სტომატოლოგია, სოციალური პასუხისმგებლობა, მეწარმეობა და საერთაშორისო გამოცდილება – ანა შარვაძე იმ ადამიანებს შორისაა, რომლებმაც პროფესიული გზა ერთ სფეროს არ დაუკავშირეს და წარმატება მრავალმხრივ საქმიანობად აქციეს. საქართველოდან დაწყებული კარიერა ამერიკის შეერთებულ შტატებში განაგრძო, სადაც საკუთარი ადგილი არა მხოლოდ სამედიცინო, არამედ ბიზნესსა და სოციალურ სფეროშიც დაიმკვიდრა. დღეს ის რამდენიმე კომპანიის დამფუძნებელი და ქართულ-ამერიკული სტომატოლოგიური კვლევითი ცენტრის (GAD) ხელმძღვანელია. როგორ დაიწყო ეს გზა და რა ეტაპებმა განაპირობა მისი დღევანდელი საქმიანობა, ამის შესახებ ანა შარვაძე თავად გვიყვება.
ანა, გვიამბეთ თქვენი პროფესიული ისტორიის შესახებ. როგორ დაიწყო თქვენი გზა აშშ-ში და რა ეტაპებმა მიგიყვანათ დღევანდელ საქმიანობამდე?
– ჩემი პროფესიული გზა საქართველოში დაიწყო, სადაც სტომატოლოგიური განათლება მივიღე და მედიცინის სფეროში პირველი ნაბიჯები გადავდგი. მოგვიანებით ამერიკის შეერთებულ შტატებში გადავედი, სადაც სრულიად ახალ გარემოში მომიწია საკუთარი თავის დამკვიდრება და კარიერის თავიდან აშენება.
ამერიკაში საქმიანობა როგორც სტომატოლოგიურ, ასევე სოციალურ სფეროში განვაგრძე. ვმუშაობდი აუტიზმის მქონე ბავშვებისა და ხანდაზმულების მხარდაჭერის მიმართულებით, რადგან ყოველთვის მჯეროდა, რომ პროფესიული წარმატება მხოლოდ პირად მიღწევებში არ იზომება – ის ადამიანების ცხოვრების გაუმჯობესებაში უნდა აისახოს. სწორედ ამ იდეამ მომცა მოტივაცია, დამეფუძნებინა საკუთარი ამბულატორიული მოვლის კომპანია, რომლის მიზანიც იყო სოციალური პასუხისმგებლობის მქონე პროფესიონალების გაერთიანება და იმ ადამიანების დახმარება, ვისაც ყველაზე მეტად სჭირდებოდა მხარდაჭერა.
მოგვიანებით, სრულიად დამოუკიდებლად შევქმენი სატრანსპორტო კომპანია, რომელიც აშშ-ის მასშტაბით სატვირთო გადაზიდვების სფეროში ოპერირებს. ეს იყო კიდევ ერთი მნიშვნელოვანი ნაბიჯი ჩემს პროფესიულ გზაზე, რომელმაც მომცა შესაძლებლობა არა მხოლოდ წარმატებული ბიზნესი შემექმნა, არამედ მრავალი ადამიანისთვის სამუშაო ადგილი და განვითარების შესაძლებლობა შემეთავაზებინა.
მიუხედავად სხვადასხვა სფეროში საქმიანობისა, არასდროს დამიკარგავს კავშირი ჩემს მთავარ პროფესიასთან – სტომატოლოგიასთან. სწორედ მრავალწლიანი საერთაშორისო გამოცდილების, ცოდნისა და ხედვის გაერთიანების შედეგად დავაფუძნე ქართულ-ამერიკული სტომატოლოგიური კვლევითი ცენტრი (GAD), რომელიც დღეს თანამედროვე ტექნოლოგიების, ამერიკული სტანდარტებისა და ქართული პროფესიონალიზმის ერთიან მაგალითს წარმოადგენს.
