განათლების სფეროს სჭირდება ინოვაცია, რომელიც ხშირად იწყება იქ, სადაც სხვადასხვა გამოცდილება ერთიანდება. ეკა ნუცუბიძის პროფესიული გზა გვაჩვენებს, თუ როგორ შეიძლება ერთი შეხედვით განსხვავებული სფეროები: ფინანსები, არასამთავრობო სექტორი და განათლება – ერთიან, წარმატებულ კონცეფციად გადაიქცეს. საბანკო სექტორის მკაცრმა დისციპლინამ, სიზუსტემ და პასუხისმგებლობამ ეკას ასწავლა პროცესების ეფექტურად და შედეგზე ორიენტირებულად მართვა, ხოლო არასამთავრობო ორგანიზაციაში მუშაობამ დაანახა ციფრების მიღმა თითოეულ იდეაში განვითარების შესაძლებლობა. ამ გამოცდილების საფუძველზე, ქალაქ ქუთაისში შეიქმნა „გენიოსთა აკადემია – Genius Academy“ საგანმანათლებლო სივრცე, სადაც სწავლა ემყარება არა მხოლოდ საგნობრივ ცოდნას, არამედ ბავშვის პროგრესის მუდმივ ანალიზსა და ინდივიდუალურ მიდგომას. „გენიოსთა აკადემია – Genius Academy“-ში ბავშვები, აკადემიურ დისციპლინასთან ერთად, სწავლობენ აზროვნებას, გადაწყვეტილების მიღებასა და საკუთარი შესაძლებლობების რწმენას, გამოიმუშავებენ უნარებს, რომელიც თანამედროვე სამყაროში ნებისმიერ ადამიანს სჭირდება.
შეგიძლიათ მოგვიყვეთ თქვენი კარიერის ძირითად ეტაპებზე საბანკო სექტორში? რა პასუხისმგებლობა გქონდათ და რა გამოცდილება მიიღეთ?
საბანკო სექტორში მუშაობა ჩემთვის პროფესიული დისციპლინის საუკეთესო სკოლა იყო. აქ მიღებული გამოცდილება პირდაპირ უკავშირდება მაღალ პასუხისმგებლობას, სიზუსტესა და ხარისხის მუდმივ კონტროლს. ჩემი საქმიანობა მოითხოვდა დეტალებზე ორიენტირებას და რთული პროცესების მართვას, სადაც შეცდომის დაშვების უფლება მინიმალურია. სწორედ ბანკმა მასწავლა, რომ ნებისმიერი წარმატებული საქმის საფუძველი გამართული სისტემა და კლიენტის (ამ შემთხვევაში მშობლისა და მოსწავლის) ნდობაა.
რა ცოდნა დაგრჩათ არასამთავრობო სექტორში (Scouts of Georgia) მუშაობისგან და როგორ გამოიყენეთ ეს გამოცდილება შემდგომში?
სკაუტურ ორგანიზაციაში მცირე და საშუალო ბიზნესიდეების ექსპერტ-შემფასებლად მუშაობამ სრულიად სხვა რაკურსით დამანახა განვითარების პოტენციალი. მე ვსწავლობდი იდეების „გაცოცხლებას“, მათი მდგრადობის შეფასებას და სტრატეგიულ დაგეგმვას. ამ გამოცდილებამ მასწავლა, თუ როგორ უნდა დავინახო პოტენციალი იქ, სადაც სხვები მხოლოდ ციფრებს ხედავენ. დღეს, როცა მოსწავლეს ვუყურებ, მას აღვიქვამ როგორც უნიკალურ „პროექტს“, რომელსაც წარმატებისთვის სწორი ინვესტიცია და მენტორობა სჭირდება.
როგორ ჩამოყალიბდა თქვენში ინტერესი განათლების სფეროს მიმართულებით?
ინტერესი მაშინ გაჩნდა, როცა დავინახე აშკარა დისბალანსი: ბავშვებს აქვთ უდიდესი პოტენციალი, მაგრამ ხშირად აკლიათ სისტემური მიდგომა და მოტივაცია. მივხვდი, რომ ჩემი ბიზნესანალიტიკური ხედვა და სტრუქტურირებული მუშაობის სტილი საუკეთესოდ მოერგებოდა საგანმანათლებლო გარემოს. მინდოდა შემექმნა ადგილი, სადაც სწავლა იქნებოდა არა ქაოსური პროცესი, არამედ მიზანმიმართული გზა წარმატებისკენ.
რა იყო „გენიოსთა აკადემია – Genius Academy“-ს შექმნის მოტივაცია?
მთავარი მოტივაცია იყო რწმენა, რომ ყველა ბავშვი თავისებურად გენიოსია. მე მინდოდა დამემტკიცებინა, რომ სწორი მენეჯმენტით, კვალიფიციური პედაგოგებითა და ინდივიდუალური მიდგომით, ნებისმიერი მოსწავლე შეძლებს მაღალი აკადემიური შედეგების მიღწევას.
რა პრობლემებს ან საჭიროებებს პასუხობს თქვენი აკადემია განათლების სფეროში?
ჩვენ ვპასუხობთ ორ მთავარ გამოწვევას: ხარისხიან აკადემიურ მომზადებასა და დროის ეფექტურ მართვას. მშობლებს ხშირად არ აქვთ დრო, რომ შვილებს გაკვეთილების მომზადებაში დაეხმარონ, რეპეტიტორებთან სიარული კი ხშირად არაორგანიზებულია. „გენიოსთა აკადემია – Genius Academy“ არის ერთიანი სივრცე, სადაც ბავშვი ფუნდამენტურ საგნებს: ქართულს, მათემატიკას, ინგლისურს,რუსულს და ქიმიას კომპლექსურად და მაღალი სტანდარტების დაცვით ეუფლება.
