„კარდაშიანების“ შოუს მერვე სეზონის თრეილერში კიმ კარდაშიანმა ჯანმრთელობის პრობლემის შესახებ ისაუბრა და დიაგნოზი გაასაჯაროვა. როგორც ირკვევა, მას ეზოფაგიტი დაუდგინდა.
კადრს მიღმა მყოფი ადამიანი კიმს ეკითხება, ხომ არ არის ეს ის დაავადება, რომლის გამოც მამამისი გარდაიცვალა, რაზეც დადებით პასუხს იღებს. თრეილერში ემოციურ კრის ჯენერსაც ვხედავთ, რომელიც ამბობს, რომ ამ თემაზე საუბარი ტირილის სურვილს უჩენს.
ვიდეოში კიმი საავადმყოფოს ხალათშიც ჩანს, მოგვიანებით კი მას საკაცით გადაადგილებენ. თუმცა უცნობია, კონკრეტულად რა პროცედურა ჩაუტარდა და რამდენად მძიმე იყო მისი მდგომარეობა. კიმის ჯანმრთელობის პრობლემის შესახებ დამატებითი დეტალები, სავარაუდოდ, შოუს ახალ სეზონში გახდება ცნობილი.
ეზოფაგიტი საყლაპავის ქსოვილების ანთებაა. მისი გამომწვევი სხვადასხვა მიზეზი შეიძლება იყოს. მათ შორის ერთ-ერთი ყველაზე გავრცელებული კუჭის მჟავის საყლაპავში უკან ამოსვლაა, ანუ რეფლუქსი.
ხანგრძლივი ანთების შემთხვევაში შესაძლოა განვითარდეს ბარეტის საყლაპავი, რომელიც საყლაპავის კიბოს განვითარების რისკს ზრდის.
აღსანიშნავია, რომ კიმის მამა, რობერტ კარდაშიანი, 2003 წელს, 59 წლის ასაკში, საყლაპავის კიბოთი გარდაიცვალა.
თუმცა მნიშვნელოვანია, რომ ეზოფაგიტი და საყლაპავის კიბო ერთი და იგივე დაავადება არ არის. ამ ეტაპზე არ არსებობს ინფორმაცია, რომ კიმს კიბოს დიაგნოზი აქვს. თავად თრეილერიც მხოლოდ ეზოფაგიტის შესახებ საუბრობს.
ასევე დაგაინტერესებთ:
