ენტონი ვაკარელოს უახლესი კოლექცია Saint Laurent-ისთვის ფორმასა და კონსტრუქციაზე იყო აგებული არა მხოლოდ ტანსაცმელში, არამედ მთლიან ატმოსფეროშიც. ჩვენება გაიმართა მინიმალისტურ სივრცეში, სადაც მინა, ხე და ტყავი დომინირებდა, ხოლო სცენის ცენტრში იდგა დიდი ბიუსტი – იმ სკულპტურის რეკრეაცია, რომელიც თავად Yves Saint Laurent-ის პარიზის ბინაში იდგა. ამ დეტალმა კოლექცია სიმბოლურად დააკავშირა ბრენდის მემკვიდრეობასთან.
კოლექციას ჰქონდა კინემატოგრაფიული განწყობა. ვაკარელომ სილუეტზე გაამახვილა ყურადღება: მაქმანი სილიკონით დაფარა, რათა ნაზ მასალას სტრუქტურა და სიმტკიცე მიეღო. ლატექსის მოსაცმელები, თხელი კაბები და დიდი, ფუმფულა ქურთუკები ქმნიდა კონტრასტს სიმკაცრესა და სინაზეს შორის.
შთაგონების მთავარ წყაროდ ვაკარელომ აირჩია Romy Schneider-ი 1971 წლის ფილმიდან ,,Max et les Ferrailleurs”. მისი ხედვით, სწორედ ეს პერსონაჟი განასახიერებს სეზონის განწყობას – ქალს, რომელიც ერთდროულად აერთიანებს შინაგან ძალას და ფაქიზ, დაუცველ მხარეს.
ჩვენება დაიწყო ლეგენდარული Le Smoking-ის ახალი ვერსიებით, რომელიც წელს 60 წლის ხდება. ვაკარელოს ინტერპრეტაცია არ უსვამდა ხაზს ძალაუფლების დემონსტრირებას, არამედ გამოხატავდა თავისუფლებასა და ბუნებრივ სიმსუბუქეს. დასასრულს წარმოდგენილი იყო „Le Smoking“-ის ყველაზე სუფთა, მინიმალისტური ვერსია – მშვიდი, დაუდევარი ელეგანტურობით.
საერთო ჯამში, კოლექციამ არქიტექტურული სიმკაცრე და ინტიმური ემოციურობა გააერთიანა, წარსულის მემკვიდრეობა კი თანამედროვე ხედვით წარმოაჩინა.
