ამას წინათ ჩემი მეგობარი მიყვებოდა, როგორ გაიცნო ციხისძირის პლაჟზე მცხოვრები ახალგაზრდა წყვილი – ორი ადამიანი, ვინც, უბრალოდ, გადაწყვიტა ეცხოვრა. ისინი არ არიან არც მათხოვრები, არც ასოციალურები, ისინი, უბრალოდ, ცხოვრობენ იქ, სადაც მოსწონთ.
ადამიანებს გვირთულდება ვიცხოვროთ ჩვენი ცხოვრება და მუდმივ ბრძოლაში ვართ, მაგრამ რისთვის ვიბრძვით? არაერთი გავლენიანი ადამიანისა და ფილოსოფოსის ფრთიანი ფრაზაა ამ ბრძოლის უაზრობის შესახებ.
ყველაზე რთული, რაც ღმერთმა მოგვცა, ფიქრის უნარია, მარტივ ფიქრებზე არ გესაუბრებით, ნამდვილ ფიქრს ვგულისხმობ. ჰოდა, თუ ფიქრი გეზარება, მიჰყვები სხვის ფიქრებს, სხვის მოსაზრებებსა და ხედვებს და საბოლოოდ აღმოაჩენ, რომ იარაღი ხარ.
არც ერთი რელიგია არ ქადაგებს მკვლელობას, ჩაგვრას გენდერის ან სხვა ნიშნით, არცერთ ბოროტებას. პირიქით, ყველა რელიგია გეუბნება – გიყვარდეს. ათი მცნება სხვა არაფერია, თუ არა ათი ძირითადი ადამიანური თვისების ჩამოწერა – აბა, კარგად დაფიქრდით, გადმოიტანეთ დღევანდელ კონტექსტში.
ერთი, რაც ყველა რელიგიის, რწმენის, კანის ფერისა და სქესის ადამიანმა იცის, უდავოა – ჩვენი ცხოვრება დედამიწაზე შეზღუდული დროითაა, ეს დრო დაბადების წამიდან კლებისკენ მიდის და არავინ იცის, ქვიშის საათის ზედა განყოფილებაში რამდენი მარცვალი ქვიშა დარჩა. მაშინ რაში ვფლანგავთ ამ შეზღუდულ რესურსს? სიძულვილში? ომში? მკვლელობაში?
ნოემბრის ბოლოს ქალთა მიმართ ძალადობის წინააღმდეგ ბრძოლის დღეებია. გოგოებო, ქალებო – მაშინაც კი, როცა გგონიათ, ვეღარ დააღწევთ თავს ძალადობას, იცოდეთ, რომ სხვა ქალები და ადამიანები დაგეხმარებიან, აუცილებლად დაგეხმარებიან. ამის შესახებ ჩვენს ჟურნალში მოგიყვებით – გიამბობთ თავშესაფრებზე, 112-ის აპლიკაციაზე და გეტყვით – თქვენი სიცოცხლე თქვენია. არცერთ წამს არ შეწყვიტოთ ფიქრი და არ დაუშვათ, გახდეთ იარაღი სხვის ხელში.
და, უბრალოდ, Live your Life
სიყვარულით,
მაიკო წერეთელი
ჟურნალ OK!-ის მთავარი რედაქტორი
