რომანტიკული კომედიების ოქროს ეპოქად ხშირად 1990-იანი და 2000-იანი წლები მიიჩნევა. მიუხედავად იმისა, რომ ამ ჟანრში დღესაც არაერთი ახალი ფილმი იქმნება, მაყურებელი ისევ იმ ისტორიებს უბრუნდება, რომლებმაც წლების წინ სიყვარული, იუმორი და დაუვიწყარი პერსონაჟები იდეალურად გააერთიანა. თუ ფილმების სია გჭირდებათ, რომლებიც დროს უძლებს და ყოველ ჯერზე ისეთივე სასიამოვნო საყურებელია, როგორც პირველი ნახვისას, წარმოგიდგენთ რომანტიკული კომედიების კლასიკად ქცეულ ნამუშევრებს.
When Harry Met Sally (1989)
ნორა ეფრონის სცენარით შექმნილი ფილმი ჟანრის ერთ-ერთ ყველაზე მნიშვნელოვან ნამუშევრად ითვლება. ბილი კრისტალი და მეგ რაიანი ჰარისა და სალის როლებს ასრულებენ – ორი ადამიანის, რომლებიც წლების განმავლობაში ცდილობენ გაარკვიონ, შესაძლებელია თუ არა ქალსა და მამაკაცს მხოლოდ მეგობრობა აკავშირებდეთ. მათი ურთიერთობა დროთა განმავლობაში იცვლება და საბოლოოდ ერთ-ერთ ყველაზე დასამახსოვრებელ სიყვარულის ისტორიად იქცევა.
Roman Holiday (1953)
ოდრი ჰეპბერნის ოსკაროსანი შესრულება ამ კლასიკურ ფილმს დღემდე განსაკუთრებულ ადგილს ანიჭებს. ახალგაზრდა პრინცესა, რომელიც სამეფო მოვალეობებით დაიღალა, რომში შეფარულად ატარებს ერთ დღეს და იქ ამერიკელ ჟურნალისტს (გრეგორი პეკი) ხვდება. რომანტიკა, იტალიური ატმოსფერო და დაუვიწყარი ფინალი „რომაულ არდადეგებს“ ყველა დროის ერთ-ერთ საუკეთესო სიყვარულის ისტორიად აქცევს.
Pretty Woman (1990)
ძნელია რომანტიკულ კომედიებზე საუბარი „ლამაზმანის“ გარეშე. ჯულია რობერტსისა და რიჩარდ გირის დაუვიწყარი დუეტი მოგვითხრობს წარმატებული ბიზნესმენისა და ახალგაზრდა ქალის მოულოდნელ სიყვარულზე. ფილმი დღემდე ჟანრის სიმბოლოდ ითვლება.
Mamma Mia! (2008)
საბერძნეთის ულამაზეს კუნძულზე განვითარებული ისტორია, ABBA-ს სიმღერები და ვარსკვლავური სამსახიობო შემადგენლობა – მერილ სტრიპი, ამანდა სეიფრიდი, პირს ბროსნანი, კოლინ ფერთი და სტელან სკარსგორდი – „Mamma Mia!“-ს ნამდვილ განწყობის ამაღლებელ ფილმად აქცევს. სოფი ქორწილის წინ ცდილობს გაიგოს, ვინ არის მისი მამა და ამ მიზნით დედის სამი ყოფილი პარტნიორი ფარულად იწვევს.
The Holiday (2006)
კამერონ დიასი და ქეით უინსლეტი ორ ქალს განასახიერებენ, რომლებიც პირადი იმედგაცრუებების შემდეგ შობას ერთმანეთის სახლებს უცვლიან. ინგლისსა და კალიფორნიას შორის დაწყებული თავგადასავალი ორივეს ცხოვრებას სრულიად ცვლის, ხოლო ჯუდ ლოუსა და ჯეკ ბლეკის პერსონაჟები ამ ისტორიას განსაკუთრებულ ხიბლს მატებენ.
Crazy, Stupid, Love (2011)
სტივ კარელი, რაიან გოსლინგი, ჯულიან მური და ემა სტოუნი ერთ-ერთი ყველაზე წარმატებული თანამედროვე რომკომის მსახიობები არიან. მას შემდეგ, რაც ცოლი განქორწინებას სთხოვს, მთავარი გმირი სიყვარულისა და ურთიერთობების სამყაროში თავიდან ერკვევა, თუმცა მოვლენები სრულიად მოულოდნელ მიმართულებას იღებს.
My Best Friend’s Wedding (1997)
ჯულია რობერტსი ქალს განასახიერებს, რომელიც ხვდება, რომ საუკეთესო მეგობარი მხოლოდ მაშინ შეუყვარდა, როდესაც მისი ქორწილის შესახებ შეიტყო. დარჩენილი რამდენიმე დღის განმავლობაში ის ყველაფერს აკეთებს ქორწილის ჩასაშლელად, რაც უამრავ სახალისო და ემოციურ მომენტს ქმნის.
