ჟურნალი OK! გაგაცნობთ მხატვარსა და ინტერიერის დიზაინერს, ანასტასია მამარდაშვილს. ეს ის ორი პროფესიაა, რომელიც მას ბავშვობიდან აინტერესებდა. როგორც ანასტასია აღნიშნავს, გარდა შემოქმედებითი პროცესისა, ასევე საინტერესოა მომხმარებლებთან ურთიერთობა, რადგან ეცნობი სხვადასხვა ადამიანის გემოვნებას, ხასიათსა და ცხოვრების სტილს. ამ ყველაფრის გათვალისწინებით კი მომხმარებელს სთავაზობს მისთვის მორგებულ დიზაინის პროექტს, რომელიც საბოლოოდ კომფორტულ და სასიამოვნო სივრცედ გარდაიქმნება.
ანასტასია მამარდაშვილი: ყოველთვის ვიცოდი, რომ მხატვარი გავხდებოდი, ბავშვობიდან ძალიან მიყვარდა და მაბედნიერებდა ხატვა. მიუხედავად იმისა, რომ კარგად მესმოდა ამ პროფესიასთან დაკავშირებული სირთულეები, მაინც მივყევი ჩემს ოცნებებს და სამხატვრო აკადემიაში ფერწერის ფაკულტეტზე ჩავაბარე. მაშინაც განვიხილავდი მეორე, „უფრო რაციონალურ“ და ჩემთვის არანაკლებ საინტერესო სფეროს – ინტერიერის დიზაინს. მახსოვს, ფაკულტეტების შერჩევისას ბოლო მომენტამდე ვყოყმანობდი: მივყოლოდი ჩემს ოცნებებს თუ რაციონალური ნაბიჯი გადამედგა.
მიუხედავად იმისა, რომ დღეს ინტერიერის დიზაინერი ვარ, ძალიან მიხარია, რომ მაშინ ხატვა ავირჩიე. ვფიქრობ, მხატვრობა ძალიან ღრმად ანვითარებს ფერისა და ფორმის, კომპოზიციის, ზომიერებისა და ჰარმონიის შეგრძნებას. ინტერიერის დიზაინის შექმნისას იმავე პრინციპებს მივყვები ინსტინქტურად, თითქოს თავისთავად ეწყობა ხოლმე კომპოზიცია, პალიტრა და ეს კიდევ უფრო სასიამოვნოსა და შემოქმედებითს ხდის მუშაობის პროცესს.
ამჟამად რა ადგილი უჭირავს თქვენს ცხოვრებაში ხატვას?
დატვირთული რეჟიმიდან გამომდინარე, სამწუხაროდ, ხატვისთვის დრო თითქმის აღარ მრჩება. თუმცა ხატვა ჩემი შინაგანი სამყაროს ნაწილია და ძალიან მენატრება. მალე აუცილებლად დავუბრუნდები, სხვაგვარად ვერც წარმომიდგენია, რადგან უამრავი განუხორციელებელი იდეა მაქვს.
როდის დაინტერესდით ინტერიერის დიზაინით?
ინტერიერის დიზაინითაც ბავშვობაში დავინტერესდი. მახსოვს, მამა ჩვენთვის სახლს აშენებდა, უამრავი ჟურნალი ჰქონდა არქიტექტურასა და დიზაინზე, ხშირად ვათვალიერებდი და წარმოვიდგენდი, თუ როგორი იქნებოდა ჩვენი სახლი. ბოლომდე ჩართული ვიყავი პროცესში, მამას ჩემი ხედვა და რჩევები ძალიან მოსწონდა და ითვალისწინებდა. ისე გამოდის, რომ ჩვენი სახლი ჩემი პირველი პროექტი იყო.
როგორც უკვე აღვნიშნე, ინტერიერის დიზაინს, ხატვასთან ერთად, სამომავლო პროფესიად განვიხილავდი. ამიტომ აკადემიის დასრულების შემდეგ ინდივიდუალური „მაგისტრატურა“ მოვიწყვე და საუკეთესო ლექტორებისა და კურსების დახმარებით ინტერიერის დიზაინერი გავხდი.
დღეს რას სთავაზობთ საზოგადოებას?
პირველ რიგში, სიყვარულითა და სიამოვნებით შესრულებულ სრულყოფილ დიზაინპროექტს – ტექნიკური ნახაზებითა და ფოტორეალისტური ვიზუალიზაციით. ასევე, დეკორატიული მასალების, ავეჯისა და აქსესუარების შერჩევას და შემდგომ, უშუალოდ რემონტის პროცესში ჩართულობას მის დასრულებამდე.
როგორია თქვენთვის ინტერიერის დიზაინზე მუშაობის პროცესი?
დიზაინპროექტზე მუშაობა იწყება დამკვეთთან ერთად კონცეფციის, განწყობისა და პალიტრის განსაზღვრით. იმისთვის, რომ კარგად ჩავწვდე მის სურვილებს, მნიშვნელოვანია ჩავუღრმავდე მის პიროვნებას. ის ჩემთვის ერთგვარი „მთავარი პერსონაჟია“ და ყოველი დეტალის შექმნისას ვითვალისწინებ მისი ცხოვრების სტილს, ხასიათის შტრიხებს, პროფესიას, ზოგჯერ მუსიკალურ გემოვნებასაც კი. ასე ვიგებ მისეული ჰარმონიისა და კომფორტის აღქმას. ამ ყველაფრის გათვალისწინებით კი ვთავაზობ ინტერიერის ჩემეულ ვერსიას. ოჯახის შემთხვევაში ვცდილობ ყველას ინტერესები გავითვალისწინო და პატარ-პატარა დეტალების დახმარებით ყოველი წევრისთვის კომფორტული და სასიამოვნო სივრცე შევქმნა, როგორც ვიზუალურად, ასევე ფუნქციურად.
რისგან იღებთ შთაგონებას?
შეიძლება მთელი ინტერიერი ერთი პატარა დეტალით იყოს შთაგონებული, მისით დაიწყოს და თვითონ სულაც არ იყოს კომპოზიციის მთავარი ფიგურა. ეს შეიძლება იყოს ფერი, მატერია, ავეჯი ან თუნდაც სანათური, ფორმა, რომელიც მუდმივად მეორდება ინტერიერში სხვადასხვა სახით, როგორც კონცეფციის მნიშვნელოვანი ნაწილი.
ინტერიერის დიზაინზე მუშაობისას რას აქცევთ ყველაზე დიდ ყურადღებას − ფუნქციას თუ ესთეტიკას?
ინტერიერის დიზაინი ხელოვნებასა და ინჟინერიას თანაბრად მოიცავს. უსაფრთხოებისა და ერგონომიკული ნორმების მაქსიმალური დაცვით ჩვენ გვევალება ესთეტიკურად დახვეწილი სივრცის შექმნა იმისთვის, რომ ყოველი დეტალი, რასაც წარმოვიდგენთ, ყოველდღიურ ცხოვრებაში კომფორტული და სასიამოვნო გამოსაყენებელი იყოს და, რაც მთავარია, უსაფრთხო.
სამომავლო გეგმები
მომავალში ძალიან მინდა დიზაინსტუდიის შექმნა ისეთ არტისტებთან ერთად, ვისაც, პირველ რიგში, ძალიან ეყვარება ეს საქმე და ვისი ხედვები და გემოვნებაც ჰარმონიაში იქნება ჩემთან.
ტექსტი: სოფიო მალანია
ფოტო: ალექსეი სეროვი