„The Beatles“-ის ისტორია დიდ ეკრანზე – ამჯერად არა ერთი, არამედ ოთხი ახალი ფილმის სახით. დიდ ბრიტანეთში სემ მენდესის მასშტაბური პროექტის გადაღებები მიმდინარეობს.
პროექტს განსაკუთრებულს არა მხოლოდ მასშტაბი, არამედ ფორმატიც ხდის: ოთხივე ფილმი ერთმანეთთან იქნება დაკავშირებული, თუმცა თითოეული ჯგუფის ერთ-ერთი წევრის – ჯონ ლენონის, პოლ მაკარტნის, ჯორჯ ჰარისონისა და რინგო სტარის – ისტორიას მოგვითხრობს.
მთავარი როლების შემსრულებლები უკვე ცნობილია: ჰარის დიკინსონი (ჯონ ლენონი), პოლ მესკალი (პოლ მაკარტნი), ჯოზეფ ქუინი (ჯორჯ ჰარისონი) და ბარი კიოგანი (რინგო სტარი).
მათ გარდა, ფილმებში მონაწილეობენ სირშა რონანი (ლინდა მაკარტნი), ანა სავაი (იოკო ონო), აიმი-ლუ ვუდი (პეტი ბოიდი) და მია მაკენა-ბრუსი (მორინ სტარკი).
მაყურებელი ასევე იხილავს მორფიდ კლარკს (სინთია ლენონი), ლუსი ბოინტონს (ჯეინ აშერი), ფარჰან ახტარს (რავი შანკარი), ჯეიმს ნორტონს (ბრაიან ეპსტეინი) და ჰარი ლოიდს (ჯორჯ მარტინი).
სიუჟეტი „The Beatles“-ის ისტორიის ყველაზე მნიშვნელოვან პერიოდს – 1960-დან 1970 წლამდე – მოიცავს. მაყურებელი ჯგუფის ჩამოყალიბებას, ადრეულ წლებს, „Beatlemania“-ს პერიოდსა და დაშლამდე განვითარებულ მოვლენებს იხილავს იხილავს.
გადაღებების ნაწილი უკვე ლივერპულსა და ლონდონში მიმდინარეობს – მსახიობები ლონდონის Marylebone Station-ის მიმდებარე ტერიტორიაზეც დააფიქსირეს.
ოთხივე ფილმის რეჟისორი სემ მენდესი იქნება. პროექტის სცენარებზე ჯეკ თორნი, ჯეზ ბატერვორთი და პიტერ სტრაუგანი მუშაობენ, მუსიკალური პროდიუსერი კი ჯაილზ მარტინია.
“The Beatles – A Four-Film Cinematic Event“ კინოთეატრებში 2028 წლის აპრილში გამოვა.
ასევე დაგაინტერესებთ:
#OK! ბრედლი კუპერი და მარგო რობი „Ocean’s Eleven“-ის ახალი ფილმის გადასაღებ მოედანზე გამოჩნდნენ
#OK! დაკოტა ჯონსონი მერილინ მონროს როლში – ფილმი ჰოლივუდის ლეგენდის აქამდე უცნობ მხარეს გვაჩვენებს
