დღეს ქეით მიდლტონის დაბადების დღეა. უელსის პრინცესა, პრინცი უილიამის მეუღლე და ბრიტანეთის მომავალი დედოფალი 1982 წლის 9 იანვარს, რიდინგში დაიბადა. სულ ახლახან, Vogue -მა ქეით მიდლტონი 2025 წლის ყველაზე მოდურ ცნობილ ადამიანად აღიარა. საიდუმლოს არ წარმოადგენს, რომ პრინცესა, რომელსაც სამშობლოში ინგლისური მოდის ეტალონად მიიჩნევენ, ხელიდან არ უშვებს შანსს, გარდაცვლილი დედამთილის, პრინცესა დიანას სტილი მოირგოს, რომელიც უზადო გემოვნებით გამოირჩეოდა. ერთად გავიხსენოთ ლუქები, რომლებითაც პრინცესა ქეითმა პრინცესა დიანას სტილი გააცოცხლა.
ორივე მათგანი ბრიტანელების განსაკუთრებული სიყვარულით სარგებლობს და ორივე სტილის ხატად მიიჩნევა, ამიტომ ყველამ შენიშნა, რომ ელეგანტური თეთრი ლუქი თავსაბურავით, რომელიც ქეითმა 2012 წელს მალაიზიაში მოირგო, ძალიან წააგავს პრინცესა დაიანას სამოსს, რომელიც 1996 წელს, პაკისტანში ვიზიტის დროს ეცვა. განსხვავება მხოლოდ ისაა, რომ ქეითის შემთხვევაში სახელოები უფრო გამჭვირვალეა, ღილები კი უფრო დახვეწილი.
1986 წელს, იაპონიაში ვიზიტისას, კიოტოში გამართულ საზეიმო საღამოზე დაიანას Zandra Rhodes-ის კაბა ეცვა. მსგავსი, Jenny Packham-ის ბრჭყვიალა კაბა ქეითმა 2011 წელს, ARK-ის გალა-საღამოსთვის შეარჩია. ეს უბრალო დამთხვევაა, თუ დაიანას სტილმა არა მხოლოდ ქეითი, არამედ მოდის დიზაინერებიც შთააგონა?
2022 წელს, უიმბლდონის ტურნირის მეცხრე დღეს, კემბრიჯის ჰერცოგინია Alessandra Rich-ის მკაცრი სტილის კაბით გამოჩნდა. ეს მოდელი აშკარად Catherine Walker-ის ცისფერ, თეთრკოპლებიან კაბაზე მიგვანიშნებს, რომლითაც პრინცესა დაიანა 80-იან წლებში საზოგადოების წინაშე არაერთხელ წარდგა.
დაიანაც და ქეითიც ყოველწლიურად მონაწილეობდნენ დაღუპული ბრიტანელი სამხედროების ხსოვნის დღისადმი მიძღვნილ ცერემონიაში. ამ დღეს ხალხში „ყაყაჩოს დღეს“ უწოდებენ. წითელი ყვავილი, როგორც ხსოვნის სიმბოლო, სხვადასხვა თაობის ადამიანების სამოსზე ყოველთვის საპატიო ადგილს იკავებდა. სამგლოვიარო მუქი ფერების მიუხედავად, მონარქთა სამოსი მაინც მრავალფეროვანია, თუმცა 1991 და 2016 წლის ფოტოებს შორის პარალელის გავლება რთული არ არის.
2023 წლის თებერვალში, რაგბის მატჩზე დასასწრებად ქეითმა ისევ დიანას სტილით იხელმძღვანელა. ქეითის პალტო თეთრ-წითელი პალტო, რომელიც Catherine Walker-მა ინდივიდუალური შეკვეთით შექმნა, Moschino-ს ორეულის სილუეტსა და ფერებს იმეორებს, რომელიც მის დედამთილს 1991 წლის ოქტომბერში ეცვა.
სტილის უწყვეტობა კიდევ უფრო თვალსაჩინო გახდება, თუ ფოტოების გადაღების დროსა და ადგილს დავაკვირდებით: 1992 წლის ფოტოზე დაიანა იმ სკოლის კიბეებზე ჩამოდის, სადაც პრინცი ჰარი მიიყვანა, 2019 წლის 5 სექტემბერს კი მსგავს, ყვავილებიან კაბაში გამოწყობილმა ქეითმა სკოლაში პირველად წაიყვანა თავისი ქალიშვილი – პატარა პრინცესა შარლოტა.
Royal Ascot-ის დოღზე, რომელიც სამეფო ოჯახის ორგანიზებით ტარდება, ქეითმა დედამთილს პატივი კოპლებიანი კაბით მიაგო. დაიანას 1988 წლის ფოტო სწორედ ამ ღონისძიებაზეა გადაღებული. კაბის 2022 წლის ვერსიას საყელო დაემატა, თუმცა მაინც ადვილად საცნობი დარჩა.
კიდევ ერთი მშვენიერი მაგალითია ქეითის წითელი, ბრჭყვიალა კაბა, რომელიც მან 2022 წლის შობის აღსანიშნავად ჩაიცვა – ის ლედი დის 1984 წლის სამოსის მსგავსია.
2021 წლის მაისში, შოტლანდიაში ვიზიტისას, ქეითმა დედამთილის ლუქი თითქმის ზუსტად გაიმეორა – მას მკვეთრი ლურჯი პიჯაკი და იმავე ფერის პლისე-ქვედაბოლო (Zara და Hope) ეცვა. ერთადერთი განსხვავება ისაა, რომ 1992 წლის პიჯაკი შედარებით გრძელი იყო.
და ბოლოს, 2011 წლის ღონისძიებაზე ქეითის შავი ხავერდის მდიდრული კაბა 1981 წელს, ლედი დაიანას ლონდონის Goldsmiths’ Hall-ში გამოჩენას მოგვაგონებს. კაბებს არა მხოლოდ უბრეტელო დიზაინი, არამედ დეკოლტეს ნატიფი გაფორმებაც აერთიანებს. სხვათა შორის, ეს 19 წლის დაიანას პირველი საჯარო გამოჩენა იყო უილიამის საცოლის სტატუსით. მან თავად მოინდომა ამ კაბის ჩაცმა და პირველ სკანდალშიც გაეხვა – სამგლოვიარო ფერით სამეფო პროტოკოლი დაარღვია, მანქანიდან გადმოსვლისას კი ფოტოგრაფების წინაშე უნებლიედ, ზედმეტად ღია დეკოლტე გამოაჩინა.
ასევე დაგაინტერესებთ
#OK! ლეგენდარული პრინცესა დიანას საკულტო ფოტოები – ივლისში ის 64 წლის გახდებოდა
