ბრედლი კუპერმა და ჯიჯი ჰადიდმა პარიზში სეირნობისას კვლავ მიიპყრეს საზოგადოების ყურადღება. წყვილი, რომელიც უკვე რამდენიმე წელია ურთიერთობაშია, პირველად გამოჩნდა კოორდინირებული ბეჭდებით, რამაც მათი შესაძლო ქორწინების შესახებ გავრცელებული ხმები კიდევ უფრო გააძლიერა.
განსაკუთრებული ინტერესი გამოიწვია მათმა საქორწინო ბეჭდებმა, რომლებიც ფრანგული საიუველირო სახლის Boucheron-ის კოლექციიდან არის.
ჯიჯი ჰადიდმა არჩევანი Quatre Radiant Edition Wedding Band-ზე შეაჩერა. ყვითელი ოქროსა და ბრილიანტებით გაფორმებული ბეჭდის ღირებულება 6 450 დოლარია. ბრენდის ოფიციალური აღწერის მიხედვით, ეს არის „საიუველირო ყუთის აუცილებელი ნაწილი, რომელიც შეიძლება ატაროთ დღე-ღამეში ნებისმიერ დროს და, შესაძლოა, მთელი სიცოცხლის განმავლობაშიც.“
რაც შეეხება ბრედლი კუპერს, მსახიობს უკეთია Godron Pink Gold Wedding Band – ვარდისფერი ოქროს ორმაგი დიზაინის ბეჭედი, რომლის ღირებულება 2 120 დოლარს შეადგენს. Boucheron-ის განმარტებით, მისი მომრგვალებული ფორმა მარადიულობას გამოხატავს და „სიმბოლოა იმ სიყვარულისა, რომელიც ორ ადამიანს ერთმანეთთან აკავშირებს.“
ბეჭდების გამოჩენის შემდეგ სოციალურ ქსელებში მაშინვე გაჩნდა ვარაუდი, რომ წყვილმა შესაძლოა საიდუმლოდ იქორწინა, თუმცა ამ ეტაპზე არც ბრედლი კუპერს და არც ჯიჯი ჰადიდს ინფორმაცია ოფიციალურად არ დაუდასტურებიათ. კომენტარი ჯერჯერობით არც Boucheron-ს გაუკეთებია.
:max_bytes(150000):strip_icc()/GigiBradleyLead-4c01b103787d4b8587323a1b51458510.jpg)
მათი სიყვარულის ისტორია
ჯიჯი ჰადიდისა და ბრედლი კუპერის ურთიერთობა 2023 წლის ოქტომბერში დაიწყო. ისინი საერთო მეგობრის შვილის დაბადების დღეზე შეხვდნენ და მას შემდეგ ცდილობენ პირადი ცხოვრება საზოგადოების ყურადღებისგან მაქსიმალურად შორს შეინარჩუნონ.
მიუხედავად ამისა, ისინი ხშირად ესწრებიან მნიშვნელოვან ღონისძიებებს, მათ შორის Met Gala-ს, ასევე არაერთხელ დააფიქსირეს ნიუ-იორკის ქუჩებში ერთად.
ორივე ვარსკვლავი მშობელია. ჯიჯი ჰადიდს ყოფილი პარტნიორის, ზეინ მალიკისგან, ქალიშვილი ქაი ჰყავს, ხოლო ბრედლი კუპერს მსახიობ ირინა შეიკისგან – ქალიშვილი ლეა.
PEOPLE-ის მიერ 2025 წელს გავრცელებული ინფორმაციის თანახმად, ქაი და ლეა დროს ერთად ატარებენ, ხოლო წყვილის ახლობლების თქმით, მიუხედავად დატვირთული სამუშაო გრაფიკისა, ჰადიდი და კუპერი ურთიერთობასა და შვილებს ყოველთვის პრიორიტეტად მიიჩნევენ.
ახლა კი საზოგადოების მთავარი კითხვა უცვლელია – ნიშნობისა და ქორწილის შესახებ გავრცელებული ხმები რეალობაა თუ მხოლოდ ელეგანტურმა ბეჭდებმა გააჩინა ახალი სპეკულაცია.
