პრინცმა ჰარიმ 2006 წელს, ლესოთოს პრინც სეისოსთან ერთად, დედის — პრინცესა დაიანას — საქველმოქმედო მემკვიდრეობის პატივსაცემად დააარსა ორგანიზაცია Sentebale. პრინცესა დაიანა ყოველთვის იყო ცნობილი როგორც ჰუმანიტარული საქმიანობის ერთ-ერთი ყველაზე გავლენიანი ფიგურა სამეფო ოჯახის ისტორიაში. ის აქტიურად იბრძოდა აივ/შიდსით მცხოვრები ადამიანების სტიგმის წინააღმდეგ იმ პერიოდში, როდესაც დაავადება საზოგადოების მხრიდან ძლიერ შიშსა და იზოლაციას იწვევდა. დაიანა პირადად ხვდებოდა პაციენტებს, ეხებოდა მათ ხელით და ამით საზოგადოებას უჩვენებდა, რომ დაავადებულებთან კონტაქტი უსაფრთხოა — ეს ჟესტი იმ დროისთვის ძლიერ სიმბოლურ ნაბიჯად იქცა.
სწორედ დედის ეს ჰუმანიტარული ხედვა გახდა პრინც ჰარისთვის შთაგონების წყარო, როდესაც მან ახალგაზრდობაში ლესოთოში მოგზაურობისას დაავადებული ბავშვების მდგომარეობა საკუთარი თვალით ნახა. ორგანიზაციის სახელიც სიმბოლურია — სესოთოს ენაზე „Sentebale“ ნიშნავს „არ დამივიწყო“– ს და როგორც ჰარიმ განმარტა, იგი შერჩეულია როგორც მათი დედების საქველმოქმედო საქმიანობისადმი მიძღვნილი პატივისთვის და შეხსენებად, რომ მსოფლიომ არ დაივიწყოს ლესოთო და მისი ბავშვები.
Sentebale-ის მთავარი მიზანია დახმარება გაუწიოს აივ/შიდსით მცხოვრებ ბავშვებსა და მოზარდებს სამხრეთ აფრიკაში. ორგანიზაცია მათ არა მხოლოდ სამედიცინო და საგანმანათლებლო მხარდაჭერას სთავაზობს, არამედ უსაფრთხო გარემოსაც ქმნის, სადაც ახალგაზრდები თანატოლებთან ერთად მუშაობენ ფსიქიკური ჯანმრთელობის გაძლიერებაზე და იღებენ ცოდნასა და უნარებს, რომლებიც მომავალში დამოუკიდებლად ცხოვრებაში დაეხმარებათ.
ლესოთოში აივ ინფექციის გავრცელების ერთ-ერთი ყველაზე მაღალი მაჩვენებელია მსოფლიოში — 14 წლამდე ასაკის 37 000-ზე მეტი ბავშვი აივ-ით ცხოვრობს, ქვეყანაში კი დაახლოებით 360 000 ობოლია. ბავშვების თითქმის 10 პროცენტი მოწყვლად ჯგუფად ითვლება. სწორედ ამ გამოწვევებთან საბრძოლველად მუშაობს Sentebale, რომელიც საზოგადოებაზე დაფუძნებული განვითარების მოდელს იყენებს და ადგილობრივი თემების რეალურ საჭიროებებს ეხმიანება. ორგანიზაციამ საქმიანობა მოგვიანებით ბოტსვანაშიც გააფართოვა, ხოლო მისი მხარდასაჭერად ყოველწლიურად იმართება Sentebale Polo Cup, რომელშიც პრინცი ჰარი ხშირად მონაწილეობდა.
თუმცა, წლების შემდეგ ორგანიზაციაში სერიოზული შიდა დაპირისპირება დაიწყო. უთანხმოებები 2023 წელს ახალი საქველმოქმედო ფონდების მოზიდვის სტრატეგიის გარშემო გაჩნდა და კონფლიქტი ორგანიზაციის ხელმძღვანელობასა და მმართველთა საბჭოს თავმჯდომარეს, სოფი ჩანდაუკას შორის გამწვავდა. ვითარება საბოლოოდ 2025 წლის მარტში კრიზისად გადაიქცა — პრინცმა ჰარიმ და პრინცმა სეისომ, რამდენიმე მმართველთან ერთად, მფლობელთა პოზიციები დატოვეს. მათი განცხადებით, საბჭოსა და თავმჯდომარეს შორის ურთიერთობა „გამოსწორებას აღარ ექვემდებარებოდა“ და გადაწყვეტილება გადადგომის შესახებ სოლიდარობის ნიშნად მიიღეს იმ წევრების მიმართ, რომლებმაც შიდა დავის გამო თანამდებობები დატოვეს.
მოგვიანებით კონფლიქტი საჯარო სივრცეში გადავიდა. სოფი ჩანდაუკამ პრინცი ჰარი ბულინგისა და შევიწროების კამპანიის ორგანიზებაში დაადანაშაულა და განაცხადა, რომ მისი გადადგომა მოულოდნელი იყო. მისი თქმით, ჰარი ასევე ჩაერია ორგანიზაციის წინააღმდეგ შეტანილ მამხილებლის საჩივარში, რაც „დაფარვის მცდელობას“ ჰგავდა.
საქმე კიდევ უფრო გამწვავდა მას შემდეგ, რაც აფრიკაში მოქმედმა საქველმოქმედო ორგანიზაციამ ლონდონის უმაღლეს სასამართლოში პრინც ჰარისა და მისი ახლო მეგობრის, ორგანიზაციის მმართველის, მარკ დაიერის წინააღმდეგ ცილისწამების სარჩელი შეიტანა. Sentebale აცხადებს, რომ 2025 წლის მარტიდან დაწყებულმა კოორდინირებულმა ნეგატიურმა მედია კამპანიამ ორგანიზაციის საქმიანობასა და რეპუტაციას მნიშვნელოვანი ზიანი მიაყენა.
ჰარისა და დაიერის წარმომადგენლები ბრალდებებს კატეგორიულად უარყოფენ და მათ „შეურაცხმყოფელსა და უსაფუძვლოს“ უწოდებენ.
ინგლისისა და უელსის საქველმოქმედო კომისიამ დავა შეისწავლა და ორივე მხარე გააკრიტიკა იმის გამო, რომ კონფლიქტი საჯაროდ განვითარდა და ორგანიზაციის იმიჯი დააზიანა, თუმცა გამოძიებამ ბულინგისა და მიზოგინიის ფართომასშტაბიანი მტკიცებულებები ვერ დაადგინა. კომისიის განცხადებით, დაპირისპირებამ საფრთხე შეუქმნა იმ ადამიანების დახმარებას, ვისთვისაც Sentebale შეიქმნა. ამ ეტაპზე სამართლებრივი დავა გრძელდება და პრინც ჰარის ოფისს დამატებითი კომენტარი ჯერ არ გაუკეთებია.