დღეს ვარ რამდენიმე კომპანიის დამფუძნებელი და ჩემი მთავარი მიზანია, როგორც საქართველოში, ისე ამერიკაში, შევქმნა პროექტები, რომლებიც ადამიანების ჯანმრთელობას, კეთილდღეობასა და პროფესიულ განვითარებას ემსახურება. მჯერა, რომ წარმატება მხოლოდ პირადი მიღწევა არ არის. წარმატებაა, როდესაც შენი საქმიანობით სხვებისთვისაც ქმნი შესაძლებლობებს და დადებით ცვლილებებს.
რას ნიშნავს თქვენთვის სოციალური მუშაკის პროფესია და რატომ აირჩიეთ სწორედ ეს სფერო?
სოციალური მუშაკის პროფესია ჩემთვის, პირველ რიგში, ადამიანების მხარდაჭერას, თანადგომასა და პასუხისმგებლობას ნიშნავს. ამ სფერომ მომცა შესაძლებლობა ყოველდღიურად მეხილა, როგორ შეუძლია ერთ ადამიანს სხვისი ცხოვრების უკეთესობისკენ შეცვლა. სწორედ ამ ადამიანურმა მხარემ მომხიბლა და დამანახვა, რომ პროფესია მხოლოდ სამსახური არ არის – ეს არის მისია.
რომელმა გამოცდილებამ მოახდინა ყველაზე დიდი გავლენა თქვენს პიროვნულ და პროფესიულ განვითარებაზე?
ყველაზე დიდი გავლენა ემიგრაციამ მოახდინა. უცხო ქვეყანაში ცხოვრების დაწყება, საკუთარი თავის თავიდან დამკვიდრება, განსხვავებულ კულტურასთან ადაპტაცია და პროფესიული გზის ხელახლა აშენება უდიდესი სკოლა აღმოჩნდა. ამ გამოცდილებამ მასწავლა გამძლეობა, პასუხისმგებლობა და ის, რომ შეუძლებელი, ხშირად, მხოლოდ დროებითი სირთულეა.
რომელ მიღწევას მიიჩნევთ თქვენს კარიერაში ყველაზე მნიშვნელოვანად და რატომ?
ყველაზე მნიშვნელოვან მიღწევად მივიჩნევ იმას, რომ შევძელი სხვადასხვა სფეროში მიღებული საერთაშორისო გამოცდილების გაერთიანება და მისი საქართველოში გადმოტანა. განსაკუთრებული სიამაყით ვუყურებ ქართულ-ამერიკული სტომატოლოგიური კვლევითი ცენტრის შექმნას, რომელიც თანამედროვე ტექნოლოგიების, ამერიკული სტანდარტებისა და ქართული პროფესიონალიზმის სინთეზია.
როგორ ახერხებთ დატვირთული პროფესიული საქმიანობისა და პირადი ცხოვრების დაბალანსებას?
ეს ყოველთვის მარტივი არ არის, თუმცა ვცდილობ სწორად დავგეგმო დრო და პრიორიტეტები. ჩემთვის მნიშვნელოვანია ოჯახისთვის, შვილისთვის და საკუთარი თავისთვის დროის გამოყოფა. მჯერა, რომ პროფესიული წარმატება სრულფასოვანი ვერ იქნება, თუ პირად ცხოვრებაში ჰარმონია არ არსებობს.
ვინ ან რა არის თქვენი მთავარი მოტივაცია, რომელიც წინსვლის ძალას გაძლევთ?
ჩემი მთავარი მოტივაცია ჩემი შვილი, ჩემი ოჯახი და ის ადამიანები არიან, ვისთვისაც ჩემს საქმიანობას მნიშვნელობა აქვს. ასევე, მოტივაციას მაძლევს სურვილი, რომ საქართველოში ხარისხიანი და თანამედროვე სერვისების განვითარებაში ჩემი წვლილი შევიტანო.
ანა, რა ღირებულებებით ხელმძღვანელობთ ყოველდღიურ ცხოვრებასა და პროფესიულ საქმიანობაში?
