გამოგიტყდებით, ჩემთვის ახალი წელი მარტში იწყება.
ჰაერს სხვა სურნელი აქვს, გულს – სხვა მოლოდინი, დღეები იზრდება და მზე ძლიერდება.
ალბათ ბევრი ადამიანია ჩემსავით და ალბათ სწორედ ამიტომ გახდა მარტი ქალების თემებით ასე დატვირთული.
ქალი ძლიერია – ეს უკვე დავამტკიცეთ. ჩვენ შეგვიძლია ყველაფერი, კლდესავით ვდგავართ, ვიტანთ, ვაკეთებთ, ვაგრძელებთ. მაგრამ ამ ძალასთან ერთად გვაქვს სისუსტეებიც – გვჭირდება სითბო, ზრუნვა, ხანდახან ვტირით. გვინდა, რომ ის, რასაც ვაკეთებთ, ორმხრივი იყოს. გვინდა, რომ როცა სამსახურიდან დაღლილები სახლში ვბრუნდებით, სიმშვიდე და მყუდროება ვიპოვოთ.
ჩვენგან ითხოვენ სილამაზეს, სითბოს, კარგ დედობას, კარგ თანამშრომლობას, კარგ ცოლობას, კარგ „გოგოობას“.
ვცდილობთ – ხშირად ყველაფრის ფასად.
და როცა რაღაც არ გამოგვდის, ან ძალა გვეცლება, მხარდაჭერის ნაცვლად საყვედურს ვიღებთ. „კარგი გოგოს“ კომპლექსი ქალების დიდ ნაწილს უკანასკნელ ძალებს ართმევს და ნელ-ნელა საკუთარ თავსაც აკარგვინებს.
რატომ ვლაპარაკობთ ამდენს ქალთა უფლებებზე? არა იმიტომ, რომ ქალები სუსტები არიან; არა იმიტომ, რომ მუდმივი მოტივაცია სჭირდებათ; და არც იმიტომ, რომ ვინმეს კიდევ ერთხელ უნდა შევახსენოთ, როგორი „მაგრები“ არიან ქალები – ეს დიდი ხანია ყველამ იცის. რეალურად, ქალის წარმატება ჯერ კიდევ გამონაკლისად აღიქმება, კაცის კი – ნორმად. დღეს ქალს ისევ ეკითხებიან, როგორ ათავსებს კარიერას და ოჯახს, კაცს კი – არა.
ქალების ამბავი საქართველოში კოლხი მედეადან იწყება – არჩევანის უფლებით, გრძელდება თამარ მეფით – ძალაუფლების პასუხისმგებლობით, პირველი რესპუბლიკით – ხმის უფლებით, და მოდის დღემდე – სადაც ქალებს ზურგით მოაქვთ ოჯახების ყოველდღიური სიმძიმე.
დღეს ქალებს აღარ სჭირდებათ დამტკიცება, რომ „შეუძლიათ“. ეს ეტაპი უკვე გავლილია.
და ყოველ მარტში უამრავი ყვავილი იყიდება – დედებისთვის, ცოლებისთვის, შეყვარებულებისთვის, დებისთვის.
მაგრამ გაცილებით იშვიათად ფიქრობენ იმაზე, რომ დაღლილ ქალს დასვენების შესაძლებლობა მისცენ, პასუხისმგებლობა გაინაწილონ, ყოველდღიური რუტინა შეუმსუბუქონ.
ქალების უფლებებზე მხოლოდ მარტში საუბარი ისეთ შთაბეჭდილებას ტოვებს, თითქოს კალენდარმა მოგვცა უფლება – ერთი თვე მაინც არ მოვერიდოთ სიმართლის თქმას.
სიყვარულით,
მაიკო წერეთელი
ჟურნალ OK!-ს მთავარი რედაქტორი
