მინდა წარმოგიდგინოთ Gastro Book-ის ერთ-ერთი ყველაზე გამორჩეული რესპონდენტი − შეფი კონსტანტინე თედელური, რომელსაც OK!-ის მკითხველი ჩვენი ჟურნალის გვერდებზე პირველად არ იხილავს. როგორია მისი ხედვა და მოლოდინი სარესტორნო სფეროს განვითარებასთან დაკავშირებით და რა მდგომარეობაა დღეს კულინარიის მიმართულებით საქართველოში? − ამ და სხვა საინტერესო საკითხებთან დაკავშირებით, კონსტანტინე თედელური თავად გვიამბობს.
რა გავლენას მოახდენს დღევანდელი სიტუაცია სარესტორნო სფეროზე, და თქვენი აზრით, როდიდან გამოსწორდება პანდემიით გამოწვეული მდგომარეობა?
ეს ყველაფერი იმაზეა დამოკიდებული, თუ როდის დაიხევს უკან ვირუსი და როდის შემცირდება ინფიცირების შემთხვევები. დღეისათვის ვიცი, რომ მსოფლიო მასშტაბით ვირუსის გავრცელებამ 17%-ით იკლო. ეს კლება, ჯერ მხოლოდ ვიმედოვნებ, რომ დასაწყისია.
ვაქცინებით, რომლებიც ჯერ საკმარისად არც გვაქვს, რეგულაციების გათვალისწინებით, ჩვენი შეგნებითა და შესაძლებლობებით, შევძლებთ მივაღწიოთ ისეთ შედეგებს, რომ ახლო მომავალში შეგვეძლოს ვმართოთ ჩვენი რესტორნები, თუმცა დაკეტვის შემთხვევაში, ბიზნესი კიდევ სამჯერ და ათჯერ უკან დაიხევს, შემდეგ კი შესაძლოა რაღაცებიც გაქრეს. მაგრამ ეს ალბათ ბოლო წერტილია იმ ნეგატივისა, რომელზეც არც მინდა ვიფიქრო.
15 თებერვლიდან რესტორნების ნაწილი გაიხსნა, რომელთაც აქვთ შესაძლებლობა გარე სივრცეებში მოემსახურონ მომხმარებელს, თუმცა, ვინაიდან მე გარე სივრცე რესტორანში არ მაქვს, გახსნას ვერ ვახერხებ. იმედს ვიტოვებ, რომ სექტემბერში ყველაფერი უფრო დალაგებულად იქნება და სრულფასოვნად შევძლებთ მუშაობის გაგრძელებას. მდგომარეობის გამოსწორებაც, ხალხის სამუშაო ადგილზე დაბრუნებასთანაა პროპორციული. ეს წელიც, ასე ვთქვათ, „ფართხალში“ ვიქნებით.
რა მდგომარეობაა დღეს კულინარიის მიმართულებით საქართველოში?
დაახლოებით ხუთი-ექვსი წელია, ეს სფერო განვითარების საკმაოდ კარგ და მყარ საფეხურზეა. პანდემია ამისთვის ხელსაყრელი დრო და გასაღები აღმოჩნდა − გემოები განარჩიეს და შეიგრძნეს, გამოხატეს და გამოფინეს „შედევრებიც“. შესაბამისად, ყველამ ისევ ხელახლა დაიწყო სწავლა, ხელახლა განვითარდა და მიმართულებებიც გაიჩინა.
როგორია „მასტერშეფის“ როლი ქართულ კულინარიაში?
ქართული კულინარია ოჯახებში იქმნებოდა. ვფიქრობ, ძალიან ბევრ ოჯახის დიასახლისს გაუღვიძა შემოქმედებითი გრძნობა კერძებისადმი, შეიცვალა ყოველდღიური მენიუ, შეიცვალა გაფორმება, თამამები გახდნენ დიასახლისები და მზარეულებიც, რომლებიც ჩაკეტილები იყვნენ ჩარჩოებში და ვერც ქვეყნიდან გადიოდნენ და ვერც ახლის შესწავლას ცდილობდნენ, რადგან ეშინოდათ. არადა, მზარეულისთვის მოგზაურობა და სხვა ქვეყნების კულინარიის შეცნობა, ძალიან მნიშვნელოვანია, ჰაერია! ეს ხელს უწყობს ბევრი ახალი გემოს წარმოქმნას და მზარეულს უფრო არტისტის სახეს გძენს. რა თქმა უნდა, ინტერნეტიც გაძლევს ბევრი საკითხის შესწავლის საშუალებას, თუმცა რეალურად, ყველაფრის ხილვა, შეგრძნება და შეცნობა, ბევრად ორგანულია.
ვფიქრობ, ძალიან კარგი, სწორი და ჩამოყალიბებული მესიჯები მიდის ჩვენგან მომხმარებლამდე. მიმაჩნია, რომ გარკვეული პერიოდის შემდეგ, ქართული კულინარია ახალ სიტყვას იტყვის მსოფლიო ბაზარზე.
რომელია თქვენთვის ყველაზე სასიამოვნო ქათინაური?
„ჩემი პირი ზეიმობს…“
ყველაზე მეტად ვისთვის გიყვართ კერძების მომზადება?
აბსოლუტურად ყველა კერძს, რომელსაც ვამზადებ, ვქმნი ჩემთვის და იმ ადამიანებისთვის, ვისაც ეს ესმის.
რომელი კერძი გიყვართ ყველაზე მეტად?
ყველაზე მეტად მიყვარს შემწვარი კარტოფილი. ყველა ინტერვიუში ამას ვამბობ, რომ ყოველდღე შემიძლია მივირთვა შემწვარი კარტოფილი, მივირთვა შემწვარი კარტოფილი და კიდევ შემწვარი კარტოფილი, და არ მომბეზრდეს. სხვა კერძებს, ყოველდღე, ერთსა და იმავეს, ვერ გეახლებით.