პასუხისმგებლობა, პატიოსნება, შრომისმოყვარეობა და ადამიანების მიმართ პატივისცემა არის ის ძირითადი ღირებულებები, რომლებიც ჩემს ყველა გადაწყვეტილებას განსაზღვრავს. მჯერა, რომ წარმატება სწორედ ამ პრინციპებზე შენდება.
როგორია თქვენთვის წარმატების განმარტება და რას ნიშნავს იყო წარმატებული ქალი საერთაშორისო გარემოში?
წარმატება მხოლოდ ფინანსური ან პროფესიული მიღწევა არ არის. წარმატება არის შესაძლებლობა, რომ შენი საქმიანობით ადამიანებისთვის ღირებული იყო, განვითარება არ შეწყვიტო და საკუთარი პრინციპები შეინარჩუნო. საერთაშორისო გარემოში წარმატებული ქალი ნიშნავს ადამიანს, რომელიც საკუთარ ფესვებს არ კარგავს და ამავდროულად მსოფლიო სტანდარტებთან თანაბრად ვითარდება.
რა პროექტებზე მუშაობთ ამჟამად და რა გეგმები გაქვთ უახლოეს მომავალში?
ამჟამად აქტიურად ვმუშაობ ქართულ-ამერიკული სტომატოლოგიური კვლევითი ცენტრის განვითარებაზე, ასევე სოციალურ და საგანმანათლებლო პროექტებზე, რომლებიც ბავშვების სტომატოლოგიურ ჯანმრთელობას უკავშირდება. ერთ-ერთი მნიშვნელოვანი ინიციატივაა მობილური სტომატოლოგიური პროექტი, რომლის მეშვეობითაც ბავშვებთან ადგილზე ვახორციელებთ პროფილაქტიკურ სკრინინგებს. უახლოეს გეგმებში შედის საერთაშორისო პარტნიორობების გაფართოება და საქმიანობის განვითარება როგორც საქართველოში, ისე ამერიკაში.
რას ურჩევდით ახალგაზრდა ქალებს, რომლებიც საკუთარი კარიერის შექმნასა და საერთაშორისო სივრცეში თავის დამკვიდრებას ცდილობენ?
არ შეგეშინდეთ სირთულეების. ისწავლეთ მუდმივად, ირწმუნეთ საკუთარი შესაძლებლობების და არასდროს დანებდეთ პირველ წარუმატებლობას. ხშირად ყველაზე დიდი წარმატება სწორედ იმ ნაბიჯის შემდეგ მოდის, როდესაც გგონიათ, რომ გზა დასრულდა.
რას ნიშნავს თქვენთვის იყო ქართველი ქალი უცხო ქვეყანაში და საკუთარი საქმიანობით ღირსეულად წარმოადგინო საქართველო?
ეს დიდი პასუხისმგებლობაა. ყოველთვის ვცდილობ ჩემი საქმიანობით ვაჩვენო, რომ ქართველი ქალები განათლებულები, შრომისმოყვარეები და წარმატების მიღწევის უნარის მქონენი არიან. ჩემთვის მნიშვნელოვანია, რომ სადაც არ უნდა ვიყო, ღირსეულად წარმოვადგინო ჩემი ქვეყანა და კულტურა.
და ბოლოს, რა არის მთავარი გზავნილი, რომლის გაზიარებაც გსურთ ჩვენი ჟურნალის მკითხველისთვის?
არასდროს დაკარგოთ საკუთარი თავის რწმენა. ცხოვრების ნებისმიერ ეტაპზე შესაძლებელია ახალი დასაწყისი, ახალი მიზნების დასახვა და მათი მიღწევა. ყველაზე მნიშვნელოვანია არ შეწყვიტოთ განვითარება, შეინარჩუნოთ ადამიანობა და ყოველთვის გახსოვდეთ, რომ წარმატების უკან დგას შრომა, მოთმინება და სიყვარული იმ საქმის მიმართ, რასაც აკეთებთ.
ტექსტი: მარიამ ირემაძე
ფოტო: ნინი გორდაძე
