ჰოლი ბერის ყოფილი ქმარი, ოლივიე მარტინესი, ფიზიკურ ძალადობაში ადანაშაულებს. მისი მტკიცებით, ბერიმ მათი 12 წლის ვაჟის, მასეოს, დახრჩობა სცადა.
მარტინესის ბრალდების საფუძველზე, სასამართლომ ხუთშაბათს შემაკავებელი ორდერი გასცა. გადაწყვეტილების შედეგად, ბერისა და მარტინესის აქამდე არსებული 50/50 მეურვეობის რეჟიმი შეიცვალა. მსახიობს შვილის ნახვა სასამართლოს მიერ განსაზღვრულ დროს შეეძლება – კვირაში ორი დღე და ყოველ მეორე შაბათ-კვირას.
მარტინესის თქმით, ინციდენტი 26 სექტემბერს მოხდა. სასამართლოში შეტანილ დოკუმენტებში ის ამტკიცებს, რომ ბერი მასეოს ფიზიკურად დაესხა თავს და მისი დახრჩობა სცადა.
კამათი კი მას შემდეგ დაიწყო, რაც მსახიობმა შვილს სიტყვიერი შეურაცხყოფა მიაყენა და უთხრა, რომ ვირტუალური რეალობის სათვალით თამაშისას „სულელურად“ გამოიყურებოდა და „ნამდვილი იდიოტი“ იყო.
მარტინესის მტკიცებით, სიტყვიერი კამათი მალევე ფიზიკურ დაპირისპირებაში გადაიზარდა – ბერიმ შვილს კისერზე ხელი მოუჭირა და ეკითხებოდა: „ვინ არის ახლა დომინანტი?“
ინციდენტის შემდეგ შეშინებულმა მასეომ მამას დაურეკა და სთხოვა, მის წასაყვანად მისულიყო. სასამართლო დოკუმენტებში მათი მიმოწერაცაა წარმოდგენილი.
მარტინესი ასევე ამტკიცებს, რომ მსგავსი შემთხვევა პირველად არ მომხდარა. მისი თქმით, ბოლო წელიწად-ნახევრის განმავლობაში ბერი შვილზე ფიზიკურად ხშირად ძალადობდა.
მსახიობი ბრალდებებს კატეგორიულად უარყოფს. ადვოკატის, მარინა ბეკის განცხადებით, მარტინესის მიერ სასამართლოში შეტანილი სარჩელი „სრულიად უსაფუძვლოა“.
ჰოლი ბერი და ოლივიე მარტინესი 2013 წელს დაქორწინდნენ, თუმცა მათი ოჯახი 2 წლის შემდეგ დაინგრა. განქორწინების პროცესი საბოლოოდ 2023 წელს დასრულდა და სასამართლომ მარტინესს შვილისთვის ყოველთვიურად 8 000 დოლარის ალიმენტის გადახდა დააკისრა.
ასევე დაგაინტერესებთ:
#OK! მსხვერპლები თუ თაღლითები? – 5 და-ძმა მაიკლ ჯექსონს სექსუალურ ძალადობაში ადანაშაულებს
