ქართველი მომღერალი ნათია თოდუა გერმანიის ერთ-ერთი გამორჩეული მუსიკალური ფესტივალის – Jazztage Dresden 2026-ის სახეა. ფესტივალის ორგანიზატორებმა წლევანდელი პროგრამის პრეზენტაციაზე ნათია ოფიციალურად წარადგინეს, როგორც 2026 წლის მთავარი სახე.
Jazztage Dresden-ის ისტორია 2001 წელს დაიწყო – თავდაპირველად პატარა ფესტივალი წლების განმავლობაში საერთაშორისო მუსიკალურ მოვლენად ჩამოყალიბდა და დღეს მსოფლიოს სხვადასხვა ქვეყნიდან მუსიკოსებსა და შემსრულებლებს აერთიანებს. ყოველწლიურად ფესტივალს ერთი გამორჩეული არტისტი ჰყავს, რომელიც ღონისძიების მთავარი სახე ხდება. 2026 წელს ეს სტატუსი სწორედ ნათია თოდუამ მიიღო.
Jazztage Dresden 2026 2 ოქტომბრიდან 29 ნოემბრის ჩათვლით გაიმართება და მისი პროგრამა მხოლოდ ჯაზით არ შემოიფარგლება – ფესტივალზე სოულის, ბლუზის, ფანკის, სვინგის, ვორლდ-მუსიკის, პოპისა და კლასიკური მუსიკის მიმართულებები იქნება წარმოდგენილი.
ერთ-ერთი გამორჩეული საღამო სწორედ ნათია თოდუას კონცერტი იქნება. 11 ოქტომბერს, დრეზდენში, H42-ის სცენაზე, ქართველი მომღერალი საკუთარ პროგრამას – „From Georgia with Soul“ – წარადგენს.
როგორც თავად ნათია წერს, მისთვის ეს ამბავი განსაკუთრებული ემოციის მიზეზია:
„ვერ ვიჯერებ… მე ამირჩიეს Jazztage Dresden 2026-ის სახედ! ფესტივალი, რომელიც 400-ზე მეტ არტისტს 25 ქვეყნიდან, 68 კონცერტსა და 59 საფესტივალო დღეს აერთიანებს. და ამ ყველაფრის მთავარ აფიშაზე „გოგონა საქართველოდან – ნათია თოდუაა.” 11 ოქტომბერს სცენაზე წარვადგენ ჩემს პროგრამას „From Georgia with Soul“.
„საქართველოდან მუსიკით და დიდი სიყვარულით“, – წერს მომღერალი სოციალურ ქსელში.
Jazztage Dresden-ის ორგანიზატორების შეფასებით, ნათიას კონცერტი მის მუსიკალურ გზას, ქართულ ფესვებსა და საერთაშორისო გამოცდილებას გააერთიანებს. პროგრამის სახელწოდება – „From Georgia with Soul“ – სწორედ ამ კავშირის გამოხატულებაა.
ასევე დაგაინტერესებთ:
