ჯენიფერ ლოპესი პარიზის მოდის კვირეულზე, Stella McCartney-ის ჩვენების დროს, ყურადღების ცენტრში აღმოჩნდა – ამჯერად არა ჩაცმულობის, არამედ ქოლგის გამო. წვიმიან ამინდში გამართულ ღონისძიებაზე მომღერალს დაცვის წევრი დიდი ქოლგით იცავდა, თუმცა მალევე ორგანიზატორებმა მისი ჩამორთმევა მოითხოვეს.
ჩვენება 30 სექტემბერს, ბრიტანეთის საელჩოს ტერიტორიაზე, ღია ცის ქვეშ გაიმართა. წვიმის მიუხედავად, ღონისძიებას არაერთი ცნობილი სახე დაესწრო.
როგორც გაირკვა, მომღერლის უკან მსხდომ სტუმრებს დიდი ქოლგა პოდიუმის ხედვას უზღუდავდა. ერთ-ერთმა მათგანმა მას ქოლგის დაწევაც სთხოვა, თუმცა ლოპესმა თხოვნა არ გაითვალისწინა. ცოტა ხანში მასთან ღონისძიების თანამშრომლები მივიდნენ და ნივთის ჩაბარება მოსთხოვეს.
შემთხვევას თვითმხილველი და მოდის ინფლუენსერი სებასტიან ამუნდსენი გამოეხმაურა. მისი თქმით, ლოპესი შექმნილმა ვითარებამ გააღიზიანა, განსაკუთრებით მას შემდეგ, რაც დაცვის წევრს მის გვერდით დარჩენის შესაძლებლობაც აღარ ჰქონდა.
მიუხედავად ამ მცირე ინციდენტისა, მომღერალმა ყურადღება თავისი სტილითაც მიიქცია. ლოპესმა Stella McCartney-ის ჩვენებისთვის ყავისფერი, მონოქრომული ლუქი შეარჩია, რომელსაც ხელოვნური ბეწვის დეტალები და შესაბამისი აქსესუარები შეუხამა.
ქოლგასთან დაკავშირებულ შემთხვევამდე რამდენიმე დღით ადრე ლოპესს პარიზში ფოტოგრაფებთანაც ჰქონდა დაძაბული მომენტი. გავრცელებულ კადრებში ის პაპარაცებს მოუწოდებდა, „გიჟური საქციელი“ შეეწყვიტათ. თავად მომღერალს ბოლო ინციდენტზე კომენტარი ჯერჯერობით არ გაუკეთებია.
ასევე დაგაინტერესებთ:
#OK! „ორი თვეა ვტირი“ – ემოციური ჯენიფერ ლოპესი შვილის გამოსაშვებ ცერემონიაზე
