მისი სახელი ჰოლივუდის რომანტიკული კინოს ისტორიაში ყველაზე ცნობილ როლებს უკავშირდება – რიჩარდ გირი 77 წლის იუბილეს აღნიშნავს და ამ ასაკშიც კვლავ სიყვარულის ისტორიის ცენტრში გვხვდება. მსახიობი ახალ ფილმში, „ასიმეტრიაში“ (Asymmetry) გამოჩნდება.
ფილმში გირის პარტნიორი 28 წლის დიანა სილვერსია. მსახიობები ნიუ-იორკში, გადასაღებ მოედანზე ერთად შენიშნეს.
ისტორია ერთი შეხედვით კლასიკურ რომანტიკულ სიუჟეტს ჰგავს, თუმცა „ასიმეტრია“ მხოლოდ სიყვარულის ამბავი არ არის. გირი 70 წლის ცნობილი მწერლის, ეზრას როლს ასრულებს, რომელიც ცენტრალურ პარკში ახალგაზრდა რედაქტორის ასისტენტს, ალისს, ხვდება. ერთი შეხედვით შემთხვევითი შეხვედრა მათ შორის ძლიერ კავშირს აჩენს და საბოლოოდ ურთიერთობაში გადაიზრდება, რომლის შესახებაც მათ გარშემო მყოფებმა არ უნდა იცოდნენ.
ეზრასთვის ალისი ის ადამიანია, ვისთანაც პირველად შეუძლია საკუთარი დაუცველობის გამოჩენა, მაშინ როცა ახალგაზრდა ქალი ამ ურთიერთობაში საკუთარი, როგორც მწერლის, შესაძლებლობების აღმოჩენას იწყებს. მათი ურთიერთობა ნელ-ნელა საიდუმლო სამყაროდ იქცევა, თუმცა ყველაფერი მაშინ იცვლება, როდესაც მათი რომანის შესახებ სხვები იგებენ.
„ასიმეტრია“ ლიზა ჰალიდეის 2018 წლის ამავე სახელწოდების ცნობილი რომანის ეკრანიზაციაა. წიგნმა გამოსვლისთანავე დიდი ყურადღება მიიპყრო. „ნიუ-იორკ თაიმსმა“ ის XXI საუკუნის ერთ-ერთ გამორჩეულ წიგნად დაასახელა.
ფილმს ოსკაროსანი რეჟისორი ედვარდ ცვიკი იღებს. რიჩარდ გირისა და დიანა სილვერსის გარდა, სამსახიობო შემადგენლობაში ჯულია გოლდანი ტელესი, ბაბაკ ტაფტი და ქეით ისტონი არიან.
„ასიმეტრიის“ გადაღებები ნიუ-იორკში 2026 წლის ივლისში დაიწყო და ქალაქის სხვადასხვა ლოკაციაზე გაგრძელდა. ამ დროისთვის ფილმი FilmNation-ის ოფიციალურ პროექტებში 2027 წლის ნამუშევრად არის მითითებული, თუმცა მისი ზუსტი პრემიერის თარიღი ჯერ უცნობია.
ასევე დაგაინტერესებთ:
#OK! რიჩარდ გირის 13 ბევრისთვის აქამდე უცნობი ვინტაჟური ფოტოს გასული ათწლეულებიდან
