ტანსაცმლის ქართული ბრენდი Kemkhadze რამდენიმე წელია, რაც ბაზარზე გამოჩნდა და მთელი ამ დროის განმავლობაში მუდმივად ცდილობს მომხმარებელს შესთავაზოს მრავალფეროვანი და რაც მთავარია, ხარისხიანი ტანისამოსი. როგორც ბრენდის დამფუძნებელმა, ანი ქემხაძემ ჟურნალ OK!-ისთან საუბრისას აღნიშნა, თავდაპირველად, ეს პროცესი მხოლოდ და მხოლოდ ჰობი იყო, მაგრამ დროთა განმავლობაში გადაწყვიტა სერიოზულად მოეკიდა ხელი ბრენდის ჩამოყალიბებისთვის და შედეგმაც არ დააყოვნა. ამ და სხვა მნიშვნელოვან საკითხებთან დაკავშირებით, ანი თავად უამბობს ჩვენს მკითხველს.
რამდენი ხანია, რაც ბრენდი ბაზარზე გამოჩნდა და როგორ დაიბადა იდეა?
იდეა კონკრეტულ მომენტში არ გაჩენილა, რადგან დედაჩემის ჰობი იყო ტანსაცმლის შეკერვა, გადაკეთება, დიზაინის შექმნა, ამიტომ ბავშვობაშიც ხშირად მეცვა მისი შეკერილი ტანსაცმელი და თამამად შემიძლია ვთქვა, რომ ყოველთვის დიდი მოწონებით სარგებლობდა გარშემომყოფების მხრიდან. ჩემთვისაც ყველაზე სასიამოვნო პროცესი იყო ახალი პროდუქტის მოფიქრება, სხვადასხვა ნივთის გადაკეთება და მათთვის ახალი იერსახის მიცემა. მაგრამ არასოდეს მიფიქრია პროფესიულად დაუფლებაზე და ამ ჰობის განვითარებაზე.
საერთაშორისო ურთიერთობებზე ვსწავლობდი და მას შემდეგ, რაც უნივერსიტეტი დავამთავრე, გამიჩნდა ბევრი თავისუფალი დრო, ამიტომ მე და დედაჩემმა გადავწყვიტეთ შეგვექმნა უბრალოდ საცდელი კოლექცია ქართველი დამწყები დიზაინერების მაღაზიისთვის. სიმართლე გითხრათ, მაშინვე ძალიან დიდი მოწონება დაიმსახურა საზოგადოების მხრიდან ხარისხმაც და დიზაინმაც. შესაბამისად, ძალიან ბევრი შეკვეთა მივიღეთ. გაჩნდა მოთხოვნა მეტი სიახლის შეთავაზებასა და კოლექციის განახლებაზე.
როგორი იყო ბრენდის განვითარების ეტაპები?
2014 წლიდან დავიწყეთ აღნიშნულ მაღაზიასთან თანამშრომლობა და პანდემიამდე სტაბილურად გრძელდებოდა ეს პროცესი, თუმცა ვინაიდან ყველაფერი ონლაინპლატფორმაზე გადავიდა, ამან ბიძგი მისცა Kemkhadze-ის, როგორც ბრენდის, დამოუკიდებლად განვითარებას.
მარტივად გადავეწყვეთ ონლაინრეჟიმში მუშაობაზე და ძალიან სასარგებლო აღმოჩნდა ეს ჩვენი ბრენდის განვითარებისთვის. საზოგადოება მიეჩვია ონლაინშოპებს, რაც მანამდე დიდი პოპულარობით არ სარგებლობდა. Facebook და Instagram-გვერდები 2014 წლიდან მოყოლებული მუდამ გვქონდა, მაგრამ პანდემიის შემდეგ, რაც გამოწერები უფრო მოთხოვნადი გახდა, ჩვენც გავააქტიურეთ საკუთარი სოციალური ქსელები − დავიწყეთ რეკლამირება, კოლექციების განახლება, გადაღებები. მცირე რესურსებით ძალიან დიდ შედეგს მივაღწიეთ.
რა მიგაჩნიათ ბრენდის უპირატესობად?
უპირატესობაა ის, რომ ჩვენთან წარმოდგენილია თავისუფალი მოდელები და ყველა პროპორციის ადამიანს შეუძლია მოირგოს Kemkhadze-ის სამოსი. ჩვენი პროდუქცია გათვლილია თინეიჯერებზეც და შუახნის ქალბატონებისთვისაც. კოლექცია გამოირჩევა მკვეთრი ფერების შეხამებით, სხვადასხვა კონტურული პრინტით, მბზინავი და ხავერდის აპლიკაციებით.
კიდევ ერთი უპირატესობა პროდუქციის ჩაბარების მოკლე ვადებია, რომელიც 2-3 დღეს მოიცავს და მაქსიმალურად ვცდილობთ, ამ დროის განმავლობაში მიიღოს მომხმარებელმა ჩვენთან შეკვეთილი სამოსი.
გვესაუბრეთ ხარისხზე.
ძალიან მნიშვნელოვანია როგორც ქსოვილის ხარისხი, ასევე ის, თუ როგორაა შეკერილი სამოსი. ჩვენ თავდაპირველად ყოველთვის საცდელ ნიმუშებს ვქმნით, რომლებიც გადის ყველა იმ პროცესს, რომელსაც მომხმარებლის ხელში გაივლის. მაგალითად, რეცხვა, გაუთოვება, ხარისხის შენარჩუნება. თითოეული ამ პროცესის გავლის შემდეგ, პროდუქციას გასაყიდად ვუშვებთ. ამ მიდგომით კიდევ უფრო მეტად ვუჩენთ მომხმარებლებს ჩვენი ბრენდის მიმართ ნდობას.
მომხმარებლის აზრსა და რჩევებს ყოველთვის ვითვალისწინებთ, ყველა მათგანს ვეკითხებით, როგორ მოსწონთ მიღებული პროდუქცია და რას შეცვლიდნენ მასში.
სამომავლო გეგმები.
ამ ეტაპზე მოკლევადიანი გეგმები გვაქვს, რაც მოიცავს გაზაფხული/ზაფხულის კოლექციის შექმნას. ასევე, ვგეგმავთ ახალ აქტივობებს მარკეტინგის მიმართულებით, გადაღებებს. გრძელვადიანი მიზანია, ჩვენი მცირე ბიზნესის განვითარება, მომხმარებლის სეგმენტის გაფართოება, მრავალფეროვანი კოლექციის შექმნა. შესაძლოა, დავამატოთ მამაკაცის ხაზი.
FB: Kemkhadze
Instagram: kemkhadzee
Tel: 558 25 35 20
