“TRY HARD FISH“ – გიგი ადამაშვილის სადებიუტო ალბომი: “ჩემთვის, როგორც მუსიკოსისთვის, ეს ნამდვილი დაბადებაა“

მომღერალმა გიგი ადამაშვილმა სადებიუტო ალბომი “TRY HARD FISH“ გამოუშვა. მუსიკოსისთვის ეს პროექტი ბოლო წლების პირად და შემოქმედებით გამოცდილებას აერთიანებს და იმ გზაზე მოგვითხრობს, რომელიც საკუთარი თავის ძიებას, მიზნისკენ სწრაფვასა და დაბრკოლებების მიუხედავად წინსვლას უკავშირდება.

როგორც გიგი ამბობს, ალბომის შექმნის იდეა იმ მუსიკამ და სათქმელმა განაპირობა, რომელიც წლების განმავლობაში დაუგროვდა. თითოეული სიმღერა კონკრეტულ განცდასა და გამოცდილებას უკავშირდება, ამიტომ „TRY HARD FISH“ მისთვის პირადი ისტორიის ერთგვარი გაგრძელებაა.

ალბომი, რომელიც ესტონეთში შეიქმნა

გიგი ადამაშვილის მუსიკალურ ხედვაზე მნიშვნელოვანი გავლენა ევროპაში გატარებულმა პერიოდმა იქონია. ის ესტონეთში ერასმუსის გაცვლითი პროგრამით, საშემსრულებლო მიმართულების, კერძოდ კი ჯაზ-ვოკალის სტუდენტის სტატუსით, გაემგზავრა.

უცხო ქვეყანაში ყოფნა მხოლოდ მუსიკალური გამოცდილება არ ყოფილა. იქ სრულიად ახალ გარემოში აღმოჩნდა – არავის იცნობდა და არც მას იცნობდნენ. მარტო ცხოვრობდა, სწავლობდა და პარალელურად საკუთარ ალბომზე მუშაობდა.

„TRY HARD FISH“ -ის შექმნის ისტორია კი საკმაოდ მოულოდნელად დაიწყო. ესტონეთში სწავლის პერიოდში გიგის პირველი ლექცია „ბიგ ბენდთან“ ჰქონდა, სადაც მომავალ დრამერს, უკუ კუბარს, შეხვდა, საკუთარი მუსიკალური მიზნების შესახებ მოუყვა და დემო ჩანაწერებიც მოასმენინა. კუბარი მისი იდეით დაინტერესდა და სტუდიაში მუშაობა შესთავაზა.

ასე დაიწყო ალბომის ჩაწერის პროცესი, რომელშიც ესტონელი და ლატვიელი მუსიკოსები მონაწილეობდნენ. რამდენიმე სიმღერაზე გიგის ქართველი მეგობრებიც მუშაობდნენ. ალბომი კი დაახლოებით ექვს თვეში დასრულდა.

ნამუშევრის მთავარი სიახლე ნამდვილი ისტორიებია – თითოეული სიმღერა მომღერლის მიერ განცდილ კონკრეტულ გამოცდილებასა და ემოციას ეფუძნება.

“ჩემთვის, როგორც მუსიკოსისთვის, ეს ნამდვილი დაბადებაა“

“TRY HARD FISH“ გიგი ადამაშვილის დაბადების დღეს, 23 სექტემბერს, გამოვიდა. როგორც თავად აღნიშნავს, ეს მისთვის, როგორც არტისტისთვის, ერთგვარი ახალი დასაწყისია.

“ჩემთვის როგორც მუსიკოსისთვის ესაა ნამდვილი დაბადება. მსმენელისგან განსაკუთრებულს არაფერს ველოდები, მადლიერი ვიქნები თითოეული მოსმენისთვის, უბრალოდ მინდა, მათ იპოვონ ისტორიები, რომლებსაც საკუთარ თავს დაუკავშირებენ“ – ამბობს მომღერალი OK! Magazine-სთან საუბრისას.

რაც შეეხება სამომავლო გეგმებს, ალბომის გამოსვლის შემდეგ ყურადღება ლაივ შესრულებებს დაეთმობა. მომღერალი  საქართველოში კონცერტების გამართვას და პარალელურად ევროპულ პლატფორმებზე საკუთარი მუსიკის წარდგენასაც აპირებს.

ტექსტი: ანი შავიშვილი