ხათო ბაკურაძე – ბრენდშეფი
ხათო, გვიამბეთ თქვენი მიღებული ცოდნისა და გამოცდილების შესახებ კულინარიაში.
დავამთავრე საქართველოს კულინარიის აკადემია, გავიარე შეფმზარეულისა და კონდიტერიის 6-თვიანი შემსწავლელი კურსები. კვალიფიკაციის ასამაღლებლად სწავლა კიევის კულინარიის აკადემიაში განვაგრძე საკონდიტრო მიმართულებით. ამის შემდეგ საფრანგეთში გავიარე სტაჟირება DGF-ის საკონდიტრო სკოლაში. 2019 წელს მონაწილეობა მივიღე Le journal du patissier-ის მიერ ორგანიზებულ მსოფლიო ჩემპიონატზე, სადაც ვიასპარეზე 6 საუკეთესო მონაწილეს შორის და საქართველოში პროფესიონალი კონდიტერის სტატუსით დავბრუნდი.
რას მოიცავს თქვენი ამჟამინდელი საქმიანობა?
ვმუშაობ საკონდიტრო პრემიუმ ხაზით, რომელიც მოიცავს ფრანგულ დესერტებს და არის აბსოლუტურად ინოვაციური, ახალი, თანამედროვე სტანდარტი. ვმუშაობდი ერთ-ერთ ცნობილ რესტორანში, ასევე, ქსელურ საკონდიტროსთან. ამჯერად ვთანამშრომლობ სხვადასხვა ტიპის კაფე-რესტორნებთან და დაწესებულებებთან, ვქმნი საკონდიტრო მენიუებს, კონსულტაციებს ვუწევ საკონდიტროებს და ვეხმარები კადრის გადამზადებაში.
გვიამბეთ კაფეზე, რომელიც ძალიან მალე იქნება ხელმისაწვდომი.
დიახ, ამ ეტაპზე ვხსნი საკუთარ კაფე-რესტორანს შევჩენკოს პირველ ნომერში, სადაც გარდა საკონდიტროსი, იქნება მცირე მენიუც. კაფეს სახელწოდება − DuChef ფრანგული დასახელებაა, რომელიც ქართულად ნიშნავს „შეფისგან“ და ნათელია, რომ წარმოდგენილი იქნება საავტორო დესერტები შეფისგან. სტუმრებს საკუთარი თვალით შეუძლიათ იხილონ მომზადების პროცესი.
ეს იქნება სახელოსნო ლაბორატორია, ხელოვნების კუთხე თბილისში – სივრცე, სადაც იმუშავებს ძალიან გამოცდილი გუნდი და შემოგვთავაზებენ ინოვაციურ მენიუს.
ხათო, თქვენ ასევე ხელმძღვანელობთ საკონდიტრო სკოლას. გვიამბეთ ამის შესახებ.
იგივე სივრცეში, საღამოს საათებში ჩატარდება ინტენსიური ერთთვიანი საკონდიტრო კურსები. ძალიან ინდივიდუალური მიდგომა და სწავლება გვაქვს. თითო ჯგუფში 6 მოსწავლეა გათვალისწინებული, რომლებსაც ჩემი ასისტენტისა და დამხმარე ქალბატონის დახმარებით, მაქსიმალურად კომფორტულ გარემოში უწევთ დავალებების შესრულება და დროს არ კარგავენ ტექნიკურ დეტალებზე. დიდი მოთხოვნიდან და ინტერესიდან გამომდინარე, მომდევნო 6-7 თვე სრულად შევსებულია. კურსი არის როგორც დამწყებთათვის, ასევე პროფესიონალი კონდიტერებისთვის. მსურველები ერთი თვის განმავლობაში ეუფლებიან 25 სახეობის კომბინირებულ და მრავალკომპონენტიან დესერტებს.
სამომავლოდ ვგეგმავთ სკოლის გაფართოებას ლექტორებთან და ჩემს საკონდიტრო გუნდთან ერთად, რათა შევძლოთ უფრო მეტი მოსწავლის მიღება.