როგორ განვითარდა იდეა და როგორ იქცა საბოლოოდ რეალობად?
იდეა დაიწყო როგორც ბიზნესგეგმა, რომელიც ჩემს ექსპერტულ გამოცდილებას ეყრდნობოდა. პირველივე დღიდან აქცენტი გავაკეთე ხარისხზე და არა რაოდენობაზე. თუმცა, სწორმა მიდგომამ შედეგი მალევე გამოიღო და დღეს ჩვენ უკვე 100-მდე მოსწავლე გვანდობს თავის მომავალს, რაც იმას ნიშნავს, რომ კონცეფციამ გაამართლა.
რა სახის უნარებსა და ცოდნას იძენენ მოსწავლეები თქვენს აკადემიაში?
გარდა იმისა, რომ ბავშვები საფუძვლიანად სწავლობენ ქართულს, მათემატიკას, ინგლისურს,რუსულს, ქიმიას, ჩვენ ვმუშაობთ მათ „რბილ უნარებზეც“ (soft skills). ისინი სწავლობენ ლოგიკურ აზროვნებას, დროის მენეჯმენტს, დამოუკიდებლად მუშაობას და, რაც მთავარია, საკუთარი თავის რწმენას. ჩვენთან სწავლა ნიშნავს მომზადებას არა მხოლოდ სკოლისთვის, არამედ რეალური ცხოვრებისეული გამოწვევებისთვის.
რა არის თქვენი სასწავლო პროგრამების უნიკალურობა ან განსხვავებულობა სხვა ცენტრებისგან?
ჩვენი უნიკალურობა „ბიზნესსიზუსტეშია“. ჩვენ გვაქვს თითოეული მოსწავლის პროგრესის მონიტორინგის სისტემა. ჩვენ არ ვართ უბრალოდ „გაკვეთილების მომზადების ცენტრი“, ჩვენ ვართ ადგილი, სადაც სასწავლო პროცესი ინდივიდუალურ საჭიროებებზეა მორგებული. ჩვენი პედაგოგები მენტორები არიან, რომლებიც ბავშვებს ანალიტიკურ აზროვნებას ასწავლიან.
რა იყო ყველაზე დიდი გამოწვევა აკადემიის დაფუძნებისა და მართვის პროცესში?
ყველაზე დიდი გამოწვევა იყო ნდობის მოპოვება და სწორი გუნდის ჩამოყალიბება. განათლების სფეროში რეპუტაცია ყველაფერია. მე უნდა დამემტკიცებინა მშობლებისთვის, რომ ჩემი საბანკო და ბიზნესგამოცდილება იყო გარანტია იმისა, რომ მათი შვილები საუკეთესო ხელში იქნებოდნენ.
რა შედეგები ან მიღწევები გეამაყებათ ყველაზე მეტად სამი წლის განმავლობაში?
ყველაზე მეტად მეამაყება ის 100-მდე ბედნიერი მოსწავლე და მადლიერი მშობელი, რომლებიც ჩვენი აკადემიის გარშემო გაერთიანდნენ. ასევე ის ფაქტი, რომ ბავშვებს, რომლებსაც ადრე სწავლა არ უყვარდათ, დღეს აკადემიაში მოსვლა უხარიათ. ეს არის ჩემი ყველაზე დიდი „დივიდენდი“.
როგორ დაუკავშირდა თქვენი საბანკო და არასამთავრობო გამოცდილება განათლების სფეროს?
ეს იყო სინერგია: ბანკმა მომცა სისტემურობა, სკაუტებმა – ინოვაციების დანახვის უნარი, ხოლო განათლებამ – ამ ყველაფრის რეალიზების საშუალება. მე დღეს განათლების სფეროს ვმართავ როგორც მაღალტექნოლოგიურ და ხარისხიან ბიზნესპროექტს, სადაც მთავარი ღირებულება ადამიანი და მისი განვითარებაა.
რა გეგმები გაქვთ აკადემიის გაფართოების ან ახალი პროგრამების დანერგვის მხრივ?
ვგეგმავთ პროგრამების არეალის გაფართოებას, კრიტიკული აზროვნების და შესაძლოა, სამომავლოდ ფინანსური წიგნიერების ელემენტების შეტანასაც, რაც ბავშვებს ადრეული ასაკიდანვე დაეხმარება სწორი გადაწყვეტილებების მიღებაში. ჩვენი მიზანია „გენიოსთა აკადემია – Genius Academy“ გახდეს ხარისხის ეტალონი განათლებაში.
რა რჩევას მისცემდით მომავალ დამფუძნებლებს, რომლებიც განათლების ინოვაციებზე ფიქრობენ?
ჩემი რჩევაა: ნუ შეგეშინდებათ სხვა სფეროდან მიღებული გამოცდილების განათლებაში გადმოტანის. ინოვაცია ხშირად სწორედ სხვადასხვა სფეროს გადაკვეთაზე იბადება. და რაც მთავარია – იყავით შედეგზე ორიენტირებულები და არასოდეს დათმოთ ხარისხი დროებითი სარგებლის გამო.
ტექსტი: თათია ხარაიშვილი
ფოტო: ლანა ვახტანგაძე
