთ, არის, თუ როგორ მივცეთ კონტექსტი იმ ზოგად წარმოდგენებს, რაც გასტრონომიაზე გვაქვს. ქართულ კულინარიასა და კულინარიის ტრადიციაზე − თუნდაც კონკრეტულ რეცეპტებზე − ინფორმაცია ასე თუ ისე უფრო ხელმისაწვდომია, ვიდრე გასტრონომიულ კულტურაზე. მგონია, რომ პოდკასტის სპეციფიკა მაძლევს საშუალებას, ჩემთვის საინტერესო ადამიანებს ველაპარაკო, ვკითხო ის, რაც მაინტერესებს და, იმედი მაქვს, ამით უფრო გავაფართოო დისკუსია გასტრონომიული კულტურის გარშემო.
როგორია საზოგადოების დაინტერესება და გამოხმაურება?
გამოხმაურება ამ ეტაპზე, ძირითადად, დადებითია. სასიხარულო და უცნაურია, რომ უკვე გვყავს ერთგული მაყურებლები, რომლებიც პირველივე ეპიზოდიდან მოგვყვებიან და, რაც ყველაზე მეტად გვახარებს, აქტიურად გვისვამენ კითხვებს და გვთავაზობენ იდეებს შემდეგი პოდკასტისთვის.
ვინ არიან თქვენი პოდკასტის სტუმრები და რომელ თემებს განიხილავთ ყველაზე ხშირად?
პოდკასტის სტუმრები თავიანთ სფეროში კარგად ცნობილი და წარმატებული ადამიანები არიან, თუმცა, ზოგიერთ შემთხვევაში, საზოგადოება მათ არ იცნობს. მათთან შეხვედრა ჩემთვისაც პოდკასტზე მუშაობის ერთ-ერთი ყველაზე სასიამოვნო ნაწილია. რაც შეეხება თემებს, ძალიან ბევრ საინტერესო საკითხზე ვისაუბრეთ, მათ შორის: სარესტორნო ბიზნესზე, ქართულ ღვინოზე, ქართული გემოს მემკვიდრეობაზე, აგრონომიაზე, ვეგანურ და ვეგეტარიანულ სამზარეულოზე და ა.შ.
როგორია „გასტრონომის“ სამომავლო გეგმები?
ჯერჯერობით, მხოლოდ ვრწმუნდებით, რომ ძალიან ბევრი მიმართულებაა, რომელსაც შეიძლება ჩავუღრმავდეთ. ასევე, უამრავი ადამიანია, რომელთა სტუმრობა მნიშვნელოვანია არა მხოლოდ ჩვენი პოდკასტისთვის და მაყურებლისთვის, არამედ ზოგადად, ამ სფეროსთვის.
