SpaceX-ის IPO-მ ისტორიაში ერთ-ერთი ყველაზე მასშტაბური დებიუტი დააფიქსირა, რის შედეგადაც ილონ მასკი მსოფლიოს პირველი ოფიციალური ტრილიონერი გახდა.
SpaceX-მა Nasdaq-ზე ვაჭრობა 2.2 ტრილიონი დოლარის შეფასებით დაიწყო. მიუხედავად იმისა, რომ კომპანიის აქციების საწყისი ფასი 135 დოლარი იყო, ვაჭრობის გახსნისას ის 150 დოლარამდე გაიზარდა, ხოლო დღის განმავლობაში 176.50 დოლარსაც მიაღწია. საბოლოოდ, აქციები დაახლოებით 161 დოლარზე დაიხურა.
IPO-ს ფარგლებში SpaceX-მა ინვესტორებისა და ანდერაიტერებისგან 75 მილიარდი დოლარი მოიზიდა. კომპანიის წარმატებულმა ბირჟაზე გამოსვლამ ილონ მასკის ქონება რეკორდულ ნიშნულამდე გაზარდა. Bloomberg-ის მონაცემებით, მისი საერთო ქონება 1.11 ტრილიონ დოლარს შეადგენს, რაც მას ისტორიაში პირველ ტრილიონერად აქცევს.
მასკი SpaceX-ის 42%-ს ფლობს, რაც კომპანიაზე პრაქტიკულად სრულ კონტროლს ანიჭებს. მისი SpaceX-ის აქციების ღირებულება დაახლოებით 767 მილიარდ დოლარს შეადგენს, დამატებით 53.8 მილიარდ დოლარად არის შეფასებული მისი ოფციონები. ამასთან, მასკი ფლობს Tesla-ს 168 მილიარდი დოლარის ღირებულების აქციებსა და 116.4 მილიარდი დოლარის ოფციონებს.
ტრილიონი დოლარი ადამიანური ისტორიისთვის უპრეცედენტო სიმდიდრეა. აღსანიშნავია, რომ თუნდაც ადამიანი ყოველ საათში 1 მილიონ დოლარს ხარჯავდეს, ტრილიონი დოლარის დასახარჯად საუკუნეზე მეტი დრო დასჭირდებოდა.
მიუხედავად შთამბეჭდავი ციფრებისა, ექსპერტები აღნიშნავენ, რომ მასკის ქონების უდიდესი ნაწილი ე.წ. „ქაღალდის სიმდიდრეა“ – ის კომპანიის აქციების საბაზრო ღირებულებაზეა დამოკიდებული და არა ნაღდ ფულზე.
SpaceX-ის IPO მასკისთვის განსაკუთრებული მოვლენაა. SpaceX-ის IPO ილონ მასკისთვის განსაკუთრებული მოვლენაა – Tesla-ს ბირჟაზე გასვლიდან 16 წლის შემდეგ, მისი კიდევ ერთი კომპანია საჯარო ბაზარზე გამოჩნდა.
SpaceX ამერიკის ერთ-ერთ ყველაზე ძვირადღირებულ კომპანიად იქცა და ღირებულებით Tesla-სა და Meta-საც კი გაუსწრო. თუმცა შემოსავლების მიხედვით კომპანია ჯერ კიდევ მნიშვნელოვნად ჩამორჩება ტექნოლოგიურ გიგანტებს – 2025 წელს SpaceX-ის შემოსავალმა 18.67 მილიარდი დოლარი შეადგინა, მაშინ როდესაც Meta-ს შემოსავალი 200 მილიარდ დოლარს აღემატებოდა.
ბოლო წლებში მასკის ქონება სწრაფად იზრდებოდა, თუმცა ეს გზა ყოველთვის სტაბილური არ ყოფილა. 2022 წელს Tesla-ს აქციების მკვეთრმა ვარდნამ მისი ქონება მნიშვნელოვნად შეამცირა, თუმცა შემდგომ წლებში კომპანიის ღირებულებამ კვლავ რეკორდულ ნიშნულებს მიაღწია.
დღეს მასკი უკვე მნიშვნელოვნად უსწრებს სხვა მილიარდერებს. მისი სავარაუდო ქონება აღემატება ისეთი ბიზნესლიდერების ერთობლივ სიმდიდრესაც კი, როგორებიც არიან ჯეფ ბეზოსი, ლარი პეიჯი, სერგეი ბრინი და ლარი ელისონი.
SpaceX-ის წარმატებულმა IPO-მ კომპანია მსოფლიოს ერთ-ერთ ყველაზე ძვირადღირებულ საჯარო კომპანიად აქცია, ხოლო ილონ მასკმა კიდევ უფრო განიმტკიცა მსოფლიოს უმდიდრესი ადამიანის სტატუსი.