Clueless (1995)
ჯეინ ოსტინის „ემა“ 90-იანი წლების ბევერლი ჰილზში გადმოტანილი ვერსია დღემდე ახალგაზრდული კომედიის კლასიკად ითვლება. ალისია სილვერსტოუნის შესრულებული შერი ცდილობს ყველას ცხოვრება უკეთესი გახადოს, თუმცა საბოლოოდ საკუთარ თავზე ბევრ ახალ რამეს აღმოაჩენს.
27 Dresses (2008)
ქეთრინ ჰეიგლის პერსონაჟი უკვე 27-ჯერ იყო მეჯვარე, თუმცა თავად პატარძლობა ჯერ ვერ მოასწრო. ყველაფერი მაშინ იცვლება, როდესაც მისი და იმ კაცზე დაინიშნება, რომელიც თავადაც უყვარს. ფილმი მსუბუქი იუმორითა და თბილი ისტორიით გამოირჩევა.
You’ve Got Mail (1998)
ტომ ჰენქსისა და მეგ რაიანის კიდევ ერთი დაუვიწყარი დუეტი. ორი კონკურენტი წიგნის მაღაზიის მფლობელი ინტერნეტში ანონიმურად ერთმანეთზე შეყვარებულები ხდებიან, რეალურ ცხოვრებაში კი დაპირისპირებას აგრძელებენ. ეს ფილმი ინტერნეტის ეპოქის ერთ-ერთ ყველაზე საყვარელ სიყვარულის ისტორიად რჩება.
How to Lose a Guy in 10 Days (2003)
ქეით ჰადსონისა და მეთიუ მაკკონაჰის ქიმია დღემდე ერთ-ერთ საუკეთესოდ ითვლება. ჟურნალისტი ენდი სტატიას წერს იმის შესახებ, როგორ უნდა დააფრთხო მამაკაცი 10 დღეში, ხოლო ბენი ფსონს დებს, რომ იმავე დროში ნებისმიერ ქალს შეაყვარებს თავს. მათი საიდუმლო გეგმები უამრავ კომიკურ სიტუაციას ქმნის.
Failure to Launch (2006)
35 წლის ტრიპი მშობლებთან ცხოვრობს და დამოუკიდებლად გადასვლას არ ჩქარობს. მისი მშობლები პროფესიონალს ქირაობენ, რომელიც თითქოს უნდა შეუყვარდეს და სახლიდან გასვლა გადააწყვეტინოს, თუმცა გეგმა მოულოდნელად ნამდვილ სიყვარულში გადაიზრდება.
10 Things I Hate About You (1999)
შექსპირის „ჭირვეულის მორჯულების“ თანამედროვე ინტერპრეტაცია ჰით ლეჯერისა და ჯულია სტაილზის მონაწილეობით დღემდე ერთ-ერთი ყველაზე საყვარელი თინეიჯერული რომკომია. ფილმი ცნობილია დაუვიწყარი მუსიკალური სცენითა და მახვილგონივრული დიალოგებით.
13 Going on 30 (2004)
13 წლის ჯენა ერთ დილას 30 წლის წარმატებული ქალის სხეულში იღვიძებს. ჯენიფერ გარნერისა და მარკ რუფალოს თბილი ისტორია გვახსენებს, რომ წარმატებაზე მნიშვნელოვანი ხშირად ის ადამიანები არიან, რომლებიც გვერდით გვყავს.
Bridget Jones’s Diary (2001)
რენე ზელვეგერის ბრიჯიტ ჯონსი თანამედროვე ქალის ერთ-ერთი ყველაზე რეალისტური და საყვარელი პერსონაჟია. ახალი წლის გადაწყვეტილებების შემდეგ ის საკუთარი ცხოვრების შეცვლას ცდილობს და ორ სრულიად განსხვავებულ მამაკაცს შორის რთული არჩევანის წინაშე დგება.
She’s the Man (2006)
ამანდა ბაინსი ბიჭის როლში ერთ-ერთ ყველაზე სახალისო რომანტიკულ კომედიას ქმნის. გოგონა, რომელსაც ფეხბურთის თამაში სურს, საკუთარი ტყუპისცალის სახელს იყენებს და ბიჭების სკოლაში სწავლას იწყებს, თუმცა ყველაფერი რთულდება, როდესაც თანაგუნდელი შეუყვარდება.
რომანტიკული კომედიები ათწლეულების განმავლობაში იცვლებოდა, თუმცა მათი მთავარი ხიბლი უცვლელი დარჩა – ისინი გვაცინებენ, გვაღელვებენ და გვახსენებენ, რომ სიყვარული ხშირად ყველაზე მოულოდნელ დროსა და ადგილას ჩნდება. სწორედ ამიტომ, ეს ფილმები დღემდე მილიონობით მაყურებლის საყვარელ არჩევანად რჩება და ყოველ ახალ ნახვაზეც იმავე ემოციებს იწვევს.
