სინდი კროუფორდი და რენდი გერბერი, 27 წლის ვაჟის, პრესლი გერბერის გარდაცვალებას გამოეხმაურნენ. წყვილმა ოჯახური ტრაგედიის შესახებ განცხადება გაავრცელა, რომელშიც შვილის დაკარგვით გამოწვეულ ტკივილზე ისაუბრა და მადლობა გადაუხადა ყველას, ვინც ამ მძიმე პერიოდში მათ მხარდაჭერას უცხადებდა:
„ღრმა მწუხარებას გამოვთქვამთ ჩვენი საყვარელი შვილის დაკარგვის გამო. მადლიერები ვართ, რომ პრესლი 27 წლის განმავლობაში ჩვენი ცხოვრების ნაწილი იყო. ის უსაყვარლესი და ულამაზესი სულის მქონე ადამიანი გახლდათ და ყოველთვის ჩვენს გულებში დარჩება.
ვამაყობთ იმით, თუ როგორ წარდგა ის სამყაროს წინაშე – სიკეთით, გულწრფელობითა და საკუთარი სისუსტეების გამოჩენის გამბედაობით. ვაფასებთ იმ სიყვარულსა და მხარდაჭერას, რომელიც ნაცნობი თუ უცნობი ადამიანებისგან მივიღეთ.
შეხვედრამდე, ჩვენო ტკბილო ბიჭო. სამუდამოდ გვეყვარები.
დედა, მამა და კაია“ .
ძმის დაკარგვას სოციალურ ქსელში ვრცელი და ემოციური პოსტით გამოეხმაურა კაია გერბერიც. მოდელმა პრესლისთან ურთიერთობაზე, მათ განსაკუთრებულ კავშირსა და იმ ტკივილზე ისაუბრა, რომლის გადმოსაცემადაც, მისი თქმით, სიტყვები უძლურია.
„პრეზ, სიტყვები არ მყოფნის… სიტყვები უძლურია, სიტყვები რაღაცას აკლებს, სიტყვები ყველაფერს აჯამებს, მაგრამ სიმართლეს მაინც ვერასდროს გადმოსცემს. რა გულუბრყვილო ვიყავი, რომ ოდესღაც მჯეროდა, თითქოს ენას მწუხარების გადმოცემა შეეძლო. ყველა წიგნი წავიკითხე, მაგრამ პასუხი არ მაქვს. სიტყვებით ვერასდროს გადმოვცემ იმ ტკივილს, რომელიც შენმა დაკარგვამ გამოიწვია. მუხლებზე ვარ დამხობილი.
იცი, როგორ მიყვარდა ის ფაქტი, რომ შენი და მერქვა. ეს ყოველთვის იყო და სამუდამოდ იქნება ის, რაც საკუთარ თავში ყველაზე მეტად მიყვარს.
იმდენად მიყვარდი, რომ თავადაც არ ვიცოდი, რა მექნა ამდენი სიყვარულისთვის. ახლა კი, როცა ამ სიყვარულს წასასვლელი არსად აქვს, დარწმუნებული ვარ, მთლიანად ჩამყლაპავს.
შენ ყოველთვის გჯეროდა ადამიანების. სისასტიკეს რისხვით კი არა, ცნობისმოყვარეობით ხვდებოდი. გჯეროდა, რომ ადამიანები ბუნებით კეთილები იყვნენ, რადგან, პრესლი, შენ თავად იყავი კეთილი – მთელი შენი არსით.
მე შენს სიყვარულში დავიბადე და შენს სიყვარულში მოვკვდები. სხვა არაფერი მქონია.
ახლა ვსწავლობ, როგორ მიყვარდე, როცა ვეღარ გხედავ. როგორ გელაპარაკო ისე, რომ ტელეფონი არ ავიღო. როგორ ვიყო შენი და სამყაროში, სადაც შენთან დაკავშირება აღარ შემიძლია. ჯერ არ ვიცი, ამას როგორ გავაკეთებ.
იმიტომ, რომ, პრესლი, მაშინაც კი, თუ ვიცი, სად მთავრდება ეს ყველაფერი, ყველაფერს თავიდან ავირჩევდი. ყოველ წამს შეგნებულად გავივლიდი ამ მწუხარების გზას, თუკი ისევ შენი და მერქმეოდა.
ჩემო ძვირფასო ძმაო, მე შენ გაღმერთებ. ჩემი ძმა მიყვარს… ჩემი ძმა მკვდარია… და ეს სამყარო შენ გარეშე საშინელებაა.
ჩემო საუკეთესო მეგობარო, ჩემო დიდო დამცველო, ჩემი ცხოვრების ერთადერთო ნამდვილო სიყვარულო…
მიყვარხარ, მიყვარხარ, მიყვარხარ – მხოლოდ შენ იცი, რამდენად.
გმადლობ, რომ აქ იყავი.“ – წერს კაია.
პრესლი გერბერი 20 სექტემბერს კალიფორნიაში, სანტა მონიკაში მდებარე სარეაბილიტაციო დაწესებულებაში გარდაიცვალა. სამართალდამცავებმა შეტყობინება სავარაუდო ზედოზირებისა და გულის გაჩერების შესახებ დილით მიიღეს. ექსპერტიზა უკვე ჩატარდა, თუმცა ლოს-ანჯელესის ოლქის სამედიცინო ექსპერტიზის სამსახურს გარდაცვალების ოფიციალური მიზეზი ჯერ არ დაუსახელებია.
