მოგესალმებით, სილამაზის გურუებო!
ზაფხული პიკშია. მართალია, ისე ვერ დაგვიცხა, როგორც ჩვენ ველოდით და მიჩვეულები ვართ, და მაინც, გარეთ ზაფხულია! მზეა, რუჯია, აუზი და ზღვა! და ჩვენც ბედნიერები ვართ. ხომ მეთანხმებით?
ზაფხულის პერიოდის ჩემს ბლოგში რაზე ვილაპარაკებ, თუ არა მზისგან დამცავებზე.
იცით, რას ვფიქრობდი? რამხელა ბედნიერებაა, რომ ცივილიზაციამ და განვითარებამ მზისგან დამცავები ჩვენამდე მოიტანა. აი, მე, მაგალითად, მილენიალი ვარ და ჩემს ბავშვობასა და მოზარდობაში მზისგან დამცავი აბა, ვინ იცოდა?! არავინ. ჰოდა, ვიხრუკებოდით მცხუნვარე მზის ქვეშ, ვისრუტავდით მზის მავნე ულტრაიისფერ გამოსხივებას და კაციშვილი არ გვყავდა, ვინც ჩვენ ან ჩვენს დედებს ეტყოდა, რომ ეს ძალიან, ძალიან მავნეა და მისგან დაცვაა საჭირო.
ამიტომ დავაფასოთ ის მონაპოვარი, რაც დღეს გვაქვს. მადლობა სილამაზისა და ჯანმრთელობის ინდუსტრიას, რომ გვაქვს კანის დამწვრობის, ალერგიის, კანის კიბოსა და სხვა რთული დაავადებების თავიდან აცილების შესანიშნავი საშუალება.
მე პირადად ზომიერად მზიან დღეებში Nuxe-ის 30 spf-იან მზისგან დამცავ ზეთს მოვიხმარ, ხოლო განსაკუთრებულად ცხელ დღეებში – ნუქსისავე 50 spf-იან კრემს. ნუ იფიქრებთ, რომ მზისგან დამცავის ქვეშ ვერ გაირუჯებით, ნამდვილად არ არის ასე. დამცავით აუცილებლად მიიღებთ ნამზეურს და მეტსაც გეტყვით, ბევრად ხანგრძლივ და სტაბილურ რუჯს, ვიდრე მზისგან დამცავის გარეშე. როცა კანს არ ვიცავთ და ის დაიწვება, თუნდაც ოდნავ მაინც, რამდენიმე დღეში დამწვარი ეპიდერმისი აშრევდება, აიქერცლება და რუჯისგან არაფერი რჩება. ხოლო გონივრულად, დამცავით მიღებული რუჯი დიდხანს რჩება კანზე.
ამას დავამატოთ ის ფაქტიც, რომ ძლიერი შოკოლადისფერი რუჯი დიდი ხანია აღარაა აქტუალური, ეს მდარე გემოვნების ტონად ითვლება და მოდაშია უფრო ჯანმრთელი, ოდნავი შეფერილობა, რასაც მე პირადად მეტად მივესალმები, რადგან კატეგორიულად არ მომწონს ზედმეტად მუქი ნამზეური.
საერთოდაც, ნელ-ნელა სილამაზის თანამედროვე ტენდენციები სულ უფრო მეტად აღიარებს და აფასებს თეთრ, გაურუჯავ კანს, რომელიც ყველაზე ჯანმრთელი და ლამაზია. მე თავად ამას სრულად მივესალმები, დაე, დავამკვიდროთ, როგორც ძველად იყო მოდაში, თეთრი კანის სილამაზე და წარსულს ჩავაბაროთ სოლარიუმში და მზის მავნე გამოსხივებით ჭარბად გამუქებული კანი. სოლარიუმი როგორი ბოროტების მანქანაა და რა უსაზღვრო მავნებლობა მოაქვს ჩვენი ჯანმრთელობისთვის, ამაზე ცალკე აღარ შევჩერდები. მხოლოდ მოკლედ გაგიზიარებთ ჩემს მწარე გამოცდილებას – არც ისე შორეულ წარსულში სულ ორ ზაფხულს ვისარგებლე ძალიან მცირე ხნით და დაბალანსებულად სოლარიუმით და ორი ონკოლოგიური ოპერაცია გავიკეთე, რომელიც სოლარიუმმა საჩუქრად მიბოძა. ამის შემდეგ ჩემზე დიდი მტერი და მოძულე სოლარიუმს არა მგონია, ჰყავდეს.
მაშ, ასე, ბედნიერი ზაფხული ყველას! დაისვენეთ, გალაღდით, იჭყუმპალავეთ და წაიკითეთ OK!-ს აგვისტოს ნომრის ბიუთი რუბრიკა, გაეცანით თქვენთვის საინტერესო და სასარგებლო ინფორმაციებს, რომელიც, დიდი იმედი მაქვს, გამოგადგებათ.
სიყვარულით,
თაკო გვაზავა
ჟურნალ OK!-ს ბიუთი რედაქტორი
