“ევროპული კინოს პრინცესა” როზმარი მაგდალენა ალბახი, ნახევრად გერმანელი, ნახევრად ფრანგი ლამაზმანი, საქვეყნოდ აღიარებული ლეგენდარული მსახიობი – რომი შნაიდერი დღეს 88 წლის გახდებოდა.
ევროპული კინოს ვარსკვლავმა კარიერა 1950-იან წლებში გერმანული Heimatfilm ჟანრის ფილმებით დაიწყო. 1955-დან 1957 წლებამდე რომიმ განასახიერა ავსტრიის დედოფალი ელისაბედი ტრილოგიაში ″Sissi″.
1958 წელს შნაიდერი შეხვდა მისი ცხოვრების ყველაზე დიდი სიყვარულს ალენ დელონს, რომელთან ერთადაც 1963 წლამდე იყო.
მათი პირველი შეხვედრა ორლის აეროპორტში შედგა. „კრისტინას“ როლის შესასრულებლად რეჟისორმა ახალგაზრდა გერმანელი მსახიობი, რომი შნაიდერი მიიწვია. აეროპორტში რომის ახალგაზრდა მსახიობი კოსტიუმში გამოწყობილი ალენ დელონი, ვარდების თაიგულით ხელში დახვდა.
”როდესაც ის დავინახე, გავიფიქრე, რა ვულგარულია-მეთქი“ – ასე აღწერა რომი შნაიდერმა თავის დღიურში პირველ სიყვარულთან შეხვედრა.
გადაღებების დროს პარტნიორები გამუდმებით ჩხუბობდნენ, მაგრამ როდესაც გერმანიაში ფილმის პრემიერა დასრულდა და ალენი პარიზში გაფრინდა, რომიმ განშორებას ვერ გაუძლო, ბარგი ჩაალაგა და უკან დაბრუნდა.
23 წლის დელონი და 20 წლის შნაიდერი მალე ევროპის ყველაზე ლამაზ წყვილად იქცნენ. რომის უყვარდა ალენი და მის ბოჰემურ ცხოვრების წესს ეგუებოდა.
„მასში ყოველთვის ორი არსება ცხოვრობდა: ნაზი, დაუცველი თოჯინა და გულისამრევი გერმანელი ქალი. მე ვაღმერთებდი პირველს, მეზიზღებოდა მეორე ”- აღიარა ალენმა
რომი ცდილობდა ყურადღება არ მიექცია ჭორებისთვის, სანამ ერთ დღეს ფოტო არ ნახა, რომელიც სტატიას თან ერთო, მოღიმარი ალენი იყო გამოსახული, მის მუხლებზე კი სრულიად უცნობი ქერა ქალი იჯდა. რომი მაშინვე საფრანგეთში დაბრუნდა. პარიზში ჩასულს მხოლოდ ცარიელი ბინა დახვდა, მაგიდაზე კი, შავი ვარდების გვერდით წერილი, სიტყვებით – „თავისუფლება დაგიბრუნე. მუდამ ჩემს გულში იქნები.“
რთული პერიოდისგან რომი ფილმებმა გადაარჩინა. ყოფილმა ვარსკვლავურმა წყვილმა 1968 წელს ერთად ითამაშა ფილმში The Swimming Pool.
1966 წელს რომი რეჟისორ ჰარი მეიენზე დაქორწინა, რომელთანაც ვაჟი შეეძინა.
კიდევ ერთი წარუმატებელი ქორწინების შემდეგ, 1975 წელს რომი მესამედ დაოჯახდა და ცოლად დანიელ ბიასინს გაჰყვა, რომელთანაც ქალიშვილი სარა შეეძინა.
აღნიშნული ქორწინება რომისთვის კვლავ წარუმატებელი აღოჩნდა. წყვილი ერთმანეთს 1981 წელს დაშორდა.
1981 წელს ლეგენდარული მსახიობის ცხოვრებაში ყველაზე დიდი ტრაგედია მოხდა, როდესაც მისი 14 წლის ვაჟიშვილი გარდაიცვალა. მსახიობს არავის ნახვა არ სურდა. ერთადერთი, ვინც ნახა ალენ დელონი იყო. დევიდის დაკრძალვის შემდეგ ალენი სახლში დაბრუნდა, რომი კი ისევ მარტო დარჩა. დეპრესიაში ჩავარდნილი რომი 1982 წელს, 43 წლის ასაკში გარდაიცვალა.
გაზეთები დიდი მსახიობის თვითმკვლელობის შესახებ წერდნენ, მაგრამ ექიმებმა განაცხადეს, რომ სიკვდილი მოულოდნელი და ბუნებრივი იყო – მას გული გაუჩერდა.
