20 ნოემბერს, ნიუ-იორკში, „Sotheby’s“ აუქციონზე, ფრიდა კალოს 1940 წლის ავტოპორტრეტი – „სიზმარი“ („საწოლი“) 54.7 მილიონ დოლარად გაიყიდა, ჯორჯია ო’კიფის “Jimson Weed/White Flower No.1”-ის რეკორდი მოხსნა და ქალის მიერ შექმნილ ყველაზე ძვირადირებულ ნამუშევრად იქცა.
მექსიკელი ფერმწერი ხშირად ხატავდა ავტოპორტრეტებს. მისი ყველაზე ცნობილი ნამუშევრებია „ორი ფრიდა“, „ავტოპორტრეტი ეკლის ყელსაბამით“, „დიეგო და მე“ და „მე და ჩემი თუთიყუშები“.
სიურეალისტური ავტოპორტრეტი „სიზმარი“ („საწოლი“), რომელიც კალომ 1940 წელს დახატა საწოლში მძინარე მხატვარს ასახავს, რომლის თავზე დინამიტის ზონარებით შეკრული, მომღიმარე ჩონჩხი წევს.
ნახატი აუქციონზე გამოტანიდან 4 წუთში გაიყიდა.
The Guardian აღნიშნავს, რომ გაყიდული ნახატი კერძო კოლექციაში ინახებოდა, რომლის მფლობელის სახელი არ ხმაურდება. ამასთან კალოს ნამუშევრები, რომლებიც მექსიკის მუზეუმებსა და კერძო კოლექციებში ინახება, ხელოვნების ნიმუშებად ითვლება და მათი გაყიდვა აკრძალულია.
ფრიდა კალოს ცხოვრება უდიდესი ტკივილით არის სავსე, რაც მის შემოქმედებაშიც იგრძნობა: ექვსი წლის ასაკში მას პოლიომიელიტი დაემართა, რამაც სამუდამოდ დააკოჭლა, 18 წლის ასაკში ტრამვაიმ სამ ადგილზე ხერხემალი გაუტეხა, ქალს 32 ოპერაცია და ფეხის ამპუტაცია ჩაუტარდა. მისი ყველა ორსულობა მუცლის მოშლით მთავრდებოდა, მისი უდიდესი სიყვარული, მხატვარი დიეგო რივერა, გაუთავებლად ღალატობდა..
გარდაცვალებამდე ცოტა ხნით ადრე ფრიდამ დღიურში დაწერა: „იმედი მაქვს, მოგზაურობა წარმატებული იქნება და უკან აღარასოდეს დავბრუნდები“. ფრიდა კალოს ბოლო ნამუშევარი იყო „ვივა ლა ვიდა“. მხატვარი 1954 წლის ივლისში პნევმონიით გარდაიცვალა, 1955 წელს კი მის სახლში მუზეუმი გაიხსნა.
ასევე დაგაინტერესებთ
