უნგრელ მოდელ ბარბარა პალვინსა და მსახიობ დილან სპრაუსს პირველი შვილი შეეძინათ. წყვილმა სასიხარულო ამბავი სოციალურ ქსელში 28 სექტემბერს გააზიარა. ბავშვს სილვია დაარქვეს.
ბარბარას ორსულობის შესახებ 2026 წლის მაისში, კანის კინოფესტივალზე გახდა ცნობილი. მოდელი წითელ ხალიჩაზე დილანთან ერთად გამოჩნდა და უკვე შესამჩნევი მუცლით იპოზიორა. მოგვიანებით დილანმა საკუთარ პოდკასტში დაადასტურა, რომ ისინი გოგოს ელოდებოდნენ. მსახიობი ამბობდა, რომ „გოგოს მამობა“ განსაკუთრებულად ახარებდა.
ბარბარა პალვინისა და დილან სპრაუსის ურთიერთობა 2017 წელს დაიწყო და საკმაოდ ნელა განვითარდა: ერთმანეთი ლოს-ანჯელესში გამართულ წვეულებაზე გაიცნეს. შეხვედრის შემდეგ ბარბარამ დილანი Instagram-ზე დაამატა. მსახიობმა ეს შანსი გამოიყენა და მოდელს პირადი შეტყობინება გაუგზავნა, საკუთარი ნომერიც დაუტოვა და შეხვედრა შესთავაზა, თუმცა პასუხი 6 თვის შემდეგ მიიღო.
იმ დროისთვის დილანი ჩინეთში იმყოფებოდა, სადაც ფილმზე მუშაობდა. ბარბარასაც ჩინეთში საქმიანი ვიზიტი ჰქონდა დაგეგმილი, თუმცა მისი პროექტი გაუქმდა. მიუხედავად ამისა, მოდელმა მოგზაურობა მაინც გადაწყვიტა და დილანს შეხვდა. სწორედ ამ შეხვედრის შემდეგ დაიწყო მათი რომანტიკული ურთიერთობა.
„ვკითხე, ხომ არ იყო სიგიჟე მხოლოდ მის სანახავად ჩამოსვლა. მან კი მითხრა: ‘’გთხოვ, ჩამოდი“ – იხსენებდა ბარბარა მოგვიანებით.
წყილმა ურთიერთობა 2018 წელს გაასაჯაროვა. მალე დილანი Victoria’s Secret-ის ჩვენებასაც დაესწრო, სადაც ბარბარა მონაწილეობდა.
ამავე პერიოდიდან ბარბარა და დილანი უკვე წყვილის სტატუსით ჩნდებოდნენ. ერთად მოგზაურობდნენ, ესწრებოდნენ სპორტულ და სხვადასხვა საჯარო ღონისძიებას. ურთიერთობა თანდათან უფრო სერიოზული გახდა – 2019 წელს წყვილმა ერთად ცხოვრება დაიწყო.
2022 წელს დილანმა ბარბარას ხელი სთხოვა. ნიშნობის შესახებ გარკვეული პერიოდის განმავლობაში არ საუბრობდნენ და ეს ინფორმცია მხოლოდ ერთი წლის შემდეგ დაადასტურეს.
2023 წელს ბარბარას მშობლიურ უნგრეთში იქორწინეს. საქორწილო ცერემონია მოდელის მშობლების სახლში გაიმართა – ბარბარასთვის განსაკუთრებით მნიშვნელოვანი იყო, რომ ცხოვრების ერთ-ერთი ყველაზე მნიშვნელოვანი დღე საკუთარ ქვეყანაში, ოჯახის გარემოცვაში გაეტარებინა.
ბარბარა პალვინი
ბარბარა პალვინი 1993 წლის 8 ოქტომბერს ბუდაპეშტში დაიბადა. ბავშვობის წლები მშობლიურ ქალაქში გაატარა, ოჯახთან ერთად კი ხშირად სტუმრობდა უნგრეთის პატარა სოფელს, სადაც მისი ბებია და დიდი ბებია ცხოვრობდნენ.
ბავშვობაში ვერც კი წარმოიდგენდა, რომ ერთ დღესაც მოდელი გახდებოდა – მოზარდობისას მეგობრებთან ერთად დროის გატარება და სპორტი უყვარდა. ერთ-ერთ ადრეულ ინტერვიუში თავად ამბობდა, რომ ფეხბურთის თამაში განსაკუთრებით მოსწონდა და მოედანზე თავდამსხმელის პოზიციაზე თამაშობდა. უყვარდა მუსიკაც, მათ შორის ტრადიციული უნგრული სიმღერები, ასევე იაპონური ანიმაცია და მანგა.
მისი ცხოვრება 13 წლის ასაკში შეიცვალა – ბუდაპეშტის ქუჩაში დედასთან ერთად სეირნობდა, როდესაც სამოდელო სააგენტოს წარმომადგენელმა შეამჩნია. მან გოგონას სააგენტოში მისვლა და საცდელ ფოტოსესიაში მონაწილეობა შესთავაზა. სწორედ ასე დაიწყო ბარბარას კარიერა…
მოდელობა მისთვის სრულიად ახალი გამოცდილება აღმოჩნდა – ამავე დროს, სწავლის გაგრძელებაც უწევდა, რაც მარტივი არ ყოფილა. წლების შემდეგ იხსენებდა, რომ სკოლის გამოცდებისთვის მომზადებაში მეგობრები ეხმარებოდნენ, რადგან სამოდელო საქმიანობა მოგზაურობასა და დატვირთულ გრაფიკს მოითხოვდა.
2010 წელს პალვინმა მილანის მოდის კვირეულზე Prada-ს შემოდგომა-ზამთრის კოლექციის ჩვენებაში მიიღო მონაწილეობა. ეს მისი კარიერის ერთ-ერთი მნიშვნელოვანი ეტაპი აღმოჩნდა, მალევე მისით სხვა ცნობილი მოდის სახლებიც დაინტერესდნენ. ბარბარა Miu Miu-ს, Nina Ricci-ს, Giles-ის, Louis Vuitton-ის, Emanuel Ungaro-სა და Christopher Kane-ის ჩვენებებზე გამოჩნდა. მოგვიანებით პარიზის მოდის კვირეულშიც მიიღო მონაწილეობა და პოდიუმზე Vivienne Westwood-ისა და Chanel-ის სამოსით გაიარა.
2012 წელს პალვინმა Victoria’s Secret-თან გააფორმა კონტრაქტი და ბრენდის PINK-ის კამპანიაში მიიღო მონაწილეობა.
თუმცა, ბარბარას ამბავი მხოლოდ მოდის სამყაროთი არ დასრულებულა. 2014 წელს მან კინოშიც სცადა ძალები და ბრეტ რატნერის „ჰერკულესში“ გამოჩნდა. სამი წლის შემდეგ კი Sports Illustrated-ის სპეციალურ გამოცემაში გადაიღეს.
მოდისა და კამერების სამყაროს პარალელურად, ბარბარას ცხოვრებაში ახალი, ყველაზე მნიშვნელოვანი ეტაპი დადგა. სიყვარულის ისტორია, რომელიც წლების წინ Instagram-ზე გაგზავნილი ერთი შეტყობინებით დაიწყო, პატარა სილვის დაბადებით დაგვირგვინდა.
ასევე დაგაინტერესებთ:
#OK! ბარბარა პალვინის და დილან სპრაუსის ქორწილის ექსკლუზიური ფოტოები Vogue-ისთვის
#OK! დილან და ბარბარა სპრაუსები – სიყვარულის ისტორია, რომელიც უპასუხო მესიჯით დაიწყო
