საქართველოს ყოფილი პირველი ლედი მაკა ჩიჩუა გადაცემა “მედგიდის“ სტუმარი იყო, სადაც დაუნის სინდრომზე, მის თავისებურებებსა და პირად გამოცდილებაზე ისაუბრა.
როგორც ამბობს, ორსულობის პერიოდში, ექიმებთან ჩატარებული კვლევებით ყველაფერი ნორმალურად მიმდინარეობდა და ნაყოფის განვითარებასთან დაკავშირებით რაიმე განსაკუთრებული პრობლემა არ გამოვლენილა. თემოს დიაგნოზის შესახებ კი მხოლოდ შვილის დაბადების შემდეგ გაიგო:
დღეს მადლიერი ვარ, რომ ორსულობის პერიოდში არ ვიცოდი თემოს დიაგნოზის შესახებ. რომ მცოდნოდა, ჩემთვის ეს დიდი სტრესი იქნებოდა. ვიცხოვრებდი ფიქრით – რა იქნება, როგორ უნდა ვმართო ეს ყველაფერი, რა პრობლემებს შევეჯახები. საბოლოოდ კი ეს არაფერს შეცვლიდა: თემო მაინც ჩემი შვილი იქნებოდა.
პირველად, როცა თემო დავინახე, რაღაც განსაკუთრებული ვიგრძენი. ძალიან სიმპათიური ბავშვი იყო, თუმცა რამდენიმე ისეთი ნიშანი შევამჩნიე, რომლებიც, როგორც ვიცოდი, დაუნის სინდრომს ახასიათებდა. შემდეგ გენეტიკური კვლევა გერმანიაში გავაგზავნეთ. პასუხმა დაადასტურა, რომ მას დაუნის სინდრომი ჰქონდა.
ამის შემდეგ დაიწყო სრულიად ახალი ეტაპი ჩემს ცხოვრებაში. ვისწავლე, რა არის დაუნის სინდრომი, როგორია შესაბამისი მიდგომები და რამდენად მნიშვნელოვანია ადრეული ჩართულობა. იმ პერიოდში უკვე არსებობდა გარკვეული პროტოკოლები და ადამიანები, რომლებიც ამ ცოდნას საქართველოში ავრცელებდნენ და ქართულ რეალობაში ნერგავდნენ.
მნიშვნელოვანია გვახსოვდეს, რომ დაუნის სინდრომი ყველა ბავშვზე სხვადასხვანაირად აისახება – ეს ძალიან ინდივიდუალურია. ჯანმრთელობის მხრივაც სხვადასხვა პრობლემასთან შეიძლება იყოს დაკავშირებული და, ბუნებრივია, თავიდან ეს ჩემთვის შფოთვის მიზეზი იყო. არ ვიცოდი, თემოს შემთხვევაში როგორ განვითარდებოდა ყველაფერი.
არის მთელი ჩამონათვალი, რასაც უნდა მიაქციო ყურადღება – გული, მხედველობა, სმენა, მენჯ-ბარძაყის მდგომარეობა და კიდევ ბევრი სხვა რამ.
თემოს შემთხვევაში, მადლობა ღმერთს, ჯანმრთელობის მხრივ ძალიან გაგვიმართლა. გულის მხრივ რაღაც პატარა პრობლემა ჰქონდა, რომელიც მალევე აღმოაჩინეს და მოგვარდა” – ამბობს მაკა ჩიჩუა.
დაუნის სინდრომი
საქართველოს დაუნის სინდრომის ასოციაციის განმარტებით, დაუნის სინდრომი ადამიანის გენეტიკური მდგომარეობაა, რომლის დროსაც უჯრედებში 46-ის ნაცვლად 47 ქრომოსომაა. ასოციაცია ხაზს უსვამს, რომ ეს დაავადება არ არის და დაუნის სინდრომის მქონე ადამიანი „ავადმყოფად“ არ უნდა მოვიხსენიოთ.
ასოციაციის ინფორმაციით, მას შესაძლოა სხვადასხვა თანმხლები ჯანმრთელობის მდგომარეობა ახლდეს, მათ შორის გულის, სმენის, მხედველობისა და ძვალ-სახსროვანი სისტემის პრობლემები, თუმცა ეს იმას არ ნიშნავს, რომ ყველა ადამიანს მსგავსი გართულება აუცილებლად ექნება. სწორედ ამიტომ მნიშვნელოვანია შესაბამისი სამედიცინო მეთვალყურეობა და საჭიროების შემთხვევაში პრობლემების დროული გამოვლენა და მართვა.
საქართველოში დაუნის სინდრომის მქონე ადამიანებისა და მათი ოჯახების მხარდაჭერაზე მუშაობს საქართველოს დაუნის სინდრომის ასოციაცია, რომელიც 2017 წელს დაარსდა. ორგანიზაციის მიზანია თანაბარ უფლებებზე დაფუძნებული გარემოს შექმნა, ადამიანების საზოგადოებრივ ცხოვრებაში სრულფასოვანი ჩართულობის ხელშეწყობა და მათი ოჯახების გაძლიერება.
