ჰიუ გრანტის სახელი ბევრისთვის პირველ რიგში ჩარლზთან, უილიამ თეკერთან ან ბრიტანეთის პრემიერ-მინისტრთან ასოცირდება, თუმცა მისი შემოქმედება გაცილებით მრავალფეროვანია. კარიერის განმავლობაში მსახიობმა არაერთი ერთმანეთისგან რადიკალურად განსხვავებული პერსონაჟი შექმნა – შეყვარებული და დაბნეული ბრიტანელი მამაკაცებიდან დაწყებული, ეგოისტი მექალთანითა და ცინიკური კრიმინალით დამთავრებული.
კინოში მისი დებიუტი 1982 წელს ფილმით „Privileged“ შედგა, თუმცა საერთაშორისო აღიარებამდე რამდენიმე წელი დასჭირდა. მნიშვნელოვანი გარდატეხა მის კარიერაში 1987 წლის „Maurice“ გახდა – ჯეიმს აივორის ფილმში შესრულებული როლისთვის გრანტმა ვენეციის კინოფესტივალზე საუკეთესო მსახიობის ჯილდო, Volpi Cup, მიიღო.
Four Weddings and a Funeral
1994 წლის „Four Weddings and a Funeral“ ჰიუ გრანტის კარიერაში გარდამტეხი აღმოჩნდა. ჩარლზის – მორიდებული, მოუხერხებელი და დაბნეული ბრიტანელი მამაკაცის როლმა მსახიობს საერთაშორისო აღიარება მოუტანა და 1990-იანი წლების რომანტიკული კომედიების ერთ-ერთ მთავარ სახედ აქცია.
ფილმისთვის გრანტმა ოქროს გლობუსი და BAFTA მიიღო. მისი პერსონაჟი მაყურებელმა სწორედ იმ ბუნებრივი იუმორითა და უხერხული მომხიბვლელობით შეიყვარა, რომელიც მოგვიანებით მსახიობის ეკრანულ იმიჯად იქცა.
Notting Hill
1999 წელს ჰიუ გრანტმა უილიამ თეკერის როლი შეასრულა – ლონდონის ნოტინგ ჰილის უბანში მცხოვრები წიგნის მაღაზიის მფლობელის, რომლის მშვიდი და ჩვეულებრივი ცხოვრება ცნობილი ამერიკელი მსახიობის, ანა სკოტის გამოჩენის შემდეგ იცვლება.
ფილმმა მსახიობის რომანტიკული გმირის იმიჯი კიდევ უფრო გაამყარა, ხოლო უილიამ თეკერის პერსონაჟი მისი კარიერის ერთ-ერთ ყველაზე ცნობილ როლად იქცა.
Bridget Jones’s Diary
2001 წელს ჰიუ გრანტმა „Bridget Jones’s Diary“-ში, დენიელ კლივერის როლში გამოჩნდა – პერსონაჟი, რომელმაც მსახიობის რომანტიკული გმირის იმიჯი მნიშვნელოვნად შეცვალა. კლივერი თავდაჯერებული და მომხიბვლელი მამაკაცია, თუმცა მისი შარმის მიღმა ეგოიზმი და უპასუხისმგებლობა იმალება.
About a Boy
2002 წლის „About a Boy“ გრანტის კარიერაში ერთ-ერთი ყველაზე მნიშვნელოვანი ფილმია. ის უილ ფრიმენს, ეგოცენტრულ მამაკაცს განასახიერებს, რომლის ცხოვრებაც ახალგაზრდა ბიჭთან მოულოდნელი მეგობრობის შემდეგ იცვლება.
უილ ფრიმენის როლმა მსახიობს ოქროს გლობუსისა და BAFTA-ს ნომინაციები მოუტანა, ხოლო „About a Boy“ დღემდე მის ერთ-ერთ გამორჩეულ სამსახიობო ნამუშევრად მიიჩნევა.
Love Actually
ფილმში გრანტი ბრიტანეთის პრემიერ-მინისტრს განასახიერებს – ერთი შეხედვით თავდაჯერებულ და გავლენიან ლიდერს, რომელიც ქვეყნის მართვასთან ერთად მოულოდნელად პირადი გრძნობების წინაშე აღმოჩნდება.
გრანტის პერსონაჟის თავისუფალი და იუმორით სავსე ცეკვა „Love Actually“-ს საკულტო მომენტად იქცა და მსახიობის ეკრანულ იმიჯს კიდევ ერთი, განსაკუთრებით სახალისო შტრიხი შემატა.
Heretic
2024 წლის ფსიქოლოგიურ საშინელებათა ფილმში „Heretic“ ჰიუ გრანტმა მაყურებელს საკუთარი სამსახიობო შესაძლებლობების სრულიად ახალი მხარე აჩვენა. ფილმში ის მისტერ რიდს განასახიერებს – გარეგნულად თავაზიან, თუმცა იდუმალ მამაკაცს, რომლის სახლში ორი ახალგაზრდა მისიონერი აღმოჩნდება. მათი შეხვედრა მალე ფსიქოლოგიურ თამაშად იქცევა, სადაც რელიგიის, რწმენისა და თავისუფალი ნების შესახებ საუბარი სულ უფრო დაძაბულ და სახიფათო გარემოს ქმნის.
მისტერ რიდის როლმა გრანტს საშუალება მისცა, საბოლოოდ დაენგრია რომანტიკული კომედიების საყვარელი გმირის იმიჯი. მისმა შესრულებამ კრიტიკოსების მაღალი შეფასება დაიმსახურა და მსახიობს BAFTA-ს ნომინაცია მოუტანა.
ასევე დაგაინტერესებთ:
#OK! 90-იანებისა და 2000-იანების რომანტიკული კომედიები, რომლებიც ერთხელ მაინც უნდა ნახოთ
