ანჯელინა ჯოლისა და ბრედ პიტის უფროსმა შვილმა, მადოქსმა, გვარი ოფიციალურად შეიცვალა და ამიერიდან იურიდიულად მადოქს ჩივან ჯოლის სახელით იქნება ცნობილი. ლოს-ანჯელესის სასამართლომ მისი მოთხოვნა 14 სექტემბერს დააკმაყოფილა.
25 წლის მადოქსმა სასამართლოს გვარის შეცვლის მოთხოვნით მაისში მიმართა. შესაბამის დოკუმენტებში გადაწყვეტილების მიზეზად „პირადი“ მიზეზებია მითითებული.
თუმცა „პიტის“ გვარის გამოყენება საჯაროდ უკვე წლის დასაწყისში შეწყვიტა. ანჯელინა ჯოლის ახალ ფილმში „Couture“, რომელზეც ის რეჟისორის ასისტენტად მუშაობდა, ტიტრებში მხოლოდ ჯოლის გვარით არის მითითებული.
მადოქსი ანჯელინა ჯოლისა და ბრედ პიტის ექვსი შვილიდან ყველაზე უფროსია. ჯოლიმ ის 2002 წელს, კამბოჯიდან, იშვილა.
მანამდე, 2024 წელს, მამის გვარზე უარი შაილომაც განაცხადა და გვარიდან „პიტი“ ოფიციალურად ამოიღო. ზაჰარა და ვივიენიც საჯაროდ მხოლოდ დედის გვარს იყენებენ.
რაც შეეხება მადოქსს, მას გვარის შეცვლის კონკრეტული მიზეზი საჯაროდ არ დაუსახელებია. შესაბამისად, მისი გადაწყვეტილების მიზეზებზე დამატებითი ვარაუდების გაკეთება ამ ეტაპზე შეუძლებელია.
ბრედ პიტი და ანჯელინა ჯოლი
პიტსა და ჯოლის ექვსი შვილი ჰყავთ – მედოქსი, პაქსი, ზაჰარა, შაილო და ტყუპები, ნოქსი და ვივიენი. წყვილმა ურთიერთობა 2005 წელს დაიწყო, 2014 წელს დაქორწინდა, ხოლო ჯოლიმ განქორწინებაზე განაცხადი 2016 წელს შეიტანა. ყოფილ მეუღლეებს შორის სამართლებრივი დავები, მათ შორის საფრანგეთში მდებარე Château Miraval-ის საკითხზე, კვლავ გრძელდება.
პიტისა და ჯოლის ურთიერთობის ყველაზე მძიმე ეპიზოდად 2016 წლის სექტემბერში მომხდარი ინციდენტი რჩება.
2016 წლის 14 სექტემბერს, საფრანგეთიდან ლოს-ანჯელესში მიმავალ კერძო თვითმფრინავში, ანჯელინა ჯოლი და ბრედ პიტი ექვს შვილთან ერთად იმყოფებოდნენ. მოგვიანებით ჯოლიმ სასამართლოში წარდგენილ დოკუმენტებში განაცხადა, რომ ფრენის დროს პიტი აგრესიულად იქცეოდა, მას ფიზიკურად შეეხო და ბავშვების მიმართაც ძალადობრივი ქცევა გამოავლინა.
დოკუმენტებში ასევე ეწერა, რომ პიტმა ერთ-ერთ ბავშვს ყელში ხელი წაუჭირა, ხოლო მეორეს სახეში დაარტყა.
მსახიობის წარმომადგენლებმა ბრალდებები უარყვეს და განაცხადეს, რომ ჯოლი წლების წინ მომხდარი ინციდენტის აღწერას ცვლიდა და „არასწორ ინფორმაციას“ ავრცელებდა.
მნიშვნელოვანია ისიც, რომ 2016 წლის ინციდენტი FBI-მ და ლოს-ანჯელესის ბავშვთა და ოჯახის სერვისების დეპარტამენტმა გამოიძიეს. FBI-მ საბოლოოდ განაცხადა, რომ სისხლისსამართლებრივი ბრალდების წარდგენას არ აპირებდა, ხოლო ბავშვთა დაცვის უწყებამ გამოძიება დახურა.
ასევე დაგაინტერესებთ:
#OK! უთანხმოება გრძელდება – ანჯელინა ჯოლისა და ბრედ პიტის კიდევ ერთმა შვილმა გვარი შეიცვალა
